A thi zo mi pawl hrangih thlacam nak ni (All Souls day) November 2

A thi zo mi pawl hrangih thlacam nak ni (All Souls day) November 2

          Tuisun cu kan zaten hell ram te ih a um mi thlarau pawl zaten vunmang sal in kan upat nak ni a si. Hell ram te kan ti mi cu sual nak fate thawn a thi tu pawl (lole) an mai sual nak hrangah sual cawhkuan nak a tuah hrih lo mi pawl kha Paradizu (vancungram) thlen hlan ih um nak hmun pakhat a si. Hell kan ti mi cu sualcawh kuan nak hmun ti tla in kan ko thei a si. Cuihmun ih tuar nak cu Pathian hmuh duh zet nak hmun tla a si. Paradizu ti mi vancungram le Hell rampi hrem hmun cu kumkhua a hmun mi an si ko nan hell ram te cu netabik thu then nak tik cu caan ah cun a cem ding a si. Kan ni in hell ramte ih um mi thlarau pawl cawh kuan nak ihsin an luat thei nak dingah pek nak in siseh, thlacamnak in siseh, Missa dil nakin siseh kan bawm thei a si. Hell ram te a um ngai ngai ti mi thu hi Maccabi thuanthu Bible ca sungah kan hmu thei a si.

           Judah cu Jew miphun pawl hruai tu pakhat a siih a mah cu Puithiam sang Mattathias ih fapa upa bik a si. Amah hruai nakin Isareal miphun pawl raal an do nakaah a hrek khat ralkap pawl cu an thi. Cutikah Judah le a rual pi pawl in an an mai pupa pawl phum nak hmunah an ruak cu an ret. Cutikah an raal do nakih mileem biak pawl ih an hlut mi thil man kung pawl tla an zal sungah an hmu ih cu cu an daanih a duh lo mi asi. Cutikah Judah in a raal kap pawl hnenih paisa a khongih silver drachmas (Greek paisa) thawnghnih (2000) a ngahih a thi zo tu ralkap pawlih sual ngaidaam nak an ngah thei nak dingah sual ngai dam nak dingih Raithawi nak hrangah Jerusalem ah a rak kuat asi. Hi ti ih a tuah nak cu a thizo mi pawl an tho sal ding ti mi zum nak a neih thu a lang fiang a si. Ral do nakih a thi mi a ralkap pawl an tho sal ding ti miruah sannak rak nei lo sehla thlacamnak cu a lak a si ding. A sinan Pathian a tihzah tu thlarau pawl hrangah hi ti vekih a tuah nak cu a thinghlimih upat tlak a si. Curuangah a mah cu a thi zo tu pawl hrangih sual ngai daam thawi nak a tuah nakin a thi zo mi thlarau pawl cu sualcawhkuan nakin an luat ding a si. Curuangah in feh san zo tu zate ih thlarau hrangah thla kan cam nak a si.     

 

Add new comment

6 + 6 =