Inn sung sang nun nak ih thla cam nak

                Inn sung sang nun nak ih thla cam nak

        Thlacam nak cu nauhak zaten khal in siseh, inn sung sang hrang khal ah a tul. Duh dawt nak cu inn sang ihsin a suak mi a si ruangah, inn sung sang hmun khat ten thlacam nak tuah nak in hmun khat in (thek darh lo in) aum  mi Pathian in inn sang tin in si ter duh vek in pakhat le pakhat duh dawt aw uh. (Mother Teresa)

        Kut sih neih awk nak a tuah tu pawl cu inn sung sang nun nak ih har sat nak, har nak, hnaihnok nak pawl pah ngam ding asi. Inn sang nun nak cu ol te men in na ruat asile, ruat nak men na si ti hngilh aw hlah. Vei khat ah khua pi pakhat ah biak nak lam ih a pom hngek tu nunau pakhat cu, biak inn hman hman in a feh ih biak nak lam ih, a zuam thu kha cui kohhran ih a um mi zum tu pawl in an thei. Cui nunau nu cu fel nak, biak nak lam ih zuam nak, um tlan nak, fel nak ah a zuam tuk ti kha an zaten in an thei theh. Ni khat niah cun sister a tuan ko ding tiin mi zaten in an ruat.

        Nikhat ni zarh pi niah cui nunau nu cun kut sih nak a neih ding thu biak inn ah an than tikah mi pawl an mang a bang tuk. Khawm an theh ah mi pakhat in cu nu hnen ah a feh ih a va cibai. “Kei a hlan ah ka lo zum daan ahcun, ka fanu biak nak lamah na zuam ih, Pathian thu na duh. Na zuam nak ruangah sister na tuan ding hmang tiah ka ruat. A tu vek in inn sang din ding na si lo tiin ka rak zum. Inn sang na ding ding ti ka thei ih ka mang a bang tuk tiin a ti. cutikah cunu cun “kei mah lam ihsin cun inn sang ka din ding ti ka theih ruangah  biak naklam ah ka rak zuam. Ka pu na theih vek in inn sang din ding hi a ol lo. Pathian zang fah nak a tul tuk asi lo maw” tiin a let sal.

        Kut sih nak nei pek te nu pa tei cu thinglam ta pakhat an lei ih an khan sungah an tar. Cui nupa tei cu thing lamta hmaiah nitinten khukbil in Pathian tih zah nak thawn thla an cam ringring. Thla an cam vek in Pathian ih zirh mi vek in a hman mi Christian nun nak thawn an nung.

        Cutiin an um ih kum a rei vivo tikah fa tampi an nei. An fa le pawl khal an fel ih, Pathian an tih zah. Nikhat ah an mah ih kut sih nak kum (50) kim Jubilee cu an rual pi pawl thawn an tuah.

        Cui Jubilee ah an rual pi pakhat in “Nan nih cu hivek in a fim ih suah keh fim nak thawn a khat mi fa le ziang tin nan nei thei” tiin a suh tikah, Jubilee tuah tu nupa tei cun kum (50) rori an mah ih an tar mi, thing lam tah cu an hmuh ih “kan nih in hivek fa le te fim ding in kan kil thei nak cu amah ruangah asi. Bawipa Pathian ruangah asi. A hnen ah zum nak, upat nak thawn thla kan cam ringring. A mah ih zirh mi vek in um in nau hak pawl cu zin hman kan hmuh thei” tiin a let. Ca siar tu nan zate parah Pathian thlasuah nak um hram seh.