Bawinu Maria Siangpahrang Bawinu a si nak puai (August-22)

Bawinu Maria Siangpahrang Bawinu a si nak puai (August-22)

        Bawinu Maria Siangpahrang Bawinu a sinak Puai cu kum 1954 ah Pope Pius hleihnih nak in kawhhranpi pawl hnenih a kuat mi ca “Vancungram ah” (Ad Cacli Aeyinam) thawn an rak thok.

          Hi puai cu Bawinu Vancungram ih hruainak a ngah nak puai thawn pehzom awk nak a nei. Fala Thianghlim Maria Vancungram ih hruainak a ngah hnu ah Van le leilung ih Siangpahrang Bawinu dinhmun in Siangpahrang lukhuh a rak ngah.

          Bawinu Siangpahrang Bawinu a cannak cu Mithianghlim John, Cathianghlim ngantu hnenih lang nak par ah a bun aw. “Van ah khawruahharza thil pakhat a lang. Nunau pakhat a lang ih a thuam cu ni a si; thlapi a ke thuai ah a ret ih arsi hleihnih thawn tuah mi Siangpahrang lukhuh a khum, tiin Thuphuan 12:1 sungah kan hmu thei.

          Pathian in cui caan tha a pek nak cu a mah cu Pathian ih Nu a si ruangah si lo in Pathian ih thu a zum nak ruangah a si. Jesuh in hi thu a sim theh tikah miseenpi lak ih nunau nu pakhat in Jesuh cu, “A lo hringtu le a lo tuamhlawmtu nunau cu mi thawsuak a va si so!” tiah a ti.

          Jesuh cun, “Pathian thu a thei ih a thlun taktaktu pawl cu mi thlawsuah an si sawn,” tiah a ti. Cui thu cu Lk 11:27-28 ah fiangzet in in sim a si.  

          Bawinu Maria cu Vancung Siangpahrang Bawinu a si nak kan zoh tikah Jesuh khrih ih Nu a si nak ruangah si lo in Pathian a zum nak ruangih a ngah mi a si ti kan theih vek in kan nih khal Vancung suilukhuh a ngah thei tu kan si nak dingah kan zumnak, rinsannak le kan ruahsannak nikhat hnu nikhat thang ter dingah zuam tlang uh si.