France Ram Faverney khua ih Bawipa thi le sa mangbangza lang nak

Pathian thu thangtha

France Ram Faverney khua ih Bawipa thi le sa mangbangza lang nak
A lang mi mangbangza pawl cu St. Benedict kiang ah kumzabi 8 ah St. Jude ih rak sak dah mi biakinn ah a cang asi. Cui biakinn cu Our Lady of The White biakinn tin an ko. Ziangahtile a nauhak mi Bawinu ih zuk kha cui biakinn ah a um ruangah asi. A thok ahcun hih hmun ah Sister pawl lawng an um nan kum 1132 ah Father pawl thawn an thleng awk sal. Kum 1600 a kim hlan ah kawhhran thangso nak kha lungkim ding tlak in a thangso lo. Father paruk le a bawmtu pahnih lawng an um. Cu mi kiangkap ih kawhhran dang pawl tla an um ruangah Puithiam pawl cu kum tin ten Penticost puai kha lawm in Missa raithawinak tla an tuah cih. Hih puai cangsuak thei ding in biakinn ih a leng lam ah biak nak hmun thiang pakhat tuah in an hmang asi.
Kum 1608 ah Penticost sunday ah kawhhranpi pawl tam pi an khawm. Cui zaan khua thim ih Biakinn sangka pawl an khar ih father pawl khal an cawl theh zo. Cui caan ah Biakinn sung ih pulpit par ah meisa pahnih an vang. A thaisun May 26 tlawngkai nikhat ni ah biakinn tuanvo nei tu Don Garnier cu biakinn sangkaa a ong tik ah biakinn sung hmuahhmuah cu meisa khu lawnglawng a hmu. A hleice in pulpit lam ah tamsawn in a hmu ih Father pawl um nak lam ah tlan in thu a theih ter. Father pawl khal zamrang zet in an ra. Meisa pawl karh lo ding in kan tuah rero lai ah Hudelot ti mi kum 15 hrawng Brother cu sangreu an ret nak Chali khuat kha do nak um lo in thli par ah dang ten a um kha a hmu.
Hih thu an thei in kiangkap ih um khawpi pawl Puithiam pawl le midang pawl rei lo teah an thleng khawm theh cih. Vesoul khua ih Capuchin Father pawl tla an ra zoh hai. Dang teih a um mi Chalice khuat kha an hmu ih khuk bil in an biak. A zum lo tu mitampi tla hih a danglam zet mi kha an zoh hai. Cui sun cu sun nihlawh le zaan lam tiang ziang hman kham nak um lo in an suak lut thei hai asi. May 27 tlawngkai nihnih zinglam ihsin kiangkap ih um Puithiam pawl an tong khawm hai aw ih cawl lo in thlengaw in Missa raithawi nak an tuah. Dangten aum mi (Chali) khuat cu danglam nak um lo in a mah pangai in a um ringring. Hivek ih a par ih dangten a um nak cu meisa tha ruang ah le pulpit ih thil zaten a kang theh ruangah asi. Dangten aum mi (Chalice) khuat an ret nak khal a kang theh. Kawhhranpi pawl in zamraang ten a thar tuah in a hlan an ret nak ah an ret sal. Cui sun cu Father Nicolas Aubry cu Nazi 10 hrawng Missa raithawi nak a tuah ih nitin dangten a um mi (Chalice) khuat kha nuam te ten a thar an tuah mi ret nak parah a tum. Zianghman do lo in dangten a um caan hi nazi 33 sung asi.
Hih thil a cang mi a hmu tu pawl le Bishop Ferdinandlerye in mipi pawl ih hmai ah father pawl khal tel in mi 54 in tetti si ding in lungkimpi nak ca an ngan. Cui Bishop cu hih tetti khan pawl ih lethmat an thut ih thla hnih cem ah hih mangbangza cu adik asi ti kha a nemhnget. Meisa kang ih a siat mi pawl ah pulpit ih cabuai thuam tel lo in a dang zaten a kang theh. Thir pawl khal meisa huham ah an tii theh. A sinan cu tluk ih a nasa mi huham a ngah nan sangreu ret nak (Chalice) khuat kha mangbang za in mal te a par ah a kai ih dangten zohman ih ban lo ding in meisa ih mal te a hleu nak ti lo cu nazi 33 sung aum. Hih (Chali) khuat thawn an ret tlang mi St.Agatha ih thilri pakhat, puan thaan pakhat le Pope pa ih a ong mi Indulgrnce cahnah pakhat hih thil pawl kha meisa in a siat lo. (Chalice) khuat sung ih sangreu pahnih kha a siat lo in an mah pangai in an um. Sangreu pakhat cu cui saan ih France ram ih khuapi din hmun ih um mi Dole khua ah thupi zet in an thawn. An thawn ni cu kum 1608 December thla ah asi.
France ram ih ramsung raldo nak ah nazi 33 sung dang ten a um mi (Chali) khuat cu asiat. Asung ih um mi sangreu pakhat cu tuanvo nei tu kawhhran pi pawl in caan khel in an ting man ih a thar an tuah mi (Chalice)khuat ah an ret sal asi. Hi mi thu cu Bawipai thi le sa langnak ti mi Mr Joseph (Lashio) ih ngan mi sungta kan run lo hlawm mi a si.

Add new comment

12 + 6 =