Zanniat nunphung (Um tu ziaza)

Zanniat nunphung (Um tu ziaza)

            Pa cang pakhat tlangval khal lo an feh maw, inn ihsin lengah an feh kip in zal an pai, zal sungah namte, saihlum, thal tivak an keng. Thal asilole Saihli an keng theu. Pacang pawl cun lupawng, angki bantawi te biar an hruk. An kut ah feipi asilole kianghrol an keng. A liang ah hreitlung a ret. Zal a pai ih namte a keng. A l samtom sungah meilung le pat par, meisa tik ding a ret. Ar ruh ih tuah mi le vok ruah ih tuah mi hruk pi cu a sam tom ah an tem. Lam an feh tikah dungta bik in a feh ding. A nufa cu a hmaiah an feh ding. Nauhak pawl dungta bik ih an feh le rul in a cuk thei an ti. (rul timi cu khuavang a si tin an rak zum.)

            Nupi cu bawm an phur ding. A bawm sungah an tul mi Tuhmui, suncaw le ti thol pawl an um. A kut ah pat a merh phah. Lo ihsin a tlung le rawl suan nak zanthing a phur. Lo an thleng tikah pabik in a sam tom sungih meilung a lak ih meisa an muah. An rawl ei bik mi cu vainim le rathe, busul a si. Zan ah vianim den cia cu belpi in an suang. Inn tek nu cu pat hnuk phah in vainim a hmin tiang it loin a hngak theu. Fapa cu lo a thlo thei hlan hmuah cu sia khal tu asi. Zan asile a rualpi nauhak mipa tla thawn an duh nak hmun ah a bur, hmunkhat ah an riak theu ruangah innsang hnatuan ding cu a tuah tuk lo.

            A nu le pa ih ro hman a co ngah lo (ro co ding nei lo) an fa nu lawng in a nu ih inn sungsang hnatuan cu a bawm theu. Zanthing phur ding. Vok rawl, ar rawl pek ding tidai khai ding ti a tul mi hnatuan cu an u in a fial theu. Lo a feh tik khal ah an fanu cu lo thlo tu dingah an hruai ringring theu. A cuih san lai ah cu tlawngkai cazir ti khal a um lo.

            Zanniat pawl inntek pacang pahnih inn pakhat ih um an duh lo. Cuhrangah mah le inn pakhat sak tengteng an tum. Fapa in nupi a thit le mo nu in an pa cu zamrang ih innsak ding ah a forh. Mo timi cu farnu pawl le an pa ih nu le pa hneih an um sung cu hnatuan tu bik ah a cang ih a zonzai tuk. Mah duhduh in a um ngam lo. Cuih hrangah huat aw pang um hlan ah inn sak ih mah te inn nei ding an zuam. Lo an thlo ve ding ih an lo rawl cu an maih ta asi ding an duh theu. Hi mi cu Zanniat thu hla thawn kan run ngan mi a si. Kan lai nunphung thuanthu pawl thei kauhnak dingah siar tlang uh si. hi mi  thu cu U Za Thluai ih ngan mi sung mi kan run tarlang mi  asi.