Sacramentu thu (Sual thlah nak)

Ziangruangah Catholic zumtu pawl in Pathian hnen direct phuang men lo ih Siangbawi hnen ah sual an thlah? Pathian in kan sual kan sir ti, in theih cun a tawk ko lo maw?
Ziangruangah Siangbawi hnenah sual kan thlah timi a olbik zawng le a tawi zawngih kan sim ding a si ahcun Pathian duhzawng a siruangah kan ticih mai ding. Jeim 5:16 sungah a Cathianghlimthawng in Pathian in khat le khathnen ah sualphuang ding in in fial. Cathianghlim in Pathianhnen lawngah na sualnak direct in phuang aw a ti lo; khat le khat hnen ah phuang uh a ti sawn a si.
Mt 9:6 sungah Jesuh in lei parih sual ngaidam theinak huham a hnenih pek a sizia in sim. Cun Mt 9:8 lam kansiar bet a sile Cathianghlim in acuih sual ngaidam theinak huham cu milai pawl (men - milai 1 lawngsi lo) hnen khalih pek a si zia in simfiang bet.
Jn 20:21-23 sungah Jesuh Khrih a thawhsal zaanih a Dungthluntu (Apostles) pawl hnenih hmaisabik a simmi cu ziang a si? 'Nan hnenah daihnak um seh law. Ka Pa ih i thlahvek in nannih khal ka lo thlah ve' a ti a si. A Pa in ziangtin Jesuh Khrih a thlah ti kan zoh tikah, Mt 9 sungih kan hmuh vek in lei parih sual ngaidam theinak huham thawn a thlah mi a si.
Cuti a sile, Jesuh Khrih in a Pa ih a thlah vek in a Dungthluntu pawl a thlah tikah ziang vek huham thawn sipei a thlah? Lei parih sual ngaidam theinak huham hiamhiam thawn a si. Cun, cuih huham an ngah taktak maw taktak lo ti hliah kan duh a sile cang 22-23 kan siar bet thei: Cutiih a tong hnuah an parah a thaw a thawt ih, "Tlarau Thianghlim rak co uh! Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding" tiah a ti.
Ziangruangah sipei Jesuh Khrih in a Dungthluntu pawl hnenah lei par ih sual thlahsak (ngaidam) theinak le sual hren (ngaidam lo) theinak huham a pek? Himi in a tuu pawl in a Dungthluntu pawl hnenih sual phuan ding a `ul zia a khihhmuh (langter) a si lo maw? A Dungthluntu pawl khal in an hnenih sual an phuan lo ahcun ziangtin so mi sualnak cu an thlah sak, an hren sak thei ding? Cun, Jesuh Khrih in lei par ih sualthlah sak le hren sak theinak huham cu nehhnu san tiang daih si lo in a Dungthluntu pawl hnen lawngih pek a duh mi teh a sipei maw? Cutin sisehla teh, a tuah a Dungthluntu pawl le lei par ah an um nawn si lo; tulai san minung pawl teh kan sualnak pawl thlah sak maw hren sak kan si ti hi ziangtin so kan theih thei ding? Himi thu pawl hi thuk deuh in na ruat dah maw?
Bible cun, khat le khat hnenih sual phuang dingah in zirh a si. Culawng siloin, Pathian in lei par ih sual ngaidam theinak huham milai hnenih a pek thu khal in sim. Jesuh Khrih khal in lei par ah sualngaidamnak pe ding in a Dungthluntu pawl a thlah a si. Curuangah, Catholic zumtu pawl in Siangbawi hnenih sual kanthlah (phuan) hi Jesuh Khrih duhzawng kan thlun ruangah a si ti'n kan pom. Kan Bawipa in Siangbawi pawl hmangin kan sual in thlahsak mi a si; huham petu taktak cu amah Pathian a si. Sihmansehla, a cuih huham cu Siangbawi pawl ih ministry rian thawngin a hmang a si.