Thianghlim Ti (Holy Water) a can dan thutawi

Thianghlim Ti (Holy Water) a can dan thutawi

          Catholic mi pakhat hrangah cun Catholic biakinn sung a lut tikah thianghlim ti ret nak khuat sungah a kut a hnim ih pa le fapa a tuah mi cu a danglam lo mi tuah nak pakhat a si.

          Cu mi cu Bible hlun sungih Jew pawl tuah daan ihsin a ra mi asi. Puithiam hnatuan nak sungah Jew miphun pawl cu that lo nak ihsin luat thei nak dingah tu le tu tidai in an kholh fai aw theu. Mithi ruak an dai, mi naa an dai, nunau daan le nau hrinnak cumi pawl thawn an dai awk ngah caan ah tidai thawn kholh in an thiangfai ter asi. Hiti an kholh tikah an kut le kee par lam lawng si lo in an thinlung khal a thiangfai ter ti nak a si ti an zum.

          Biakinn sung lut in thawi nak petu ding, thlacam tu ding pawl khal a hmai sabikah mah le mah ti thawn thian fai awk ding asi. Cu ruangah Biakinn sungah kheng pakhat ah Puithiam pawl cu thawi nak an tuah hlan ah kut an kholh theu.

          Cuvek thotho in kan Catholic Biakinn sung lut nakah khal thianghlim ti ret mi khuat fate a um. Cu mi ah kan kut zung kan hnim ih pa, fapa kan tuahnak a ti can (3) a um.

1. Sual sirnak
2. Khuavang sualsawm nak in humhim nak
3. Tikholh nak kan lak kha vun mang sal ding ah asi.

Biakinn sung kan lut tikah himi pawl hi kan mang sal a tul. Tikholh nak kan lakih thu kan rak kam mi “Khuavang le a hnatuan pawl kan hnong mi kha kan langtersal” ti nak asi. Curuangah kan tuahsual mi sual nak pawl hrangah sirawk nak le Pathian hnen ah kan kirsal ti nak asi.

     Hi thianghlim ti cu Puithiam a silole Bishop ih thlasuah pek mi ti asi. Thosal zaan ih thlasuah pek mi ti asi. A tul a si le a tul dan vek in Puithiam pawl in thianghlim ti an tuahih an hmang theu.

     Thianghlim ti cu inn thlasuah pek nak, Pathain zuk pawl, Mithianghlim zuk pawl thlasuah pek nak, naa le caw tilva pawl, motor, cycle pawl cuvekih minung kan hmang mi pawl thlasuah pek nak ih kan hman vek in khuasia khuavang dawi nak ah tla kan hmang.

     Thianghlim ti cu hmual nei zet mi a si. Avila khua ih mithianghlim Theresa a mai ngan mi a thuanthu cauk sungah tette a khan mi cu “Veikhat ah khaan sung ih ka um lai ah ka keh lam ihsin fihnung za a si mi khuasia pakhat a ra thleng. In ra bia ih ka zohtik ah ka thing. A ruangpum zate cu thlaam um lo mi meisa alh thawn a alh rero. A nih in in hro, Keimah khal a kut ih luat ding in ka zuam rero, asinan a nih in in kaisal. Ka tihtuk ih kei khal ka ti thei tawk in thla ka cam. A sinan malte rei a si len kha mi pa cu a ra suak cingcing.

Kha ti ih a can nak veihnih a si thlang. Ziang ka tuah ding ti khal ka thei nawn lo. Khami caan ah kha mi kiangah thianghlim ti a um. Keimah khal thianghlim ti um nakah keimah le keimah ka hlon aw duak. Cu mi thianghlim ti thawn ka theh. Cumi ihsin thok khuavang cu veikhat hman a lang nawn lo. Cumi ih si thokin  khuasia khuavang in inra hnaihnok in ra ti buai tinten thianghlim ti lawng ka hmang theu. Khuasia pawl veikhat hman an ra nawn lo.

     Himi tette khan mi cu St.Theresa a mah rori tette a khan mi a si. Curuangah thianghlim ti cu hmual nei zet mi asi.

     Khuasia khuavang dawi ding ah hnatuan an pek mi Siangbawi pawl khal in hi mi thuhla hi tette an khan ve asi.

     Curuangah Catholic khawhhran mipi pawl in thianghlim ti kha zumfek nak taktak thawn hmang uh tiah ka lo forhfial duh.

     Catholic khawhhran a silo mi ulenau, kawhhran dang ih um mi rualpi hrekkhal pawl khal in thosal zaan Catholic Biakinn sungah thianghlim ti an cuh awk rero khal kan hmu theu.

     Thianghlim ti ih hmual cu menmen a si tin ruah ding asi lo. A sinan ralring ding mi cu thianghlim ti cu dawi thilti thei nak lam asilo himi thianghlim ti cu Pa le Fapa le Thiangthlarau kha rinsan in zumnak thawn kan hmangsawn ding. Curuangah dawi ih thilti thei nak thawn ruahsual lo dingah a tul.

     Ziangkhal asile a zum tu pawl hrangah cun khuasia khuavang pawl ih sualsawm nak ihsin humhim dingah hmual a neizet mi hriamnam pakhat a si kan ti thei. Curuangah Catholic kawhhran mipawl kan innsung ih ret ringring ding a tul mi pakhat asi. hi mi thu hi Bosco ih ngan mi sungin kan run lo hlawm mi a si.