Thinlung tha nei mi Siangpahrang

Thinlung tha nei mi Siangpahrang

          Veikhatlaiah Siangpahrang pa pakhat cu Rang a to ih Siangpahrang innpi ihsin a sual. A kut hnuai minung pawl tla a hruai. A ram ih mifarah pawl um nak hmun hmuan pakhat kiang an thleng ih an cawl. Cuicaan ah khuitawk ihsin deng mi ti theih lo mi lungto pakhat cu Siangpahrang pai luu a rak ngah. A luu cu a pem ih reilo te sungah a thling. Siangpahrang pa cu Rang par in a tum. A kut hnuai pawl cu hmuan sungah an lut ih lungto deng tu kha an hawl.

          A deng tu cu hawl buai rero tul lo in an kaiih an rak hruai thei cih. Lungto dengtu cu mifarah nauhak te a si. Siangpahrang pa cun “Ziangruangah lungto thawn ka luu in deng” tin nauhak pate cu a sut. Nauhak pate cu a kutza a kom. A tihtuk ruangah a kutza kom mi khal a thia thluh. “Siangpahrang Bawipa na luu kha lungto thawn ka lo deng hrim mi a silo. Ka nu cu a naa ih itkhun ih a it nak a rei tuk thlang. Inn ah ka nu pek ding ei ding zianghman a um lo. Ka nu pek dingah thingrah pawl lo dingin hmuan sungih ka rat nak a si. Thingrah a thuai ih tla dingah lungto thawn ka deng. Thingrah kha ngah lo in Siangpahrang Bawipa a lo ngah cu kan thin a nuam lo zet. Ngaithiam ka lo dil” tin nauhak pate cun a sim.

          Siangpahrang pa cu nauhak pate parah a thin a heng nawn lo. Thin hahdam te in a hnih san. Nauhak pa te cu ei in ding pawl le sui a khat mi dip pakhat tla a pe bet. “ a  si le… ka lo pek mi ei in pawl le sui pawl la aw keimah rori in a dam lo mi na nu cu ka ra zoh ding” a ti. Nauhak pa in Siangpahrang pa cu a hruai ih an um nak thlam sia te ah cun a feh pi. Siangpahrang pai kut hnuai pawl cun cui thlamsia te a leng in an rak hngak.

          Cui thlam te sungah cun nauhak pai nu cu ei in ding nei nawn lo in a tawl thluh. “Ka fapa na ra thleng zo maw? Ei in ding na rak keng maw?” ti a nu in a sut. A fapa cun “Ka ra thleng zo ka nu, ei in pawl a khat in ka rak keng” a ti. Nauhak pa in a nu cu eiin pawl a pek hnuah thlam leng cu a zoh ih Siangpahrang pa le a kut hnuai pawl an kir cu malte lawng in a hei hmu thei.

          Zin ah Siangpahrang kuthnuai ih upa bik in Siangpahrang pa cu a sut. “Siangpahrang Bawipa hi nauhak pa in hrimhma a lo pe cing in ziangah sualcawh kuan nak na pek lo”tiah an ti.

          Siangpahrang pa in “Nunnak nei lo, zangfah lainat nak hman thei lo mi thingkung hman in lungto ih an deng tikah ei ding zianghman nei lo mi hman ei ding thingrah a pek a si lo maw. Keimah vek nunnak nei, zangfah lainat nak thu thei mi minung dinhmun in lungto thawn in dengih ei in in dil tu nauhak cu zingtin sualcawh kuan nak ka pek ngam ding tiah a rak ti asi. Hi Siangpahrang pai thinlung bangin zawnruahnak, lainatnak nei cio dingah zuam tlang uh si.