Hardamnak hrang ih tha hnem mi Strawberry

Hardamnak hrang ih tha hnem mi Strawberry

              Strawberry kan ti veten mitinkim ih thinlung sungah a thur vekvek, a thlum vekvek a sen zawng arah tiin theih a si. Strawberry cu a hmaisabik ah kum 1740 ah France ram ah an rak cing thok. Danglam zet in sak America ih Strawberry cu a rim a thaw tuk ih, Chile le Argentina ram ih Strawberry an tum. Strawberry cin nak hmuan pawl ah thal caan ah an ciing. A hram in cin asiih, a hram a ro asile a nun a har. A cin daan cu pi 2 ciar hla in, a zawn in cin a siih, a hram cu 6in hrawng a sau ih cin a ol. Leilung ih a zam mi thingkung phun a siih, a kung khat le khat ih a hlat nak cu 14in hrawng ih cin a si. Strawberry pawl cu a tleu mi an duh nan thil hrang tuk cu an duh lo.

              A kung cu karhnih veikhat dawm pek a si. A tul mi hnakih tam dawm pek asile a hnah pawl an thang ciamco ih, a rah pawl a mal ih a fate thei. Strawberry kung pawl cu cing ding ah a ol nan, pangang a um ol zet mi kung phun a si. Strawberry kung in a thupi bik ih a ral mi cu Kabin pangang phun pawl an siih, a hram an kei cat ih a kung a thih thei ruangah pangang thah nak sii kah nak, pangang a um mi a hnah pawl le a rah tawt pawl hlon nak cutivek in ralring dingah a tul.

              Strawberry ih a nemnak le a danglam mi a rim pawl a duh lo tu an um ding zum a um lo. Strawberry hmin cu amah vial ei asivekin cawhnawithur, cini ti, ice cream, pawnghmuk, cuahcaw, jelly, cini cutivek in ei a si. Cuihleiah chocolate sungah Strawberry a ro mi ret ih in nak cu dat thagn do kham thil ri pawl ngah nak harhdamnak hrang phunkhat khal a si.

Strawberry le harhdamnak

              Strawberry sungah harhdamnak le taksa thazang thatnak a pe tu Philiphonic le Vitamin C pawl ih tha um nak bik a siih, calory malte vial a tel. Cuihleiah a zup ol zet mi ahmin dat, Vitamin K, maganese, Pholic acid, Potassium, Calcium, Vitamin B2, B5, B6, Cupper, Riboflavin, tindat, phophurus, linisium, Vitamin V, Carbonhydrate, maganisium le Omagas phati acid pawl khal a tel.

1.Strawberry sungah taksa hrangah a tul lomi free radical, pawl a do thei tu Indioxydrate le phytonutrient pawl tawkzawng in a tel ruangah taksa tar loihli lo in a nuam te ter ih, san a sau ter. Strawberry cu nikhat ah pum 7 ei ringring nak in pumpi cancer, nauinn cancer, hnawi cancer le nunau pawl cancer nat nak pawl can thei nak a mal thu, rilpi cancer, mipa pawl taksa ih a cang thei mi cancer, cuap cancer, lei cancer, dang cancer cutivek cancer cell pawl can thei nak thazet in a kham thei thu, California ih Strawberry commission in ruahnak an pe. Cumi thu cu US ram ih USDA zingzoi tu pawlkom in an nemhnget.

2. Strawberry sungih a tel mi malic acid enzymes cu haa pawl var ter thei nak a neih ruangah strawberry ih a sung ih ummi kha haa ah kut thawn minute 2 hrawng rawt nakin haa pawl a var thei.

3. Dangnat nak hrangah strawberry ei in a hlo thei.

4. Strawberry sungih a um mi dat pawl cu aspirin siivai vekin thiltitheinak a neih ruangah tha nat le ruhcang thling nat nak pawl cu that lo nak um loin a zia ter thei. Harvaid School of Public Health ih an zingzoi nak vekin karkhat ah strawberry pum 16 a ei tu nunau pawl cu strawberry a ei dah lo mi nunau pawl thawn tahthim tikah taksa nat nak zatek 14tang lawng a um tiin theih a si. Ruh nat pawl cu a zia ter thei tiin India ram ih siilam hminsin nak ah an lang ter.

