India nisuahnak saklam ih Catholic Bishop pawl in an pengtlang ih nikhua thlengnak do dingah le kiangkap kilveng dingah thu tiamkamnak tuah. (Sep 17, 2022)

India nisuahnak saklam ih Catholic Bishop pawl in an pengtlang ih nikhua thlengnak do dingah le kiangkap kilveng dingah thu tiamkamnak tuah. (Sep 17, 2022)

               Ni 4 sung reimi tonkhawmnakpi cu India, Assam ramthen, Guwahati khuapi ih ummi North East Diocesan Social Service Society timi pawlkom ih Jubilee Hngilhlonak Hall sungah September 12 ihsin 15 tiang tuah a si. Himi tonkhawmnakpi hi pulhnat ruangah kum hnih a rei hnu ah tuah a si ih India nisuahnaklam ih diocese 15 ihsin mipum 150 an tel. Tonkhawmnakpi cu “India nisuahnak lam ih tikcu thlengnak le Pathian ih sersiam mi humhualnak” timi thu tlangpi thawn tuah a si.

              Kohima khua ih Bishop James Thoppil cun “India ram sungih hmun khat cu nasa zet in nikhua carnak in a namnuai lai  ah a dang hmun khat ah hmuah tilet maksak a tho fawn. Himi cu kan duhhamnak le kan duhhrilnak ruangih cangmi a si” ti’n a sim. Anih hi the North East India Regional Bishops Council (NEIRBC) timi pawlkom ih sungtuan khal a si. Leilung tlun hmunkip, ahleicein, India nisuahnak saklam ih rapthlakza nikhua thlengnak thawn pehpar in pumpak cio hnenih ralrin peknak ah Guwahati ih Archbishop John Moolachira cun hiti’n a sim ve: “Siangbawi note ka si laiah tupi lakin khual ka rak tlawng theu. A tu kum 35-40 a rei hnu, a hlan ih ka feh theunak pawl ka fehsal tikah tupi hmuh ding a um nawn lo.” Archbishop John Moolachira cu NEIRBC pawlkom ih hotu bik a si.

            Himi tonkhawmnakpi ah University tlawng ih loram lam theithiam zettu Vincent T. Darlong in kan umnak Leilungpi humhual ding le kilven ding dan thawn pehpar in simnak a nei.  Guwahati ih hram bunmi Khuate lam Thansonak Tlawng ih Professor Dr. Mukesh K Srivastava in nisuahnak saklam ih cicinnak leilung le tidai kilven ding thuhla a sim. Cule, Cotton University ih leiram lam tuanvo neitu Dr. Ujjal Deka Baruah in an sehvel ih cangmi tilik le leimin thuhla pawl, ziangruang ah an cang ih ziangti’n kan kham ding timi thu pawl a sim.

          Guwahati ih ummi Assam Don Bosco University ih hnatuan, Professor Lukose PJ khal in India nisuahnak saklam ah a cangmi tikcu thlengnak thawn pehpar in Kawhhranpi in ziangti’n a cangvai ding timi thu a rel. Tikcu thlengnak ihsin a ra suakmi tihnung za thil thawn pehpar in ralrinnak pe dingah kawhhran tinkim in tuanvo an neih zia langternak dingah an pengtlang ih kiangkap kilvennak lam tuanvo latu pawl in cahnah pawl an zem. Jesuit sungtel Fr. Robert Athickal khal in, an pengtlang hrangah Pope Francis kiangkap kilven ding thuhla a nganmi “Laudato Si” cabu ih tangkai zia le tuisan ah kiangkap kilhimnak thawn mil-awmi thlarau lam nun ih thupit zia pawl a sim.

          Culawng si loin, hi tikcu thlengnak thawn pehpar in tuukhal hnatuan lam in siseh, fimthiamnak lam in siseh, minung karlak ih pehtlaih awknak lam zawngin siseh, ziangti’n tan kan lak ding timi thu leh peng sung ummi mipi pawl thuhla thawn pehpar in thu rorelkhawmnak khal tuah a si.“India nisuahnak saklam hrang lawng siloin, leitlun pumpi hrang khal ih a thupi tuk mi tuih tonkhawmnak ihsin kan zir ngahmi hi kan thinlung sungah kan ret that cio ding ti’n ruahsannak ka nei” tiah Itanagar diocese hotu Bishop John Thomas cun a sim.

https://bit.ly/3LruYNG