Bawipa Zesuh Jerusalem Biakinn Pi sungah an ap nak Puai (Febuary 2)

Bawipa Zesuh Jerusalem Biakinn Pi sungah an ap nak Puai (Febuary 2)

            Zesuh Khrih a suah hnu ni 40 nak ah Joseph leh Mary cu Jeruhsalam biakinn pi ah Bawipa zesuh cu ap nak an tuah asi . Hitin an tuah nak cu Pathian ih  daan an thlun ih an kil him nak a si. "Minung siseh, Ramsa siseh, fapatir hmuahhmuah cu ka hrang thianghlim ter uh" kei mah ta an si" tiah a ti. (Suahlannak 13:1) Mary khal le thuro pahnih  amah thianghlim nak hrang ah ap nak an rak tuah sak dah a si.  "fapa si seh, fanu si seh,  a thianfaiter awknak caan a kim tikah meiur thawi nak ding hrangah kumkhat a ti mi tuu fa pakhat, a silo le thuro pakhat khal sualthlah thawi nak hrang ah Puithiam hnenah a rak keng pei. Tuufa no a keng thei lo le laileng pahnih a silo le thuro pahnih a rak keng thei" tiah a ti. (Puithiamhnatuan 12:6-8)

            Biakinn pi ah Simeon timi miding zet pakhat a rak um. Amah cu Bawipa ih tiammi Messiah na hmuh ngah hlanah na thi lo ding tiah thiangtlarau hnenin tongkam a rak ngah tu a si. Simeon in naute Zesuh cu a taangah a cawi ih Pathian a thangthat ih "Bawipa, tuisun ah hin na thukhammi cu na kimter ih, na salpa cu daitein a nunnak ni na liamter thei thlang asi. Na minung Israel mi pawl hnenah siseh miphun hmuahhmuah hnen ah siseh na rundam nak cu ka mit rori in ka hmu zo" tiah a ti. (Luka 2:29-32)

            Simeon ih tongmi cu Joseph leh Mary in an theih tikah an mang a bang ngaingai. Cutikah Simeon cun thlawsuah a pek hai ih a nu Mary hnenah, " Hi naute cu Israel mi lakah mi tampi tluknak dingah le mi tampi tungdingtu dingah Pathian ih hril mi a si. Mitampi in an engtaimi le Pathian hnenin a ra mi hmuhsaknak a si ding , Cule nangmah khal a hriammi ralnam ih sun vekin riahsiat ninghannak in na thinlung a lo sun ding a si" tiah a ti.(Luka 2:34-35)

            Joseph le Mary in Bawipa ih daanih fialmi vekin tuah tul mi pawl an tuah theh hnu ah Galilee ram Nazareth khua ah an tlung a si. Amah cu fimnak in a khat ih Pathian thlawsuahnak a parah a um. Simeon ih "ramtinkimih tleunak" timi tong nak in Pawlpi cun naute zesuh  Biakinn pi ih ap nak puaiah  phazawngdaang pawl thlasuah pek nak  thawn an rak hmang  theu asi. Cuti kan tuah nak cu Jesuh Khrih cu that lo nak le a thim mi thih nak neh in Leilung pi ah tleu nak a rak keng tu a si ti mi duh san nak a  nei a si.