Keiti in Falanu

Keiti in Falanu

          Falanu le tlangvalpa hi an duh aw ngaingai i, nitin in hmunkhatah Lo feh tlangin an tlak aw ringring theu. Hmunkhatih hna an tuan tlang hi an nuam tukah nitlak hman hi an thei theu lo. Ani ni-in an duh aw sinsin. Nisa hman sa an ti lo. Cutin nuam lutukin an feh tlang theu.

          Nikhat cu ni a sa nawn. Khua a hlumih ti a hal rero thlang. Falanu cun tlangval pai hnenah cun “Ka ti a hal” a ti. Tlangval pa khal cun mai fala thil duh cu hawl suak a tum ve. Curuangah a falanu i hnen ah cun “Hi tikhur i tidai hi rak in aw hlah, tivapi i ta khi ka vung khai ding” a tiih tithawl thawn a feh. Tlangvalpa cu a va rei deuh ruangah falanu in a tihal a rak tuar thei nawn lo i an lo tikhur i “Keiti” a rak in. A in ngah veten minung thinlung nei nawn loin mikei ruahnak a nei ve. A mithmai khal cu a dang. A mit a sen. A taksa milai pian si hman sehla a ruahnak le a thinlung hmuahhmuah in mikei a si zo. A mah le amah khal a thei aw. Cutiih mikei ka cang zo ti a theih cun a um a nuam nawn lo. Khawruahhar ninghang le lungsia in a rak um.

          Tlangvalpa cu a tidai khai in a hungthleng. “Tidai in aw hen” a ti i a hun pek. Asinan “Ka duh lo” a ti. “Keiti na in si fawh maw?” a ti. Falanu cun “Ka in lo” a ti. Asinan a mitmen le a um tu dan tlangvalpa in a zoh tikah a hmuihmel kel a keng nawn lo ti cu fiangten a thei. Thlam ah kan va cawl hrih ding a tiih tlangvalpa cun a cawlhpi. Falanu cu a tha a bang. A thin a nuam lo sinsin. A tlangval a duh fawn si. Mikei a si zo kha a thei. A mitthli a luang thluahthlo. Tlangvalpa cun a hnem rero nan a hnem thei cuang lo. An thlam zautlang cun an khua a hi cuan i,

          “Kan run thang runglang,

          Thiamtial ka remnak,”

          “Kan sumtual rung lang,

          Valza ka pumnak”a ti i a tap zawk rero thlang.

          Tlangvalpa cun tlun a sawm rero nan a duh nawn lo. Khua ih va tlun ding cu a thinlungin a ngam nawn lo. Cutin sunvu ten tah aw phahin an um khawm hnu ah zanlam khua a sim in tlangvalpa cun “Tlung uh si” a tiih an tlung. Lam hla nawn an fehih an khua an thlen zik thlang cun falanu cu “Paw” a ti mikeiah a cangih a zuang hlo. Tlangvalpa cu a lungleng le umhar te thawn amah te innah a vung tlun ta.

          Falanu cun nitin in sakhi, a si lo le zukneng cawn a phunphunin an thlamah zingtin a rak ret theu. A nu le a pa cun cuti ih zingtin sa an ngah ringring ruangah an fanute mikei a can cu an ning a hang tuk lo. Asinan zingkhat cu milai cawn a rak ret. An khawpi pawl in falanu mikei ah a cangih milai a deh ti an theih cun kan that ding an ti. Curuangah a fala nu le pa cun tlangvalpa cu an thah a si le a lu na tuam i na funnak ah an ti i hnemrang puan an ken.

          An khawsenin an suak i sakhan cu an nam ciamman. Falanu cu tlangvalpai hmaiah a suak ngaingai. Tlangvalpa cun,

          “Tuu lut si ci maw, khan suak si ci maw

          Ka cangtial li sangah khai ta lang” a rak ti. Falanu khal cun,

          “Tu lut si hlang e, khan suak si hlang e,

          Na cangtial li sangah khai hlah law” a tiih fala ah a cangsal i sunvu ten hmunkhatah an um khat.

          An ngaiawk nak thu le hla cu an mithmai in an rel thlang. Zanlam khua a simin an suak khawm i “Zo tal in nan hmu maw?” tin an sut khawm aw. Tlangvalpa cun ka hmu nan ka kap thiam lo a ti san. A thaisun cu hual sal an tum thotho. Falanu i nu le pa cun tlangvalpa cu na hmuh le va kap mai aw an ti. Sakhan cu an hun nam sal. Falanu cu tlangval pai hmai thotho ah a suak. Tlangvalpa cun,

          “Tu lut si ci maw, khan suak si ci maw,

          Ka cangtial li sangah khai ta lang” a ti lala. Falanu cun,

          “Tulut si hlang e, khan suak si hlang e

          Na cantial li sangah khai hlah law” a  ti i sunvu ten an pawlaw lala.

          Kahding le a falanu a si fawn. Asinan ziangtilam hmanin hmunkhatah an um khawm thei nawn fawn lo ding. Milai thinlung an neih tawkah cun an ngaiawk nak le an duhawk nak cu simcawk a si lo. Zan lam khua a simin mitthil le canghnap thawn an then aw sal.

          An khawsenin an suakkhawm sal i “A hmu nan um maw?” tin an sut aw. Tlangvalpa cun “Ka hmu nan ka kap thiam lo” a ti lala. A thaisun cu hual an tum thotho. Ziangah ti le milai a deh zo ruangah midang tla  in deh pang ding ti an phang.  Fala nui nu le pa khal cun tlangvalpa cu “Va kap thlang aw, mikei le milai kan um khawm thei cuang lo ding” an ti. Tlangvalpa khal cu a pawk sal ve, Sakhan cu an vun nam i tlangval pai hmaiah a suak sal lala. Tlangvalpa cun,

          “Tu lut si ci maw, khan suak si ci maw,

          Ka cangtial li sangah khai ta lawn” a ti sal.

          Falanu khal cunn i that thlang ding ti a thei i,

          “Tu lut sing e, khan suak ding e,

          Na cangtail li sangah khai ko law” a ti i “Paw” tiah a tlangvalpa cu deh dingin a zawn ciamco. Tlangvalpa khal cu a rak ralrin ruangah a keu man hlanah a kahih falanu cu a thi. A hngawng a tan hnuah a puan ken mi cun a lu a fun i a pi le a pu a hun pek. Tlangvalpa cu a falanu a thih cun a umhar a lung a leng sinsin i a ruak zemnak hmunah nitin tah hla sakin a  feh ringring theu. Hi mi hi thuanthu roling cauk sungta kan run tarlang mi a si. Thu lai santhar nonawn pawl in kan pupa thuanthu thei tam hai seh ti duhsaknak thawn kan run tarlang mi a si.