Archbishop Paul Grawng ih ruak vui nak caanserh ah Yangon Archbishop Cardinal Charles Bo ih thuthangtha sim mi. Oct 27.2020

archbishop_paul_grawngih_ruavuinak_caan_serh_ah_yangon_archbishop_cardinal_charles_bo_ih_sim_mi_thuthangtha_simmi.jpg

Archbishop Paul Grawng ih ruak vui nak caanserh ah Yangon Archbishop Cardinal Charles Bo ih thuthangtha sim mi. Oct 27.2020

            "Bishop Paul Grawng" thluasuah thawn a khat mi nunram cu mang in le lung awi thu sim nak, duhdawt zet mi Pathian ih fale pawl Kawl ram mipi pawl, tuiniah kanmah pawl cu thin nat nak thawn kan khawm awk vekin kan ngah nak thu cu kanmah pawl cu kawhhran piih fapa tha khal si, Kachin miphun khal si, ram fapa tha khal asimi Bishop Paul Grawng kha thlah dingah kan thleng ruangah a si. Thluasuah mang sal nak thu cu kan Pathian cu zangfah nak thawn kanmah hrangah tuu khal tha asimi Bishop Paul Grawng kha in pek ruangah a si. A hman. Bishop Paul Grawng cu Kachin miphun pawl hrangah, Catholic zumtu pawl hrangah, Kawl ram hrangih in pek mi thluasuah a si.

            Bishop vek midang suak sal dingah a cang thei nawn lo. Kanmah pawl tuini hitawk hmun ah an rak nak cu Bishop phum dingah asilo. Bishop sunloih dingah kan ra a si. Kan mitthli tlak a hmuh asile a lung a awi lo ding. Amah cu Kachin miphun khal, Catholic zumtu pawl khal, Kawlram mipi pawl khal duhdawt tu asi timi thuhla cu kan zaten in thei dingah a duh ding. A caan a kim le a siat ding. A taksa kan thlah nak, a duhdawt nak le a thinlung that nak cu kan lakah a nung ringring ding. Tui caan cu lungawi thusim nak ding caan khal a si. A hmaisabik ah a nu le pa pawl lungawi thu sim ding. A tha mi kung in rah tha a rah. Bishop Paul Grawng cu rah tha asiih hleiah a thabik mi rah khal a si. Pathian in a kawh tikah a tha zet mi dungthluntu St. Paul ih hmin thawn a ko. Bishop Paul Grawng cu Kachin miphun pawl hrang ahcun dungthluntu Paul a si. Cuihleiah kanmah pawl cu Pathian hnen lung awi thu kan sim ding. Pathian cu a mah hrangah zohthim tlak a si. Pathian in Bishop Paul cu lam a hmuh.

            Colombus Pathian rian tuan tu pawl Kawl ram ihsin an suak caan ah Bishop Paul Grawng cu kum 38 lawng asilai. Asinan amah cu a no zet mi Bishop pakhat sinakin Kachin ramthen ih Catholic Diocese cu sawm nak thazet a pe thei. Kum 50 sung a fim nak, a thiam nak thawn thil tha a lang ter nak in Bishop cu kawhhran kha a hngetkhoh ter. A remdai mi asinak in Diocese din nak hmun cu tampi bom nak a pe. Tui ni ah cun Myitkyina Catholic Diocese cu a cangvai ih hna a tuan rero tu Diocese pakhat an siih, neh hnu Diocese 2 hman a suak zo. Himi zaten cu a hmailam ihsin a hoha tu Bishop ih thinlung ruangah a si.

            Netabikih lungawi thu kan sim ding micu Bishop Paul Grawng a si. Amah ih zohthim tlak mi pawl ruangah lungawi thu kan sim ding. Amah cu farah zet in a suak ih tihnung zet mi ral buai nak karlakah a rak thanglian. Kachin miphun pawl ton mi harsat nak karlakah mi pitling ah a hong cang tu a si. Asinan Bishop Paul Grawng cu a remdai mi a um daan, a hngetkhoh mi zumnak pawl thawn minung pawl ih nun ram dai dingah a bawm. Amah ih a danglam mi asinak cu tangdor nak a si. Dai ten a um thiam nan a hngetkhoh mi a thinlung in amah cu harsat nak tampi sung ihsin Kachin ramthen ih a hmaisabik Siangbawi pawl lakah pakhat si ding ah a bawm. Bishop Paul Grawng cu a pitling ih hleiah mizaten duhdawt tu khal a si. A hmai ahcun nauhak hman tih nak an nei lo. Amah cu a hmuhmi mi zaten upat zetih a pehtlaih ruangah a mah thawn pehtlaih nak anei mi mitinkim in a duhdawt nak le lungawi nak cu thaten an thei. A duhdawt nak cu ngaithiam nak thawn remsal dingah a kul a fung lomi duhdawt nak a si. Amah ih a felfai mi umdaan, mitinkim upat zet ih a biak daan, a Diocese tang ih a um mi Siangbawi pawl par pai duhdawt nak a hmuh daan, a tuu run a kilhim nak tu khal tha si nak pawl ruangah mi tampi ih duhdawt nak a ngah tu khal a si.

