Rome Khuapi ih Remdaihnak hrang Biaknak dangdang Tonkhawmnak ah Zumnak le Hminsinnak langternak an tuah. (21. 10. 2020)

               Pope Francis le leitlun biaknak dangdang hruaitu pawl cu kan dung tlawngkai nihnih (Tuesday) ni ah Rome khuapi ah an tongaw khawm ih thentheknak thawn a khatmi leilungpi ah remdaihnak le unau vek ih duhdawtnak a len thei nak dingin thlacamnak an nei. Cuih tonkhawmnak le thlacam tlangnak cu "Zo hman mahlawng rundam kan si lo. Remdaihnak le Unau sinak" timi thulu thawn an cuang ter.

            Tonkhawmnak ih remdaihnak hrang an thlacam netnak ah ral a tho rero lai mi ram le hremawknak le hmuhthiamawk lonak umnak hmun pawl a sangsang in an siar ih cuih ram le hmun pakhat cio hrangah phazawngden (meifar) an vang fingfing. Syria, Libya, Ukraine, Yemen le Afghanistan ram pawl hi hmaisa lam ah an lang. Sihmansehla, phazawngden a tamsawn cu zohman ih theihpi lo mi buainak pawl hrangah tlet a si. Cuvek buainak pawl cu thil thupi sawn dangdang buaipi ding a neih ruangah leilungpi khal in a ngaihven sak lo mi pawl an si.

            DRC Kivu sehvel ih raltho mi le Burkina Faso ram ih Khrihfa pawl hrem an tuarnak pawl siseh, India le Pakistan karlak le Korean peninsula ih ralrim siseh, Venezuela ram le Leanon ih harsatnak pawl siseh, a dang tampi khal thlacam khawmnak ah siarsak le thlacam sak thluh an si. Tui tum leitlun huap ih kan tuarmi pulhnat ih namnuainak thawn pehpar in hiti vek ih thlacam khawmnak an neih mi hi thil tha zet pakhat a si.

            Pope Francis le biaknak dangdang ih hruitu upa pawl Capitoline Tualrawn pi ih hmuh tlang hi mit a la tuk ih thinlung a ti danglam zet nasa.

Himi tonawk khawmnak ah biaknak dangdang ih hruaitu pawl in leitlun mi pawl hnenah: "leitlun mi pawl kan zaten innsang pakhat sungtel kan si thluh; tu ihsin thok in kan leilungpi hi remthat sal in tungding sal uh si! Minung in hmailamcaan kan neih lai a si ahcun tuih kan leilungpi hi tu ihsin thok in kan humhim le kan runsuak a tul" ti'n sawmnak le forhnak an nei fingfing.

https://bit.ly/3ms8GxZ