Catechism (Pathian Thu)

Ministry Hnatuannak le Minister Hnatuantu Pawl ih Thu

Tuitum cu Catholic Biaknak a hlei ce in Missa Raithawinak ih Ministry timi riantuannak le minister timi riantuantu kan then dan kan run rel ding. Kan Catholic Kawhhran sungah hin Ministry timi rian tuannak a phun phun kan nei. Cu mi sung ih sin kan Pathian biaknak lakih a sunglawi bik le a sang bik mi Missa raithawinak sung ih Ministry rian tuan nak le Minister timi rian tuan tu pawl kan then daan kan run sim fiang ding.

A hmaisabik ah kan theih tul mi ah Missa raithawinak timi cu Siangbawi ihsin tlun lam Minister pawl lawng ih tuah theih mi asi. Missa raithawinak sungih rian tuan nak Ministry a phun phun kan nei kan ti tikah mipi tel ih tuah mi Missa raithawinak kan ti mi asi. Himi mipi tel ih tuah mi Missa raithawinak sungah Minister dang dang le Ministry dang dang kan nei. Siangbawi ih sang tu ah Deacon, Deacon sang tu ah Acolyte, Acolyte sang tu ah Lector ti-in a sang sang tein Minister kan nei. Minister pawl khalin an maih rian tuan nak an ministry ih zil in hruk ding thuam dang dang an nei. Deacon ihsin tlun lam cu Major Order tiin kan ko ih Acolyte le Lector cu Minor Order tiin kan ko. Kan Kawl ram sung ah cun Siangbawi tuan ding pawl lawng hi Acolyte le Lector timi ministry hi tayavuin in pek an si theu. Asinain ni tlaknak lam ram pawl ah cun Siangbawi tlawngta lo khalin rinsan tlak zumtu an si cun Minor Order asi mi Acolyte le Lector Ministry pawl hi tayavuin in an co ko. Ram hrekkhat ahcun Deacon hman hi kumkhua Deacon tiin tayavuin in pek mi tla an um. Himi Ministry rian tuannak pawl hi Pathian biaknak ahleice in Missa raithawinak sungih rian thianghlim pawl an si. Rian tuan tu Minister pawl ih tuanvo pawl cu a tang lam vekin an si.

Deacon ih tuanvo cu Missa raithawinak ah thawinak tuah tu Siangbawi asilole Bishop kiangah um in a tul dan vek ih Biaktheng par tiangih bawm tu asi. Missa raithawinak sungih Gospel thuthangtha siar hi Deacon ih tuanvo asi. Siangbawi lole Bishop ih thu pek nak in Sermon khal a pe cih thei. Cule Deacon in Baptism le Thitumnak Sacrament pawl tayavuin in a pe thei. Mina pawl hnen ah Bawipa Thi le Sa pe thei tu khal asi.

Acolyte ih tuanvo cu Deacon um lo nak ah Missa raithawinak sungah thawinak hrangih a tul mi pawl tim tuah sak tu asi. Biaktheng par hman ding mi pawl tiang a mah ih timtuah sak asi. A tul asi ah cun Bawipa Thi le Sa zem khal a bawm. Raithawinak theh ah Biaktheng parih Sacred vessels kan timi thianghlim thilri pawl kholh sak tu le ret sak tu khal asi.

Lector ih tuanvo cu Pathian biaknak sungih Bible siar ding mi pawl tim tuah sak tu asi. Gospel thuthangtha ti lo cu Lector pawl ih siar ding asi. Biaknak sungih an siar hlanah siar ding mi pawl zoh fel cia ih thei thiam dingin an ruah fel cia a tul. Saam le ziangzongza thlacam pawl khal hla ih sak tu an um lo ahcun Lector ih tuanvo asi. A tlunih kan rel mi Minister riantuantu pawl hi Missa raithawinak ah pulpit parih hmun luah thei tu pawl an si.

A siar tu nan zate parah lungawinak tampi kan nei. Mi tla rak siar ve hai seh nan ti asile like, comment le share nak thawn in rak bawm cio dingin kan lo sawm asi. RVA in nan zaten nan kut kan lo kai asi.