Naute Baptisma Peknak Thu (Infant Baptism)

                                  Ziangruangah naute pawl Baptism kan pek? Bible in ziang a ti?

Ziangruangah naute pawl Baptism kan pek timi kan rel hlan ah Baptism thawn pehpar in Jesuh Khrih a mah rori in ziang a tong timi kan zoh ta pei.

Jn 3:5 sungah Jesuh Khrih in “Zokhal Tidai le Thlarau ih hrinsal a si lo ah cun Pathian Uknak a hmu thei lo ding” a ti. Curuangah Pathian uknak hmu thei ding cun tidai le Thlarau ih hrinsal mi si teng teng a tul.Mk 16:15-16 sungah cun “Leilung khuazakip ah va feh uh la mi hmuahhmuah hnen ah Thuthqangtha va sim uh. Zokhal a zum ih Baptism a co ah cun rundam a si ding” a ti. Kan ralrin dingah himi Bible bungcang ih ti duh mi cu rundam si dingah zumnak lawng a tawk lo ih Baptism co le san a tul teng teng ti nak a si. A zumtu pawl lawng (curuangah naute pawl Baptism pek lo ding) Baptism pek ding a ti duh mi a si lo.

Mt 28:19-20 sung kan zoh a si le a fiang sin sin. Jesuh in, “Feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. Cule ka thupekmi hmuahhmuah thlun dingin va zirh uh,” a ti. Baptism hnu ah zirh nak a ra bet.A thun ih Jesuh Khrih ih tongkam pawl kan zoh tikah naute pawl Baptism pek ding le pek lo ding thu a tel lo. Asinan, Pathian uknak hmu ding ah le rundam si dingah cun Baptism cu lo theilo ih a tul zia kan hmu.

Nau te pawl Baptism pek ding thu khuitawk Bible bungcang hman ah fiang zet ih kan hmuh thei lo vek in, naute Baptism pek hi a dik lo ruangah pek lo ding timi thu khal khuitawk Bible bungcang hman ah fiang tein kan hmu thei cuang lo.Sihmansehla, Household Baptism timi innsungsang in a burih Baptism co thu cu a tanglam ih Bible bungcang pawl sungah fiang zet in kan hmu thei: Tirhthlah 10:24-48 ah Cornelius te innsungsang: Tirhthlah 16:15 ah Lydia te innsungsang: Tirhthlah 16:33 ah Philipi khua ih thawnginn kiltu pa te ih inndungsang; I Kor 1:16 ah Stephanas te innsungsang.

A tlun ih kan simmi innsungsang pawl ah hin naute pawl an tel maw tel lo timi fiang te in kan sim thei lo nan, an tel lo ding cu zum a um deuh. Asinan, himi innsungsang ih Baptism co thu sirhsan ih Pawlpi in naute pawl Baptisma pek mi a si lo. Naute pawl Baptism kan peknak a ruangbik cu Baptism in ziang thathnemnak a suah ter timi Baptism ih effects kan pom nak ruang ah a si. Baptism ih a suah ter mi thathnemnak pawl cu:

1) Sual hrampi (Adam le Eve ih sualnak) ih sin kholhfainak (Upa hrangah cun mai sualnak khal a tel);

2) Pathian fate cannak;

3) Vancungram roco tu si nak;

4) Kawhhran sungtel sinak. Indelible character timi a hlo thei lo mi Pathian ta kan si timi tacik hi Baptism in in pek asi.

A tlun ih kan dimmi thathnemnak pawl hi kan thlarau hrangih thli thupi, thil sunglawi le thil tul mi pawl an si. Kan fahniang pawl in zumnak an nei hrih lo pi, zianghman an dil thiam hrih lo pi, ti’n an thlarau hrangih tul mi thathnemnak pawl hi pe lo in maw kan um mai ding? An ruangpum hrangih a tul mi hmuah in dil lo hmanah hnawi kan fawh, rawl kan pek, hnipuan kan hruk ter a si lo maw? An thlarau hrangih a tul mi khal kan mah nu le pa pawl in silkhah sak dingah a mawi na ti ve lo maw?

Pawlpi ih zirhnak CCC timi (Catechism of the Catholic Church) zirhnak cauk no. 1250 sung kan zoh a si le Pawlpi in siseh Nu le Pa in siseh naute pawl an suah pek ah baptism kan pek loh li lo asile nau te pawl hi an thlarau hrang ih a tul mi that nem nak pawl ngah ter lo kan cang ih kan daithlang asi. Culawng si loin, Baptism hi thukam hlun san ih circumcision timi vunzim tannak thawn pehtlaihnak an nei asi. Gen. 17: 13, Pathian in Abraham thawn thukamnak a rak tuah tikah a cuih thukanak ih hminsinnak (sign) ah a miphun mipa pawl hmuahhmuah (naute khal ni 8 an kim ni ah) vunzim tam ding ah a rak fial. Curuangah vunzim tannak in thukamnak sungtel sinak a rak lang ter. Jesuh Khrih a rat hnu thukam thar san ah cun, thukam thar ih hminsinnak cu tidai le thlarau ih hrinsalnak timi Baptism hi a si. Curuangah, thukamthar sungtel si dingah Baptism a tul.

Cuti a si le, Kan fate pawl hi thukam thar sungtel si kan siang maw siang lo ti cu kanmah teih ruah ding a si mai. Naute Baptism pek thu hi kum zabi 2 lam in Pawlpi sungah zalen tak in an rak hmannak thu khal (Fathers of the Church – hmai sa bik ih zum tu Pi le Pu) Pawlpi thuanthu cauk tampi sungah kan hmu thei. A.D. 1500 hnu lawng ah naute Baptism peknak a dodal tu an rak suak thok mi a si. Cu hlan liangluang hi naute Baptism cu Pawlpi ih a rak pom le hman ring ring mi asi. Tuni tiang khalah kan hmang lai.

Tui sun tuini ah Leitlun huap ih kan zoh asi le Christian zumtu lakah Catholic, Orthodox, Anglican, Lutheran, Presbyterian le Methodist timi Kawhhran picang pawl hnen ah naute Baptism peknak hi kan pom ih kan hmang asi. Naute Baptism peknak thawn pehpar in, in hrawm ve, midang hrawm ve na duh asile himi tang ah hin comment na pek thei asi. Himi kan rel mi hi a famkim lo nak tampi a um ding ih famkim deuh dingin bet ding a um asile comment ah in bet sak ding in kan lo sawm.

 

 

 

 

 

 

 

 

Add new comment

1 + 18 =