Ziangruangah June thla cu Jesuh thianghlim thinlung thla tin kan ti.

Ziangruangah June thla cu Jesuh thianghlim thinlung thla tin kan ti.
June thla hi a tam sawn in Jesuh thianghlim thinlung thla tiah theih tam a si. Ziangah tile hi June thla sungah hin Jesuh thianghlim thinlung puai kan tuah ruangah a si. Tui kumah cun June 7 ni ah hin a puai ni a si. Kum tin a puai ni hi a thleng aw theu, ziangah tile Bawipai thi le sa puai ni hnu tlawngkai ni nga ni a si ih Penticost puai ni hnu zarhhnihnak tlawngkai ni nga ni a si.
Ziangziang a sikhal le June thla cu Jesuh thianghlim thinlung thla ti ih ap nak ni khal a si. France ram nisuahnak lamih um mi the visitation of Holy Mary hnen ih langnak a hmuhnak ah a tel tu sister pakhat cu Bawi Jesuh ih a thianghlim thinlung natnak a hmuh thok nak 1673 ih sin thok in an rak tuah thok mi puai pi a si.
Bawi Jesuh in Margaret Mary Alacoque hnen langnak a rak hmuh ih a thinlung thianhlim kha upatnak pe dingah ti daan pawl a rak hmuh ih minug pawl hnen ih a neih mi a tum zet mi a duhdawtnak kha a mai tangih lenglam ah hmuh thei mi thinlung, meisa parah hling lukhuh in a vel mi kha a rak hmuh a si.
Hi a lamdang zet mi ti daan pawl cu tlawngkai nili ah nazi pakhat sung Bawipa thi le sa biaknak le thla ih zarh hmaisa bik tlawngkai ni nga ni ah Bawipai thi le sa sang ding ih ti daan pawl a tel a si.
Bawi Jesuh in Margaret Mary hnenah hi tin a rak cah " a thinghlim ka thinlung cu minung pawl parih a duhdawtnak cu a tumtuk" a thu pi bikin na hrangah cun duhdawtnak meisa alh pawl cu a sungah thuh a thei lo ih tidaan phun kim thawn karhzai ter dingah a si. Hi mi mangbangza langnak cu thla 18 tiang a lang a si.
1675, June 16 ah Jesuh in Sister Margaret Mary hnenah a thianghlim thinlung kha upatnak puai tuah dingah a rak fial. A thianghlim mi thinlung kha upatnak a pe tu pawl hnen ah thukamnak 12 khal a rak pe a si. Hi tivek in thianghlim thinlung upatnak a petu pawl parah ka thianghlim thinlung in tamzet in thlasuah ka pe ding tiah a rak sim. Sister Margaret Mary cu 1690 ah a nunnak a rak cem ih 1920 May 13 ni ah Pope Benedict XV in mithianghlim dinhmun ah a rak khaisang.
Culai ah Vatican in Jesuh thianghlim thinlung puai tuah dingah a rak harsa deuh ko nan France ram tluanah hi mi puai tuahnak a rak karhzai vivo tikah Vatican in 1765 kum tuah dingin a rak lungkim pi a si.
Kum 1856 kum ah Pope Pius IX in Corpus Christi puai theh hnu tlawngkai ni nga ni cu universal (Catholic ) Church hrangah Jesuh thianghlim thinlung puai tuah dingah a rak ngamhnget. Cui si thokin June thla cu Jesuh ih thianghlim thinlung thawn minung zate par ih a mai a tumzet mi duhdawtnak hnen ah ap in upatnak pek dingah a si.
Hi mi cu St. Margaret Mary hnen Jesuh thianghlim thinlung thukam nak pawl an si.
1. Anmaih dinhmun ih zir in, an nunnak ah a tulsam mi thluasuah pawl famkim te’n ka pe hai ding.
2. An innsang ah remdaihnak ka thleng ter ding.
3. Harsat an ton caan ah hnemnak ka pe hai ding.
4. An nun lai ah leh, ahleice in, an thih caan ah an hrangah a him mi beunak ka si ding.
5. An tuahtuannak kip ah thluasuah phunkim ka burh hai ding.
6. Sualnak neimi pawl in ka Thinlung sungah a cem thei lomi zangfahnak tipithuanthum an hmu ding.
7. Zianghman poisa lo mi thlarau pawl tla an tha ka tho ter sal ding.
8. Tha a tho mi thlarau pawl cu, thianhlimnak le famkimnak ah an thangso lohli ding.
9. Ka Thianghlim Thinlung zuk thate’n ret tahratin upat peknak hmun pohpoh cu thluasuah ka pe ding.
10. Puithiam pawl hnenah a hak bikmi thinlung pawl khoih theinak thluasuah/laksawng ka pe ding.
11. Ka Thianghlim Thinlung upat sunloihnak tlangdarh in karhzai ter tu pawl ih hmin cu ka Thinlung
sungah ziangtik hmanih hlo lo dingin ngankhum an si ding.
12. Thla khat sungih hmaisabik Tlawngkai ni 5 tinte’n thla 9 sung a zonzon ih Bawipa Thisa Sacrament a sangtu pawl cu, netabik sualsirnak nei ta loin an thi hrimhrim lo ding.
Hi mi thuanthu hi Catholic news agency ih June 19, 2022 ih an tarlang mi sungin kan run a remcang ding zawngih kan leh mi a si. Casiar tu zate parah Pathian thlasuahnak um hram seh.