5. A rah sungah phytochemical le iodine pawl tampi a tel ruangah thluak le thahri pawl cu thazang a cang ter. 2009 kum ah Chicago Healthy Anging Project (CHAP) ih zingzoi nak vekin Strawberry sugnah tar hnu ih a cang mi thawn a pehpar aw mi thluak sung ih thinbang nak phunkhat a mal ter thei ruangah thluak sungih thihri pawl a that ter thei thu, kum 65 tlun kum upa lam pawl cu Strawberry einak in suahkeh ih a cang thei mi thluak thahri that lo nak, thahri pawl thamal ih kut ke pawl thia nak, cakvak nak tha mal nak, cutivek pawl a mal ter thei thu thil hminsin nak khal a sang thei thu theih a si.

6. A rah sungah vitamin B tampi a tel ruangah sam a tha ter. Sam cu amah kel ten ding duh asile cawhnawi khuatkhat sungah khuaitizu haikhat rawi in strawberry malte nuai taratin thazet in cawk aw. Cumi cu sampar ah hnih in ro ter aw. Nazi pahnih a rei tikah shampoo thawn kholh nak in sam pawl a dum in a tha ding.

7. Strawberry sungah Vitamin C tampi a tel ruangah nat tuar thei nak thazang a tam ter ih, a leng lam ih nat nak pawl olten suan a ngah lo. Dai ngah, rai bur, awm naa cutivek nat pawl a kham ter. Cuihleiah thinlung ruahnak a tam ter ih hleiah duhdawt awknak lam pawl khalah tha dingin a bom thei ruangah strawberry cu Valentine's day hminsinnak rah tiin an ei theu.

8. The Archives of Opthalmology ih siilam ih an ngan nak vekin strawberry nitin ei nak in a rah sungih a um mi vitamin C le antioxidant dat pawl cu mit sung ih a rau mi nat pawl, mit cawt nak le kum upa ruangih a cang thei mi mit malh nak cutivek pawl a kham thei ih hleiah mit sung le mit tha pawl thazang a cak ter thei thu an lang ter.

9. Strawberry rah pawl cu lingmaw hnakin tarnak a kham thei tu Vitamin C tam a tel. A rah sungih a tel mi collagen dat cu vunsung ih cell pawl a dam ter ih, vun siatnak a kham ruangah, hmaipar ih a kor mi pawl, hmai cuar nak le vun dor nak pawl a kham sak thei thu Korea ram ih Hallyum University ih siilam zingzoi nak in an hminsin.

10. A rah sung ih a um mi phytochemical le maganese pawl cu thi sungih a zup thei lomi a sii pawl le colostrum pawl an tlak ter ih hleiah thisen pih nak pawl khal an humhim thei ruangah awm nat nak, lungnat a phunphun, taksa zeng le zunthlum nat pawl a cang thei lo.

11. Strawberry sungih a tel mi potassium pawl cu thifeh daan hmanhman ten a um ter ruangah thi thang nat nei pawl ahleice in ei a tul.

12. A rah sungah a zup ol zet mi ahmindat tawkzawn in a tel ruangah pum feh daan tha lo, rilpi rilte le ril lamzin ih harsat nak pawl zatek 50 hrawng malter thei nak a nei.

13. A rah sungih a um mi ahmindat pawl cu thi feh nak ih a thlum dat hip nak nuam te dingin a bom ruangah, zunthlun nat nei pawl cu strawberry nitin hmanhman ten ei a tul.

14. Strawberry sungah calory malnak, asii zianghman a tel loih, sodium le a thlum dat a mal tuk ruangah taksa rihnak hmanhman ten a kilduh tu pawl hrangah a thabik mi in ei a si.

15. Nauvon tu nu pawl hrangah folate cu um lo thei lo in a thupi tuk. Cutilawngah a suak dingmi naute ih ruahnak, luu le zangruh thahri pawl thaten a thang ter ih, suahkeh ih ruhnat nak khal a hlo ding. Strawberry sungah folate dat a tawk zawn in a tel ruangah nauvon pek te nu pawl le nau nei tu ding nunau pawl ei tul mi rah a si.

16. Cuihleiah arah sungah potassium, vitamin K le maganesium pawl a tel ruangah ruh harhdamnak hrangah tampi in a bawm thei.

#falamrva

#rvafalamservice

#RVAFalamService