Putar pate ih nun simnak

Putar pate ih nun simnak

       Khuahlanlai ah Khua pakhat ah a farah zet mi nufa te an um.  Nikhua a sat zet nikhat ah nauhak pakhat cu an khua pawn ih thingkung daihnem tangah thinheng zet in a mah te lawng a ttong ciamco. Cui caan ah uico hruai in cawl dingin thingkung tang ih a ra thleng tu khualtlawng puterpa pakhat in thilcang mi a zoh ih cui nauhak pa te a sut. “ Nauhak pa ziangah hi tluk lawmmam in na thingheng” tin a sut. Ziang si um ding inn ih ka nu pan teh. Sun nihlawh hnatuan i fial. rualpi pawl thawn tla lek nak caan um lo” tin a sawn. “ Sile keimah tawn na lek paih maw” tin puterpa in a sut.

 Pu ter pa in a ttong phah ah lungto pahnin a sar ih “ heh nang le kei ah zosi zuam nak a nei sawn ti kan zoh ding.   Lungto kan lek ding. Reipi a kai thei tu in a neh” Lek dan ding kha har lo ruangah nauhak pa te khal in a pom.  Lungto kha nazi khuai hman kim hrih lo a khai ih rit ati tuk ih “ Tawk zo ka sungkhan, ka kut zawng tuk, lek khal nuam lo” tin ati ih Pu ter pa in “ A si le Uico thawn lek hmen uh. Sinan pakhat cu a um Ui te thawn nan lek hlan ah khi dip sung ih cawhnawibuu  cem ko na pek hnuah na lek ding” “ Ngah ko ee ka lo pek sak ding”  Cu tin a ttong theh hnu Uite cu hnawi a pek uite cu hnawi in lo in a lek ciamco ih nauhak pa te cu a thinheng thlang ih “ Ka pek nawn lo ding voikhat te hman daiten a um lo ka thin cem thlang ka lek ngah lo khal le um men seh” a ti culawng ah puter pa cu hni in “ Nauhak pa ziangtluk hman a rit lo mi lungto pakhat kha nazi khuai kim tiang hman na kai thei lo.

Nang hi tluk tiang thanglian ding in na nu in thlakua rei a lo pai ti kha na mang maw?  Nang cu uite khal cawhnawi voikhat te hman khop in na pek thei lo nan na nu cun hitluk tiang si ding in hnawi kha siar cawk lo ih pek thei dingin ziang vek harsat nak pawl  tong in a lo pek ti kha theih teh na thei maw”?. Nauhak pa in puter pa ih tong mi atheih tik ah tharen a ruat ih a nu a zangfah nak thinlung thawn a mitthli hal in ziang kamkhat hman sawn nawn lo in nehhnu cu ka nui fial mi zaten el lo in thaten ka tuah thlang ding a ti ih inn ah zuang phah in a tlung. Nauhak pa te cu ruatta lo in a um ko nan tu cu Nulepa ih duhdawt nak kha tha ten a thei a si.