Austria ram ih a cangmi Bawipa thi le sa ih mangbangza langnak pakhat

              Austria ram ih a cangmi Bawipa thi le sa ih mangbangza langnak pakhat

         Austria ram Tyrol ramthen ih um mi Seefelt timi khua ah Mithianghlim Oswald biakinn  pakhat aum. Hih Seefelt khua cu khua dang pawl thawn a nai aw zet ruangah cumi kiangkap ah sukso lo ding in le kilhim awk nak timi kha thupi zet in an ret ih cuihmun ah Oswald Milser  timi in kilhimawk nak hna anei tu pakhat kha tuanvo apek. Hipa cu khuadang kil tu asi ih  siangpahrang hauhruang hrang khal ah tuanvo a lak cih.  Curuangah a sinak pawl kha a suang awk ih hngal khal a hngal zet. A puarthau nak a sang sinsin ih a kut tang ralkap pawl a ko ih Mithianghlim Oswald biakinn ah an feh.  Missa raithawi nak an theh zik ah Milser cu Missa raithawi nak a tuah rero tu father pai hnen ah a feh ih kawhhranpi pawl hmai ah a ding ih pulpit par ih an ret mi sangreu kha a lak duh thu kha a ken mi namte saupi a phorh ih a dil. Sangreu a fate mi a ei a si le cu a si nak pawl a niam in a thei awk ruangah a tum mi a ei duh nak asi.Father pa cun a dil mi a pek lo le cu a that pang ding kha a thin phang ih mipi hmai ah a tih ruangah a pek. Milser cu lungkim zet in a kaa sung ah a ei theh veten  a din nak  a pal mi kha  a phel ih Milser a khuk tiang a pil , a kut kut hnih in pulpit kha a kai cih. A kaih nak neh kha tutiang a um lai.  Hivek thil a cang theh in Milser cu a lau tuk ih father pai hnen ah zangfah a dil ih a kaa sung ih sangreu kha an lak sak.  Milser a tlak nak leilung kha mal te a hak ruangah Milser cu a par ah a kai.  Biakinn ah aum ih Stams father pawl um nak ah a feh ih a hngal nak a puar thau nak pawl kha sual a thlah.  Cui hnu ah supawk nak, sual cawh kuan nak pawl a tuah ringring ih Pathian ih ngaihdam nak a co ngah asi.  Kum hnih a rei hnuah thih tha in a thi ngah.  Milser ih duhdan vek in a ruak kha biakinn luh nak kianngah an phum.

            Hi vek a can cu Good Friday kim hlan 1384 kum thianghlim tlawngkai Nili ni ah asi.  Milser an phum hnu ah amah in i hmuhsak ti mi kha father pa in a thei ih a kaa sung ih sangreu kha a laksak.  Cumi sangreu kha thi a khat theh kha a hmu ih sangreu kha Bawipa thi le sa asi tin zum nak a um. Mangbangza lang nak pakhat khal asi.  Hivek a can hnuah hih sangnung kha upat tihzah zet ih re ding in Zirl khua ih upa Weineck in Ngun ih tuah mi khuathai, cumi sangreu ret nak dingah a hlu.  Hmun dang ih kawhhranpi pawl khal in an ra biak ve. Kawhhranpi le Khawm zawh tu pawl an tam tuk ruangah biakinn sungah an tlem nawn lo.  Curuangah 1423kum ah siangpahrang Friedich in a tum zet mi biakinnpi kha 1472 kum ah a sak theh. Khawmzawh tu thing lo ih an um ringring kha a hmuh ruangah siangpahrang a pakhat nak Maxi Milian in biakinn kiang ah siangbawi pawl tlawng dingah a sak sak bet.  Cumi tlawng cu Agasian siangbawi pawl in an kil khawi cih.  Neh hnu cun cui inn cu Pathian thu zawh tu pawl riak nak inn ah acang.  Tyrol khua ih a pahnih nak siangpahrang  Ferdinand in Seefelt khua ih acang mi mangbangza sangnung thu khan a thinlung a lak tuk ruangah cumi biakinn ah cun pulpit thar a sak sak.  Hivek ih an sak khal ah Milser an phum nak hmun cu siat lo dingin a par in pakhatkhat in an khuh.  Cui hmun a zoh duh tu pawl kha ol sam zet ih hmuh thei ding in an tuah.  Milser ih a kaih nak pulpit neh kha tutiang a hlan vek in an hmu thei asi.  Curuangah cu mi kha siatsuah lo ding in a dang deuh ah pulpit thar an tuah.  Hih hmun ah mangbangza lang nak pakhat cu thisen ih a khat mi sangreu asi.  Cumi khal pulpit ah mitampi ih hmuh thei ding in an ret.

            1984kum ah mithianghlim Oswald biakinn kum 600 kim sangreu ih mangbangza lang nak puai kha ropi zet in an tuah asi. Hi mi thu cu Mr Jospeh (Lashio) ih ngan mi sungih sin kan run tarlang mi a si.