Bawinu Maria ih Suahni sunglawi (September 8)

Bawinu Maria ih Suahni sunglawi (September 8)

        Nunau thianghlim Nu Maria cu Bawi Jesuh a suah hlan kum 16 a duh ah Galilee ram, Nazareth khua ih um Mithianghlim Joachim le Anna tei fanu a si. Joachim le Anna cu an tar tiang fate an neih thei lo ruangah Pathian in fa a pe  nawn lo ding tiah an zum.

          Asinain, Pathian in Joachim le Anna te ih thlacamnak cu a cohlang ih rundamtu Messiah ih Nu a si ding mi Maria a run pe. Maria ih suahni sunglawi cu Jerusalem ah hmaisabik an rak tuah ih kum 687, Pope Sarjius san ah leilung pumpuluk ah a rak karh.

          December niriat ih kan tuah theu mi sual hram nei lo ih a sem mi Nu Maria ih puai ni le Bawinu Maria ih suahni sunglawi cu pehtlaih awk nak an nei.

Sual hram nei lo mi Bawinu Maria ih a fa le pawl le biaknak lam ih pawlkom tamsawn cun an mai duhdawtnak kha Bawinu hnen an ap nak lang ter nak dingah hi ni ah hin Biaknak lam thawn pehpar mi thukamnak an tuah theu.