Pasca Puaipi tuah hlan a thianghlim mi nithum ti mi cu April 17, 2019

Pasca Puaipi tuah hlan a thianghlim mi nithum ti mi cu

April 17, 2019

          Nu Pawlpi ih biakthawinak thawn pehpar mi caanserh pawl cu nunphung caanserh a si lo. Cu hnak ih a sang mi nunphung khal tleunak a petu Biaknak lam biakthawinak ih cam mi a si.

          Biakthawinak caanserh pakhat khat tuah hlan ah thlarau lam thawn pehpar mi timtuah nak an tuah theu. Cui timtuahnak pawl cu sualthlahnak, mai taksa, thinlung, ruah nak dai ter dingah tikcu malte lak ih timtuahnak pawl an si. Cu mi pawl sungin nikua sung Novena thawn timtuahnak cu mi tempi ih theih a si ih a tel tu khal an tampi.

          Ziangah tile nikua sung timtuah hnu ah cui a thupi zet mi puai tuah nak ruangah timtuah cia in a um tiin a ruat. Pasca Puaipi ni tuah dingah khal Nu Pawlpi in Vua tikcu caan Zarh ruk nemhnget in tim a rak tuah zo. A tui thianghlim Zarh cu Pasca hlan timtuahnak ih netabik lam a si. Cui netabik timtuah dingah “Triduum” ‘Pasca puai hrangah nithum sung timtuah sal nak’ tiin nemhnget ih timtuah dingah a forhfial.

          Hi Pasca puai hrangah nithum sung timtuahnak ah ziang vek timtuahnak pawl tuah a si theu ti hi Catholic ohhranpi tampi in an thei lo ih an sut rero theu Pasca puai hrangah nithum sung caan nate ih timtuah sal nak tikcu tawi

Hi tikcu caan tawi te cu ‘Triduum’ tiih kawh a si. Hi mi cu Latin tong a si ih a ti can cu “nithum sung” ti nak a si. Ziang vek in ‘nithum sung’ timtuah ih tuah mi caanserh  a ti duh san a si. Hi tikcu caan tawi te cu “thianghlim tlawngkai nili ni” in a thok ih Pasca zarhpi ni ah a cem.

            A cekci ih sim a si le ‘Triduum’ tikcu caan cu ‘thianghlim tlawngkai nili ni” zaanlam ihsin thok in ‘thianghlim tlawngkai ninga ni, thianghlim zarh te ni le Pasca Zarhpi ni” tiang a si.

Kumtin Pasca puai hrangah nithum sung timtuah mi tikcu caan tawite cu “Paschal Triduum” tiin an ko.‘Paschal’ ti mi cu ‘Easter’ a khihhmuhnak a si. ‘Paschal’ ti mi ih a hmaisabik tongfang cu Greek cafang ‘pascha’ a si ih cu mi khal Hebru tong ‘pesach’ ihsin suak mi a si. Hi cafang ih thuanthu vun ruah sal a si le Israel miphun pawl Egypt miphun pawl ih sal an si nak in siseh, thihnak horkuam a si mi tipisen le Egypt pawl ih ralkap lak in siseh, tnelrawn ramcar ah rilrawng, tihaal, tihnungza phunzakap lak ihsin siseh, miphun pakhat lawng ti a si ko nain ziang vek nunphung, Biaknak lam thlun mi daan a um lo mi miphun ihsin siseh, Siangpahrang hauhruang le ram um lo mi miphun ihsin siseh, Pathian ih kam mi ram ih luh thei nak, cu vek in Bawi Jesuh cu harsat tuarnak, thih nak le thawhsalnak in neh nak cu ‘lannak, luatnak’ Pasca thuthuk pawl an si.

Thianghlim tlawngkai nilini ih thuanthu

          Tlawngkai nili ni zaanla ah Catholic diocese pi cu Bawi Jesuh in harsat a tuar nak lamzin a zawh hlan ah a dungthluntu pawl thawn zaanriah ei nak tuah mi Missa sumnak tuah a si theu. Pasca zaanriah ei puai cu Jew miphun pawl hrangah kumkhat veikhat, tuah tengteng tul mi biaknak lam tuanvo pakhat a si. Bawi Jesuh ih hi zaanriah ei puai cu minung si nak a lak mi nunram ah netabik zaanriah ei puai a si. Ziangahtile hi zaanriah ei puai theh hnu ih kaih a tuar thlang ding ruangah a si. Netabik zaanriah ei puai khal ‘Bawipai Thi le Sa Sacramentu a din nak’ tiih kawh a si theu.

          Ziangahtile Bawi Jesuh in a mai thawm huham tum zet mi a thu pek in Sang le Sabitti cu a Thi le Sa ah a rak thleng ter. Hi netabik zaanriah ei puai ih Missa sumnak caanserh hotu Puithiam in Bawi Jesuh in a dungthluntu pawl an ke a rak kholh sak nak man sal nak ah ke kholh nak tuah a si theu.Hi caanserh telh nak thawngin Bawi Jesuih a rak cah mi ‘Nan saya le na Bawi ka si ko nain nan ke ka kholh ah cun nan nih khal pakhat le pakhat nan ke kholh sak aw uh’ ti mi thuzirhnak man sal nak ah a si.

        Thianghlim tlawngkai nili ni cu “Maundy Thursday” tiin khal an ko. “Maundy” ti mi cafang cu Latin tong ‘mandatum’ ih suak mi a si. Ti duh san cu ‘thupeknak’ ti a si. Ziangahtile cui ni ah Bawi Jesuh in “Nan hnenah thukham thar ka lo pek; Kei mah in ka lo duhdawt vek in pakhat le pakhat va duhdaw aw ve uh” tiin thukham thar a rak pek.Thianghlim tlawngkai nili ni cu Nu Pawlpi ih ni ropi ni a si maw?

          Thianghlim tlawngkai nili ni cu Nu Pawlpi ih ni ropi ni a si lo. Ti duh san cu cui Missa raithawinak ah tel lo theih lo mi a si lo. Asinain, a famkim mi Indulgencia a ngah duh tu pawl hrangah cun sumnak tuah sak a tul. Asinain, Catholic kohhranpi tampi in thuhla tampi ruangah an tel duh tla a si men ding. Tahthimnak ah hnatuan lam, innsungsang, cohlan mi caanserh pawl, harhdamnak ruangah, thuhla a phun phun ruangah a si.Thu ngaingai ah cun hi Missa sumnak cu thlarau lam ih a muril famkim in a thupi mi thil pawl a si lo ah cun Missa sumnak ah tel a tul.

Hi thuthang cu CNA thuthang ih kan don mi a si.

https://bit.ly/3fmXTVm