Julia kim le Bawipa Thi le sa thuhla (Part 1)

                    Julia kim le Bawipa Thi le sa thuhla (Part 1)

        Thlang Korea ram ih khuapi a si mi Seoul ihsin peng 300 a hlat mi Naju ti mi khua pakhat ah kum40 hrawng asi mi nauhak pali le innsang anei cia mi nu Julia kim ti mi cu  a pasal thawn a rei hlan te ah catholic kawhhran ah an lut.  Julia cu dam lo nak nat nak kha a tuar rero ih father pakhat in Julia kha tha a pek mi cu “ nat nak na tuar rero mi hi thluasuah pakhat asi” tin tha a pek.  Cui arei hlan ah Bawipa hriamhma a tuar mi pawl kha Julia hnen ah alang awk ih cumi atuar nak le a nat nak thawn tuar cih ding in a sim.  Julia in Bawinu ih zuk a nei ih cumi zuk in 1985 June,30 ah a mitthli a tlak.1986,June,29 ah Julia cu Rosary a cam rero lai ah cumi zuk in a mitthli a tlak ih thlahnih thlathum cu thisen mitthli a tlak ringring.Julia Bawinu hnen ih theih ter nak a ngah mi pawl cu thlacam nak, thlengawk nak, sualsir dingin ralrin nak a pek.

              1988,October,19 ah Bawinu Maria in leilungtlun ih a um mi father pawl hrang ah thlacam sak dingin  Julia kha a theih ter.  Bawinu cu bulpak ih hna a tuan tu father pawl hrang ih  a  zangfak mi cu relsiat nak, nautat nak an tuar ih luat nak nun an nei ruang ah a si tin a sim. 1987, May,10 ah cumi zuk in zaan nazi pahra ihsin zinglam nazi pariat tiang Julia le nunau dang pawl hmai ah a tap.  Cui zaan ah Julia cu natnak nasa zet a tuar.Bawinu in nui pum sung ih aum mi naute pawl an that tik ah cui nau te pawl tla kha cuvek in an tuar ve tin  a sim. 1987,June,30 ah Bawinu zuk ih mitthli a tlak a voihnih nak kum kim ah minung 300 hrawng an khawm awk lai ah Bawinu zuk cu nazi reipi a mitthli tlak.  Bawinu kha ziangah a mitthli a tlak timi kha Julia in asim hai mi cu Catholic mipi pawl kha Bawinu ih ralrin nak pek mi an thei khal le an zuam duh lo, an thleng awk duh lo, sualsir nak, rawl ulh thlacam tivek pawl tla kha tuah ding zat an tuah lo. Pope, Bishop le father pawl tla kha tihzah ding an thungai ding in a sim.  Bawinu thin har in a tap theu nak cu pawlpi ih a cang rero mi sual nak pawl ruang ah a si tin a sim. 

             Bawinu ih sim mi hreakkhat pawl cu leilungpi remdaih nak ding le misual pawl an sual an sir nak dingah Rosary cam uh, nau kham hnatuan  nak pawl ruangah minung nun nak pawl siat suah nak an tuar a cang thei tawk in nau thlak kha kham ding a si. Nau te tlak ter a tum tu nu le pa le that ding ih a bawm tu hrang ah thlacam sak ding  thlacam nak thawn sualsir uh.  Father pawl hrangah thlacam sak uh annih pawl cu ka duhdawt mi ka fapa pawl an si.  Satan pa in an par ah lamzin a phunphun in a bum lem a si that lo nak pawl tuah ding in a fial ciamco.  Pathian biak nak hmun ih sangkate pawl kha khar theh uh. Sualcawhkuan nak le thlacam nak thawn satan pa ih hnatuan nak pawl kha kan siat baltheh tul.  Innsang tin ah that lo nak pawl kha kan kham ding cutin innsang khal a hngetkhoh ding pakhat le pakhat duhdawt aw ten kan um ding.  Pa le fapa thiangthlarau thawn hmun khat ah kan um ding. Tangdor nak le thinlung hmunkhat ten nan ret pei, thiangfai lo pi in sual nak thawn a thiangfai zet mi Sangreu kha timtuah cia nak um lo in nan sang.  Curuangah ka fapa ih riatsiat nak hrangah nan sualsir uh  sual thlah uhla Bawipa thi le sa tlak zet in sang a thupi zia kha sim bet uh midang sual hawl lo ding a hman lo mi rel awk nak in thlarau tampi a sung ter thei a si.  1987, October, 19 ah Bawipa Jesu in Julia hnen ih a riatsiat nak tuarpi ve ding ih a dil mi a cohlang ruangah Julia cu a ngal cih cuvewten a taksa ah Bawipa Jesu taksa vek in thinglamtah par ih a tuar mi vek in a tuar ve.  A ke ah thisen a luang a kut tla kut hnih in tlawngkhen thawn khen mi neh a um.  Bawinu ih a sim mi pawl cu minung pawl in Pathian ih thinheng nak cu an tih zet.  Ka fapa/nu pawl an mai a tha lo mi an tuah nak in Pathian ih thinheng nak kha an suah ter.  Vancung ihsin meivam kha leipar ah a thlak lo nak ding ah thla ka lo cam sak ringring hai.  Ziangahtile cumi pawl kha that lo nak sungah an pil ruang ah asi.  An mah pawl ruangah harsat nak pawl ka tuar a si. Leilungpi hi siat ral nak lamzin a pan rero.  Satan pa in hih cantha hi hmang ding in a tim a tuah awk rero lai. Hi thu hi Bawipa thi le sa Sacramentu ih mangbangza langnak ti mi Mr Joseph (Lashio) ih ngan mi sungta kan run leh mi a si.