Relsiat nak

Relsiat nak

          Mi pakhat cu zuk a suai ih a suai mi zuk cu mi in ziangtin an ti ding ti kha a thei paih zet. Cutikah bazaar hmun khatah zuk a suai mi cu a tar ih a par ah ca tlangkhat te a ngan.

          A ngan mi ca cu “Remcang lo nak nan hmuh le nan relsia thei” tin. Bazaar a ra kai tu minung pawl cu zuk suai mi an zoh ih a dang dang cio in an relsia.

          A theih mi zate cu a zaten sual nak lawnglawng a si pakhat hman a remcang lo… ti a si. Zuksuaitu pa khal a thin beidong zetin zuk suai mi cu a la ih inn ah a tlung.

          Inn a thlen tikah a pa a hmu ih thil cang mi zaten a sim thluh. A bei khal a dong zet.

          A pa in cu ruah nak a rak pek. “Ka fapa… a par ih na ca tlang kha thleng san aw…” a ti.

          Ziangtin a ngan ter ti le. “A rem cang lo nak a um a si le rem sal in suai bet uh”  tin a thulu kha a thleng ter.

          A thaizing a kim tikah zuk suai tu pa khal a pa ih a cah vekin zuk suai mi kha bazaar tlun ah a tar. A mak zet.

          Tui tum ahcun bazaar ih a feh mi mitinkim in zianghman an ttong lo. Zohman in zuk kha an sim sia lo. Zohman in khal zuk kha an suai bet lo… ti a si.

          Ziangahtile an mah cu mi pakhat ih tuah mi kha zoh ih relsiat ding lawng kha an thei.

          An Mah in cun tuah dingin thiam nak an neih lo ruangah a si.