Sungkua pawlkom nak

Sungkua pawlkom nak
Nikhat ah thintawi thei zet mi nupi nu pakhat cu bazaar ih a tlun lamah a hmuh dah lo mi mipakhat thawn rinlopin an pah aw. Cu nu cun zamrang zet in “Oh… in ngai thiam aw” a ti. A pah mipa khalin keimah khal thudang ka rak ruatih hokhaw. Ka u na ra ka hmu loih hokhaw tu vek a can keimah khal i ngai thiam aw a ti. Cutin an pahnih cu tlaitluang zetin ngaithiam an dil aw taih an feh san aw.
Cui zaanlam ah cu nu cu zaanriah hrang rawl a suangih a tawlrel riro laiah a fapa cu a kiangah cun daiten a ra ding. Cun a nu cu dunglam a ra hoi tikah a dungih a ding mi a fapa cu a pah ngahih a fa pa keng mi a pakaan cu a thlakih an kuai thluh. Cutik ah a nu cu a thinheng sup thei loin a fapa cu a thinheng mithmai thawn hinah in tlan aw a tiih a fapa cu a dawi. Ruahlopi a nuih a rak kawk tikah a fapa cu thin nuam lo takin Coka in cu a suak. A nu in cu ka fapa naatuk in ka kawk ngah tikhal a thei awlo. Cun a fapa cu zaanriah khal ei lo in tuanten a it. Zaanriah ei caan a rungkim tiklawngah ka fapate zaanriah ei lo in tuanten a it ti kha a thei. Culawngah a nih cun naatuk in ka kawk ngah ruangah ka fapa a thinnuam lo ti kha a thei suak.
A nih khal thinnuam lo tuk in tuanten a it. Asinan ziangti ziangti khalin a it that thei lo. Cu caan ah a nih in bazaar in a thlun ih pakhat pa thawn an pahawk ih thaten ngaithiam an dil aw ih an fehsan awk thu kha a vun mang ih thu pakhat a ruat. Kei cu mikhual thawn kan biakawk tikah ziaza mawi ten ka biak ih ka duhdawt zet mi ka sungsuak fa thawn kan biakawk tikah ziangruangah hringhro in ka biak.
Cu nu cu thinnuam lo phah in a thuruah tamphah in a it that. Cui caan ah mang lam vekvek in mipakhat in cu nu cu a ra sim vekin a hna in aw pakhat a thei. Cokaa sangkaa kiang kha va zoh aw. Sangkaa kiangah pangpar pawl a tla mi na hmu ding. Cu pangpar pawl cu ka fanu nangmah lo pe dingah na fapa a mah rori a rak ttawh mi a si. Ka fanu cui pangpar pawl cu na duh mi a pia yawng (APawl) pangpar pawl an si. A lo mangbang ter duh ruangah na dungah a thup te a dinnak asi. A thinlung ih a ruah nak pawl veikhat hman na theihthiam sak dah lo si lo maw? a tiih aw cu a hlo cu veten a nih khal a hung thang. Cu veten a thinnuam lo tuk ih a biang par ah a mitthli cu a luang.
Cu theh in a fapa ih khaan sungah cun dimten a va lut ih a itkhun kiangah a khuk a bil. Tho aw ka fapa “Hi pangpar pawl cu na nu keimah hrang ih na toh mi a si maw?” tin a fapa cu a sut. A fapa in “Hi pangpar pawl cu khi tawk kiangah ka hmu” ka nu. Pangpar pawl cu ka nu nangmah vekin a mawi tukih ka toh mi a si ka nu. Ka nu nang cu a piayawng pangpar pawl na duh ding ti ka thei ih cunah” tin a fapa in a ti. A fapa tong mi a theih tikah “Ka fapa… na nu tuisun vek in na par ih ka tuah sualmi pawl hmuahhmuah ah in ngai thiam hram aw” a ti. “Ka fapa khavek in ka lo kawk lo ding a sinan” a ti tikah a fapa in a ngah ko ka nu. Ka nu ka lo duh tuk. Ka fapa kei tla ka lo duhtik a ti. Cutheh in ka fapa “In toh sak mi hi a piayawng pangpar te tla ka duh tuk maw” tin a fapa cu a sim.
Hi thuanthu ih in zirh mi cu kan nih pawl cu kan thei lo mi minung pawl hnen ah cun ziaza tha le awkaa thlum ten kan biak thiam nan kan mah kan duhdawt mi pawl hnenah cun awkaa hro in mi kan biak ngah pang theu ti kha in khihhmuh duh san nak asi. Curuangah kan duhdawt mi pawl thawn kan biak awk tikah awkaa mawi le thlumte thawn kan biak awk nak in kan innsungsang pawlkom dan thadeuh in remsal dingah kan zuam cio pei tiah ka sim duh asi. Hi mi thu hi Sapyimyodawt sungah kan run lo hlawm mi a si.