Alenglam ih komtu

Alenglam ih komtu

    Ti awkter thiam lawngah mi upat ngah nak san ah sinak kha si nak vekih a um thiam tu nang cu zianghman ih siar lo mi pakhat na si thei.  Ttongdan thiam lawng ah mi ih ngaisannak san ah a hman mi kha a hman vekih ttong tu nang cu mi hnoksak tu na si thei.

    Pek thei lawng ih mithmai tha ngahnak san ah zianghman nei lo ih sidankelte vek ih umtu nang cu hnon mi pakhat na si thei.  Mi tlon thei lawngah hmuntha (sinak tha) ngahnak sanah lamzin  ceek dingih a zuam rero tu nang cu mi hnihsan tak tla na si thei.

     Midang pal ih neh thei lawngah a par thlen theinak san ah mah hnak ih a niam tu pawl a cang thei tawk ih a bawm tu nang cu mi mihrek ih hmuhnakah mi aa pakhat na si mai thei.  Midang namthlak lawngah hlawhtlin ngah sanah thinlung thiangfai ten nung thei ding ih a zuam rero tu nang cu minung lak ih thlem lotu pakhat na si thei. 

     A sinan minung lak ih na thlem lo khal le tha nau hlah. Hnon na tuar ruangah thinnau hlah. Zawmtaih na tuar ruangah thinheng hlah. Nautat na tuar ruangah thinnau in um hlah. Ziang hman siar lo nak na ton khal le riahsia hlah. Midik lo pawl ih cin le daan leng ih na thlen ruangah thinphang hlah.

     Na nauhak lai ih na duh zet mi Cinderella thuanthu kha na cing lai ding tiah ka zum. Thinlung tha lotu nu ei le unau pawl lakah kutsawh tuar in a thanglian tu Cinderella cu nehhnu ahcun nuam nak pawl thawn caan a rak hmang thei. Hi cu thuanthu sung lawngah si a leng ahcun hi tluk in a vantha thei lo tin ruat hlah. Boruak ti mi cu na kutsung ih um mi na neih mi man nei zet pakhat asi. Na that sile na vantha ding a si vekin na that lo ahcun na van khal a sia thei.

     Tun na din hmun ah hlawhtlin lonak, sun nak, hnon na tuar nak pawl ruangah beidong rero a tul lo. Zohman le ziang vek thil pawl kha sual puh ciamco a tul lo.  “ A nih a that tul lo, nangmah that ding atul” ti mi tong vek asi. Midang par na tha ko nan khatlam mi in na par ah that lo nak pawl a ton tikah hi mi thu kha mangsal aw.

      A nih a that lo cu a mai tuanvo. Nang that ding cu nangmai tuanco. A nih a that lo ruangah nang in lehrul in that lo nak pawl na tuah sile nang khal a mah thawn sinak bang aw mi tha lo ah na cang ding asi. A thupi bik mi cu leitlun ah mai tuanvo kha theh dingin tuah suak thei a tul. Leitlun ah tuanvo theh tu cu a thih khal le sirawk nak thawn a thi lo. Casiartu zate parah Pathian thlasuahnak um hram seh.