Kedam (Phanat) sia te tluk hman ih man nei lo mi kan ruangpi

Kedam (Phanat) sia te tluk hman ih man nei lo mi kan ruangpi

          Nikhat ah khuate lam ih tlawngval pakhat bazaar ah thil lei dingin a feh phah ah ruah le a rak sur tikah a phanat cu a siat. Cutikah a zaal sungih cahnah thawn a tuam ih a keng. Bazaar lut nak ih dawr pakhat a thlen tikah dawr nei tu nu cu a ko ih a sim. Ka Kedam ka ret sung ta ding a ngah maw? Bazaar ka rat phah ah a siat ih ka tlun phah le ka rak la sal ding” a ti. Dawr kiltu nu cun “Aw..aw hinah ret aw..”a ti. Cutikah thil a lei theh in Kedam cu a la sal. Ka u ka phanat ka la thlang ding” a ti. Aw.. la aw. Ka lungawi ka u. Na thinlung a tha tuk a ti. Cutikah dawr neitu nu in “A ngah ko kan nih pawl cu minung ka si si hi ti bawm awk cu ziang tham hman a si lo” a ti. Sile ka feh ta ding maw”a ti. Awleh neta tla bawm na tul le in sim aw. Awleh ka u. Cutin tlangval pa cu an khua ah a tlung. A thaisun ah a rualpi thawn bazaar an feh. Lamzin le har, ni le sa, a rualpa cun rinlopiin ka Luu va zing ve a ti rero lai ah a tlu ih a nunnak a cem. A rualpa rinlopi ih a thih tik ah ziang a tuah ding a thei nawn lo, cutikah thu pakhat a ruat. A rualpa ih ruang cu puan thawn a tuam ih a pu. A hlan ih a phanat a rak ret nak dawr hmai a thlen tikah hi dawr ah ka re ta ding a ti.

          Cutikah ka unu in thei lai maw? Aww.. veikhat sun ah nangmah si lo maw phanat (Kedam) siat mi rak re tu kha. Aw.. aw si ee keimah ka si. Aw… sim aw ka nau ziang mi ka lo bawm bet ding? Aw ka rualpa zin ah ka Luuzing a ti ih a tlu. A thih cih…kan khua ah kan phum ding ruangah ka rualpa hinah malte sung ka re ta ding. A tong theh ve ten a ngah lo pi. Ziang a ngah ding nang khal le thu na va ruat thiam lo ve mithi ruangpi ka dawr ih ret tum cu feh…feh. Ka dawr hmai in tlan aw.. cutikah tlangval pa khal a tlan ih dawr kiltu khal thinheng phah in a rung tang. A rualpa ih ruang cu phur phah ih a tlun phah ah tlangval pa te ih ruah nak sungah “Aww… leitlun minung pawl cu an thih hlan ah cun an hngal an puarthau. Thiam nak neih nak an zuam aw an thih hnu cun phanat siate tluk hman in man an nei lo a si hi” tin a ruat. A si… thih hlan ah kan hngal, kan puarthau, kan porh aw, kan thih hnu cun kan duhdawt zet kan ti mi kan nupi, kan pasal, kan fate pawl inn ah rei pi ret kan duh lo.Thih tikih man nei lo mi hi kan ruangpi cu thiltha lo pawl tuahnak ah hmang sual hlah. Nitin thiltha tuah nak thawn kan um thei nak dingah thazaang suah zuam uh si. Casiar tu zate parah Pathian thlasuahnak um hram seh. Kan website rak zoh ringring ding khal in zaangfah kan lo dil.