Sangreu ih huham le Bawinu ih bawm nak le kilhim nak nak thu

Sangreu ih huham le Bawinu ih bawm nak le kilhim nak nak thu
Constantinople khua ih biak nak lam ih tuanvo nei tu Mennas ti mi cu catholic biak nak ih hruai tu din hmun ih tuanvo a lak lai hrawng ah Constantinople khua ih an hman theu mi didan pawl sangreu pawl an zem theh hnu ah a tang lai mi sangreu pawl kha tlawng inn ihsin a ra tlung tu nauhak pawl kha an pek theu. Hih a danglam mi thuhla pawl kha Tours khua ih St.Gregory kum 595 ah rak ngan in a tanta mi asi. Hih thuhla pawl a taktak in ara cang ngai pei maw ti mi ringhngelh nak thinlung thawn aruat tu pawl hrangah Evagrius ti mi san thuanthu lam ih thiam nal pakhat cu thuhla pawl a hman mi asi kha tetti a khan. Nikhat ah nauhak pawl hi vek in sangreu kha an ei an inn ih an tlung theh hnu ah Juu miphun pawl ih fapa pakhat tla a tel. Cui nauhak ih pa cu thlalang suangnak pawl in kuai thei mi thilri pawl tuah ih zuar tu asi. A fapa tlawng a tum tlai ruangah a tlai nak san kha asut ih a fapa in thil a cang mi pawl dik ten a sim tik ah a pa Juu miphun cu a thinheng ih thlalang an an suang nak meisa kha a ong ih a fapa cu a thlak. A fapa a hmu lo tu a nu cun hawl phah in a ko rero meisa sung in a fapa in a phi pek nak thawm a tuah. A nu cun thlalang suang nak kha a ong cih ih meisa ih a lai ah a fapa a hmu ih a leng ah a suah ih thuhla a sut ih a fapa a coffe yawng hnipuan a hru tu Nunau pakhat a ra ih ka kiang ih meisa pawl kha hmit ding in tidai a tawih sak thu le ei ding mi pawl a pek thu mangbangza thu pawl kha asim. Hih thuhla pawl a thei tu catholic siangpahrang Justinian cu nauhak le a nu kha puithiam pakhat hnen ah a ap ih Baptism tla a pek. Hih thil cang mi pawl ka zum lo rori tin a el tu a pa Juu miphun cu mithah nak thawn thinglamtah par ah an thlai ih an that.Cui caan ihsin thok in cui nauhak cu cui khua ih a um mi St. Mary biakinn ah a feh ih sangreu kha a sang thei thlang. Hi ti vek a feh ih ni nikhat cu biakinn sung ih hmun pakhat ah Bawinu ih zuk kha a hmu ih a mangbang tuk. Ziangahti le cui zuk cu a hmuh dah mi meisa sung ih a bawmtu Nunau a si kha a sim lala.
Hi hmun ah ruah ding mi pahnih a um. Pakhat cu cui nauhak pa kha sangreu a ei ruangah sangreu ih huham ruang ah him ten aum. A dang a thupi mi pakhat cu Bawinu in cui nauhak pa kha meisa sung ah a kilkhawi nak kha asi. Bawinu cu puithiam pawl kha thianghlim ten a um ter duh. A sinan satan pa ih hnaihnok nak pawl an tuar thei lo ih a sung an pek ih sual nak sung ah an tla. Hih thuhla thawn peh par aw in Calcutta ih Mother Teresa in a nun lai ah a thianghlim mi puithiam pawl an tam vivo thei nak ding ah khawhhranpi pawl kha thla a rak cam ter. Cu hlei ah Bawinu khal in Puithiam pawl kha a bawm nak an ngan thei nak dingnah a hnen ih thlacam ding in le Rosary an cam lo ruang ah Pathian thawn an hlat aw ih Fatima Bawinu biakinn ah Bawinu ih puithiam pawl tin dang ten pawlkom an then ter ih cu mi pawlkom kha a mah rori in a hoha ih Father Gopi kha tuanvo a pek. Hih pawlkom ih hnatuan nak ah catholic kawhhran ih a thanso nak hmuahhmuah kha Bawinu ih bawm nak thawn tuah ding in asi.Hih father Gopi cu rei lo te rei lo te ah tuah ding mi pawl sim in lam hmuh nak a rak pek. Hih father pa hnen ah Bawinu in voikhat a sim dah mi cu “ kei cu scrament ih nu ka si” tin a sim. Hi vek ih asim mi cu an ruat sal tik ah pathian in leilung semsuah thok ah Adam le Eva sual nal sung ih tla ding ih a bum tu satan pa asi mi rulpi a camsiat mi kha na luu cu a lo subeek ding ih nang in na kedil na cuk ding tin ati. Pathian cu a khuakhan nak pawl cu a hlan in a ruat cia ih a tuah. Cumi a khuakhan nak pawl lak in a fapa neihsun Jesu kha Bawinu Maria hmang in thiangthlarau ih huham in asuak. Fapa Jesu cu a nui pum sung a um lai ah Bawinu ih thi le sa ruangah minung ah a cang si lo maw. Curuangah awinu ih a langter zo vek in Jesu ih taksa le thisen a si mi sangreu ih nu cu Bawinu a si kha zohman in a el thei lo asi. Hi mi thu cu Lashio U Joseph ih ngan mi sungin kan run lo hlawm mi a si.