Rualpi pathum

Rualpi pathum

          Khua hlan lai ah tupi sung pakhat ih tikhur ah cumkheng pakhat a um. Cui tikhur kiang ih hrambur pakhat ah zukneng pakhat a um. Cui hrambur kiang thingkung pakhat ah vate pakhat a um. Cui ramsa pathum pawl cu rualpi ah an kai aw. Pakhat le pakhat an duh aw hai zet.

          Nikhat ah cun ramtawi mi pa pakhat cu cui tikhur kiang ah cun a ra thleng ih zukneng ke neh a hmuh ih thang a kam.

          Zukneng cu zaanlam ah tikhur ah ti in ding in a feh tikah ramtawi pai a kam mi thang in a awk. Cutikah zukneng cu a au. Zukneng a au ruangah vate le cumkheng cu sakhi a um nak lam ah cun an feh. Thang ih awh mi zukneng cu an hmuh tikah thang ihsin luat dingah ziangtin kan bawm ding tin an rel khawm. Vate cun ka rual cumkheng “Nang cu a hriam mi ha na nei ih thang kha keu aw. Kei in ramtawi pa ra thei lo dingin a phunphun ih ka zuam ding” a ti.

          Cumkheng cun thang cu a keu. Zaan khua muai (maw) ihsin zingkhua vang zik tiang zaanvar a keu ih hri pahnih lawng a tan. Hri pakhat cu zing khuavang tiang tan dingin a keu ih a zuam rero lai.

          Vate cu ramtawi pai um nak khuaah a zam ih an inn kiang thingkung par in a hngak. Ramtawi pa cu zing a hungkim tikah fei a keng ih an khua hmailam sangkaa in a suak. Cui caan ah vate cu a ai ih ramtawi pa ih hmai ah a thla thawn a zap. Ramthawi pa khal hi vate sual in in zap. Thil tha lo a si a ti ih inn a tlun ih reilo te sung a it sal. Cutheh in fei a la sal ih sangkaa dung lam ihsin a suak sal. Vate cu a ai ih ramthawi pai kiang ah cun a ra ih a thla thawn a thawi sal. Ramthawi pa khal cu a va it sal. Rei lo ah ramthawi pa cu fei a la ih a suak sal. Vate khal cu zamrang ten a zam ih ramtawi pa a suah thu kha zukneng le cumkheng cu a sim.

          A tangzet mi hri pawl kha a keu tan ruangah cumkheng ih haa pawl cu thlong zik ko tiangin a naa thluh. A kaa sung khal ah thi pawl a khat. Thang hri khal cu a cat hrih lo. Ramtawi pa a thleng zik thlang tikah zukneng cu thang sung ih a tlan ih hrambur lakah a tlan. Vate in cu thingkung par ih a zoh. Cumkheng cu a tha a cem tuk ruangah a tlan thei lo ih cui hmuh nak cun a relh.

          Ramtawi pa cun cumkheng cu a la ih a zaal sungah a san ih thingtek ah cun a thlai. Vate ih a sim ruangah ramtawi pai kut sungih a thleng thu zukneng in a theih tikah bawm dingin a kir sal. Hlat tuk lo nak hmun a thlen tikah kee kiak vek in a um aw ter. Ramtawi pa khal in zukneng a tlan thei nawn lo ah a ruat ih fei a keng ih a dawi. Zukneng khal cu ramtawi pa kha tupi sungah a hruai. Hla nawn an thlen tikah ramtawi pa ih hmuh thei nawn lo ding cin in a dang zin ihsin thli vek in zamrang zet in a rualpi cumkheng ih hnen ah a va kir sal. Zaal kha a kii thawn a lak ih tikhur kiangah a thlak.

          Cu tin ramsa ciocio khal pakhat le pakhat an bawm aw.