            Kachin miphun thawn a pehpar mi zaten a duh tuk. Amah cu Kachin miphun a duh vekin Kachin ca, Kachin nunphung, Kachin rawl pawl khal a duh ih Kachin miphun miphun pakhat lawng a duh asilo, a dang miphun khal duhdawt nak hmuh dingah a kul a fung lo. Kawhhran ih ziang thu khalah siseh, zo thawn khal siseh, Pathian riantuan nak hmun ah thazet in pehtlai tu khal a si. Khristian zumtu khal siseh, Khristian asilo mi khal siseh a thinlung ah an um. A nunram ah zokhal thlei dang in pehtlai nak a nei lo. Bishop Paul Grawgn ih a danglam mi thuhla pakhat cu thil pakhat dang suak dingah a huam nak nei zet tu a si. Zingzoi zir duh nak thinlung nei ding khalah a kilkhawi thiam. A colh hnu hmanah kawhhran sung tuahmi thurelkhawm nak pawl, thu zir nak pawlah tlawngta pakhat vekin toin duhzet in a zir tu pakhat khal a si. Fim zir nak cu amah hrang thlarau lam lam zin pakhat kah a thlun tu vek a si. A thupi ih ret ringring tu a si.

            Amah cu Kachin miphun lawng siloin, Kawlram Catholic kawhhran le Asia Catholic kawhhran hrang ih hna a tuan ruangah a mai hnen lungawi thu sim ding a si. Amah cu Kawl ram Catholic Bishop pawlkom CBCM ah veihnih tiang president tiin tuanvo a neih vekin Asia Catholic Bishop pawl pawlkom FABC ih commission phunphun khalah hnatuan tu a si. Bishop Paul Grawng cu a harsa mi innsang ihsin a ra mi asinan a ngah mi hlawhtling nak cu mi dang pawl ngah dingah a ol lo. Amah cu Kachin miphun pawl ih thuanthu, Catholic kawhhran ih thuanthu, Kawl ram ih thuanthu khalah a tang ding mi a si. Amah cu mah ih san khal a din thei tu a si. Amah cu thinlung tha te thawn (Nunc Dimittis) tiin a au thei. Bawinu thawn amah thangthat nak hla kha a sak thei zo. A tu caan ihsin thokin miphun hmuahhmuah in thluasuah mi nu tiin in ko ding. Ziangruangahtile thil ti thei nak a nei tu Pathian cu ka hrangah thil tha a tuah zo. Bawipa cu tha cak pawl a namthlak ih hnon a tuar mi pawl a khai sang zo. Tui niah keimah cu ka zoh thim tlak mi, thlarau lam ih ka pa, ka raul pi tha lungawi thu sim dingah ka ra. Ka thinlung cu thinnat nak thawn  a khat nak a mah ka sunloih.

            Lashio Diocese cu (Apostolic Administartor) le (Prefect Apostolic) tiin rinlo piih hna ka tuan tikah Bishop Paul Grawng cu pa vekin i bawm. Ka saya tikhal sehla a sual lo ding. Hnaihnok nak ka ton caan ah a hnen ah ruah nak tha ka dil. A um caan ah tha in pek tikah ka thin a nuam. Amah ka sung cu a tam zet mi nat nak pakhat a si. Pathian hna ka tuan nak ih nunram ih ka ton mi pawl cu pahsuak thei dingah a thluasuah ka mang ringring ding. Amah cu zangfah nak thawn in pehtlai tu khal asi. A duhdawt nak khal phun tam zet in a lang ter thei. Keimah thawn daiten biak aw ding khalah a ra theu. Ka hnatuan mi pawl parah a lungawi tleu vekin a tul nak hmun khalah ruah nak in pe. Amah cu keimah kha hramhring umnak hmun ah in hruai tu tuu khal tha pakhat a si. Ka mang ringring ding a si. Amah thawn hna kan tuan caan pawl khal lungawi nak thawn ka mang ding.

            Bishop Paul Grawng cu leilung tlun ah a nun a cem zo nan kanmah pawlih tuu khal tu pakhat tiin in hruai ringring ding. Kachin miphun pawl, Catholic kawhhran pawl remdaih mi nunram le a thangso mi nunram nei thei dingah a mah cu Pathian hnen ah thla in cam sak ding. Amah thlah dingih a ra tu zaten hrangah a thinlung a nung ringring ding. A tu ahcun amah cu Mithianghlim pawl kiang ah tel a ngah zo ruangah Pathian in a tu vekin sim in a hmuak ding. "A tha. Hnen um tha le rinsan tlak hnen um na si. Malte parah rinsan tlak na si ruangah tampi kilkhawi tu ah ka lo tuah ding. Ra awla na bawipa lungawi nak ah ra tel ve aw" (Mt 25:23)

In duhdawt tu tuu khal tha cu kan thlah thlang pei.

            A liam zo mi tlawngkai ninga ah amah thawn netabik kan biak aw. Cumi caan ah Bishop Paul Grawng cu ziang hman a thei nawn lo. Asinan keimah cu phone sung ihsin amah kha minute 30 hrawng ka biak. Zianghman a thei lo ti ka thei na ka tong mi a thei ding. Bishop Paul Grawng cu a nun sungah thinlung tahwn ngai in duhdawt nak thawn lehrul tu a si ruangah ka tong mi pawl a thinlung ten a ngai ding ka zum. Keimah khal a duh dawt mi zaten hrang khalah tha zet in thla a cam sak ding. Thih nak cu kumkhua nunnak ih lamzin a si. Jesuh a zumtu zaten thih loin Khrist thawn kan thosal ding. Bishop Pawl Grawng cu a nunam ih colhhmun a thleng zo. A taan mi a tha mi ro thawn umin ni khat khat ah a mah thawn kan tong aw ding. Pathian hmai ih kan ton awk hlan ah cun mitthli thawn kan thlah ding. Kum khua a nung mi Pathian hmin, duhdawt nak thawn in run tu Bawi Jesuh thluasuah, tleu nak in pe tu thlarau thianghlim ih thil ti thei nak rinsan in kan lo dil. Amen.

https://bit.ly/3e1v9i9

           

Add new comment

2 + 2 =