V

Italy ram Turin khua ih a cangmi Bawipa thi le sa mangbangza lang nak
Minung pawl ih zum nak a mal deuhdeuh kha a thei tu Pathian in a fapa ih taksa le thisen kha pulpit par ah a tak vek rori in a lang ter. Hi mi can cu kum 1453, June, 6 ah asi. Ralkap pahnih kha an Game in an tlung ih Exilles khua an feh phah ah pakhat in Biakinn sung lut ding in a sawm. An pahnih in biak nak lam upat nak an nei lo ruangah hi vek ih an ruah nak asi. Arei hlan ah biakinn sung ah an lut ih hnipuan pawl, phayawngdai vang nak pawl le a dang man a nei zet mi thliri pawl tla an lak ih pulpit lam an feh ih Bawipa thi le sa an ret nak kha an ong. Asung ih a um mi thluasuah pek cia mi sangreu a tummi pakhat an ret mi ngun hai tla an lak ih an hruai mi laak par ah an ret thluh. Zohman in in hmu lo, in thei lo tin an ruat ih lungawi zet in an tlung. An pahnih in cumi thliri pawl kha TURIN khua ah kan zuar le cu aman tampi kan ngah ding tin an ruat ih TURIN khua ah an feh. Cui caanah an laak kha a naal ih alet. A par ih an ret mi thliri pawl kha tanglamah a tlak theh. Sangreu an ret nak khuat khal a tang ah a tlak ve. Asinan sangreu cu tlak lo in a par ah a kai. Kut ih ban lo ding in aum. Hivek ih a can nak cu khuasung ih Piazza of Grain timi dawr pakhat ah asi. Hih dawr cu Sansilvestro Catholic biakinn hmai ah a um. Nehhnu cu hih biakinn cu “Jesu ih ruangpi Barsilica” tin an phuah.
Hivek ih a can ruangah kiangkap ih aum mi mipi pawl kha an ra khawm aw ih mangbang zet in an zoh. Cumi ihsin mi pahra in hih a can nak hi an hmuh taktak thu tette an khaan asi. Hih pahra sungih pakhat asi mi Bartholomeo Coccono timi in Turin khua ih Bishop pai hnen ah thuhla a sim ih Bishop Ludovico cu zamrang zet in a hnipuan a hruk ih khuasung ih aum mi pawl le upa pawl tla a ko ih mangbangza a can nakah an feh ih an khuk an bill cih. Sangreu kha lungawi zet in an biak hnuah sangreu ret nak dingah khuat pakhat an dil. Khuat an ngah hnuah a ding ih khuat kha a sannak ah a khai. A ra tu mipi pawl hmai ah nuam teten a tum ih khuat sungah cun a lut. Cui sangreu cu tihzah nak thawn kawhhran dang pawl khal tel in mithianghlim John Baptist biakinn ah an keng asi. Hi mi thu hi Lashio U Joseph ih ngan mi sungin kan run tarlang mi a si.