Catholic kohhran mipi pakhat dinhmun in hi thuhla na thei maw?

Catholic kohhran mipi pakhat dinhmun in hi thuhla na thei maw?

          Hi thuhla pawl theih lo khal le a poi lo. Hi thuhla theih lo khalle rundamnak sunnak thuhla a um lo. Asinan, innsang neih hi Sacramentu pakhat a si ih vanthatnak zum in meisa sungih dawp a ngah lo. Innsang tha, mah siseh, mai nu le pa siseh, zumnak a rak bangaw lo mi mai Biaknak lam siseh man nei in thei thiam sak tu innsang hril dingah cun mah le mah sunsak awk ding a thupi. Lo vah sual le kumkhat, innsang hril sual le kumkhua tiin khal hlan pupa pawl in an rak sim.

          Tui san mino pawl lakah hmaisabik innsang cu a san, veihnihnak innsang lawng ah a taktak vek ah a cang riangri. Catholic kohhran mipi pawl hrangah kutsihnak cu thil ol ai a si lo. Upat a tul. Innsang hril dik nak Pathian ih lamhmuhnak cu Mithianghlim pawl ih bawmnak dil a tul. Cathollic pawl hrangah innsang lam dik ten hrilnak ah rinsan tlak mi Mithianghlim paziat an um na thei maw? Cangantu khal in a thei lo. A ngantu vekin a thei hrih lo tu pawl hrangah tumtah ih tarlang mi a si.

          Pitling in innsang nei thlang ding mi mipa, nunau pawl dinhmun in mai nunram kekarpi cu innsang neih hlan ah zinzoi ih hril cia a tul. Milai ih theihnak thawn a si le hril sual, palh a ol te. Innsang hawl tikah bawmnak dil dingah rinsan tlak zet mi Mithianghlim (3) an um. An mah pawl cu –

1. St. Andrew
2. St. Joseph
3. St. Paraskeva pawl an si.

1. St. Andrew

Mithianghlim Andrew cu Bawi Jesuih dungthluntu ah hmaisabik kawhnak rak ngah tu dungthluntu (2) sungin pakhat a si. A mah cu mi lainat thiam tu Mithianghlim tiah mi tampi in an thei. Nunram ih a fiang lo mi tikcu caan le tihphan caan pawl ah lam in hruaitu a si. A mah in a nau, Petru Bawi Jesuh h nen a thleng dingih a hruai vekin mi pakhat ih nunram ah a dik mi thubohcatnak tuah thei dingah in bawm.

          A mah cu a tlaitluang. St. Andrew ih puaini cu November thla ih netabik ni a si vekin November thla cu Nu Pawlpi ih kumkhat sung biakthawinak a cem caan khal a si. Curuangah a mah cu ‘thil tuah thok nak ih a cang ding mi petu’ ah khal an nemhnget. St. Andrew in nunau pawl innsang tha dik ten hrilnak ah bawmnak petu Mithianghlim ah an rinsan. Innsang hrilnak ah a bawmtu ih an nemhnget nak cu a hmin rori hman ah ‘manly’ (mipa tha) ti duhsan a si. A cang thei mi a dang hmin pakhat cu St. Andrew cu Bawi Jesuh ih Pawlpi ah hmaisabik ih Pope cangtu ding a rak hawl sak thei ruangah khal a si thei men. St. Andrew hi innsang hrilnak ah mi bawmtu tiih nemhnget a sinak cu kum tampi a rei zo. Europe nisuahnak lam ram pawl ah St. Andrew puai hlan nikhat a duh zaan cu duhdawtnak dik thawn duhtu ding hmu thei dingin thlacam zaan a si.

          An mah in ziang tikcu ah, ziangtin kutsih ding, zo thawn kutsih ding ti vek pawl an dil. Hlanlai ah an sannak thei dingah suan mi phayawngtaing cu tidai ret mi zalung sungah an fawr ter. A pot daan zoh in mai duh mi sungin a san an let tiah an sim. Asinan, tuisan ahcun November (21-29) tiang Novena an tuah.

1. St. Joseph

St. Joseph rinsan thei lo nak ziang thuhla hman a um lo. A mah cu Naute Jesuh kilkhawitu le duhnung zet mi lamhruaitu a si. St. Joseph cu kutsihnak Sacramentu la dingah tim a tuah rero tu pawl hrangah rualpi thabik pakhat khal a si. A mai innsang nunram ah hniksaknak, thusuhnak tampi le thinbangnak pawl a rak khat. Zumnak le Pathian ih thluasuah thawn a thabik in a rak nung. Sualnak ihsin a luattu pasal ah danglam zet ih hrilnak a ngah vekin St. Joseph in nunram cu nuam aw ten, thluasuah thawn a khat mi innsang si dingah ziang vekin nun khuasak a tul ti fiangten a thei. St. Joseph cu midik, mithianghlim Pathian ah zumnak ziangtin ret a tul thu thaten a thei. Pathian in kan nunram ah a dik mi cu tikcu la in a tuah thu khal thei tu a si. St. Joseph cu a nunram ah Pathian ih duhnak a zum vekin innsang hrilnak thawn pehpar mi ah St. Joseph hnenah ap aw. Pakhat khat thubohcatnak ah thubohcat mi a dik ih a tlaitluang. Thla ih hmaisabik tlawngkai nithum ni in thla (9) tiang upat a si le nunram kekar tlang tu dik tha ten na hril thei ding. Tlawngkai nithum ni tinten St. Joseph ni ah nemhnget a si. A mah rinsan in ap a si le nunram ih hnakruh neitu dik neih a theih ding.

1. St. Paraskeva

Hi Mithianghlim cu Latin tidaan a thlun tu nitlaknak lam ah mi theih mal zet mi, hnilh tuartu a si. A mah cu ziang hmuahhmuah bawm dingah a man cia. A mah in nunau tha tampi a thei. A mah in duhawk men lawng si loin Biaknak lam thawn mil aw in a tuah sak theu. Mipa pawl dinhmun in nunram kekar pi a tul thu a ah nan sim a sile a lo hnem ding. Tha a lo pe ding. A lo mangbang ter ding. A mah cu Mithianghlim martyr pakhat a si. Asinan, a tlangpi thu in a mah cu kutsihtu naute nu innsang nu ah kum reipi an rak thei sual.

          Innsang nu tling hawl rero tu mipa pawl a bawm theu tu St. Andrew cun innsang pa pawl a hawl rero tu nunau pawl a bawm theu. “Paraskeva” ih duhsan cu ‘tlawngkai ninga (lo le) timtuahnak’ ti a si. Mipa pakhat dinhmun in mai innsang lam thaten hril thei dingah St. Paraskeva ih bawmnak dil a si le ‘tlawngkai ninga ni in (9) sung thlacamnak, rawlulhnak tuah aw. Cui hnu ah Bawipai Thi le Sa sang aw. Zarh tin hrangah tuah daan kel pakhat khat hril cia aw. Curuangah Catholic kohhran mipi pakhat dinhmun in mai kawhnak cu innsang a si le a dik mi innsang hril thei dingah hi Mithianghlim (3) rinsan aw.

https://bit.ly/3H6nAUc