Bawinu Maria ih hmin sunglawi upat ni. (September 12, 2020)

Bawinu Maria ih hmin sunglawi upat ni. September-12

         Bawinu Maria ih hmin upatnak puai ni cu kumzabi 16 ah an rak tuah thok ih mai Biakinn ciar ah an rak hmang theu. Kum 1683 ah Pope Innocent hleikhat nakin September 12 ni cu leitlunhuap Biakinn in Bawinu Maria ih hmin upat nak ni le a humhim nak hrangih lungawi thu sim nak ni ah a rak nemhnget. Bawinu Maria ti mi hmin  ih duh san cu Hebrew tong in “tipithuanthum ih arsi” ti a si. Long par ih hnatuantu pawl in thlisia an ton caan ah Bawi Jesuh in kan  hrangih in hmuh mi lamzin vekih in kilhim tu Bawinu cu arsi vekah kan zoh thei.

         Kan nunramih harsatnak kan ton caanah Bawinu Maria hawl uh si. A mah in Bawi Jesuh hnenah in hruai kir sal ding. St. Bernard ih a rak ngan mi cu, “Nunram ih thlisia kan ton tikah tipithuanthum ih arsi a si mi Bawinu Maria hnen in tlan hlah uh. Colh ni a nei lo mi thlisia in na long a lo zam sak caan, cu lo le lungto tumpi na pah caan ah arsi zoh in Bawinu ko aw. A tum zet mi tisuar ih a lo hlon tikah arsi a si mi Bawinu Maria ko aw. Thinheng nak lo le na thinlung sungih duhhamnak a um caanah Bawinu hnenah pan aw. Na sualnak ruangih na thanau le Bawinu ruat aw.

         Tihnungza le harsatnak pawl na ton caan ah Bawinu Maria mangsal in ko aw. Na hmurka le Bawinu cu hla ter hlah aw. Na thinlung cu a mah in a lo rem sak ding a si. Lamzin na hloh caan ah a lo kilveng ding ih a lo humhim ding ruangah tihphan ding ziang hman a um lo. Rundamtu Jesuh hnenah a mah in a lo hruai ding a si. Riahsiatnak, leiba le thinlung hnaihnok nak pawl thawn na khah tikah Bawinu Maria ruat in kan ko maw? Bawinu in in duh ngaingai ih  kan lungawi ding a duh ti teh kan zum ngaingai maw?

           Bawinu Maria in a Fapa Bawi Jesuh thawn nai ten um tlang thei dingah ziang ti vek in in bawm ti hi mah bulpak in ruat cio uh si. Kan nungsung ih harsatnak le hnaihnok nak kan ton  caan ah ziang ka tuah ding ti thei nawn lo in beidong vansang in kan um maw? Kan thinnat nak le kan harsat nak pawl in lak hlo sak thei tu cu Bawinu hi a si. Hi vek ih harsat nak kan ton caan ah beidong ih tap men lo in Bawinui hmin sunglawi cu ko in a hnen ah ben uh si.

     https://www.youtube.com/watch?v=nT58hCsAXxU