Brindisi khua ih Mithianghlim Lawrence (1559-1619) July 21

Brindisi khua ih Mithianghlim Lawrence (1559-1619)

July-21

          Capuchin Puithiam pawl sung ihsin hminthang bik mi Pathian thuthangtha sim tu Puithiam Mithianghlim Lawrence cu kum 1559 ah Italy ram, Brindisi khuapi ah a rak suak. Kum hleiruk a ti ah Beruna ih um Capuchin Franciscan tlawng ah a rak lut ih a hmin khal cu Caesar in Lawrence ah a rak thleng.

          Padua phunsangtlawng ah Philosophy le Theology thawn pehpar mi fimthiam nak pawl a zir lai ah tong phunkim le Bible Cathianghlim lam ih a thiam nak pawl ih mangbangza a thil ti thei nak a rak hmuh.

          Puithiam cannak a ngah hnu ah Pathian thu sim thiam zet tu tiin Europe ram ah a hmin a rak thang. A mah cu Theology ca uk pawl a ngan lawng  si lo in Jew miphun pawl ih thinlung thleng thei dingin khal a tuah thei tu a si.

          Mithianghlim Lawrence cu Pathian zum lo tu pawl kham ding tumtah nak thawn Germany ah Capuchin Puithiam tlawng a rak din ter. A thianhlim nak ruangah Hungary ram a hringhro tu Hungary ralkap pawl do dingah ram uk tu a pahnih nak Rudolph ih a thlah mi ralkap pawl a zoh tu Puithiam ah an ret.

          Kum 1601 ih a cang mi Szekesfehervar ral thawh hlan ah ral pawl ih thenli thenkhat lawng a um mi Christian pawl a thangphawk tu tong kamkhat a rak pek. Cui hnu ah a mah rori Thinglamtah kai in an hmai ah rang to phah in hmai a rak hruai. Turk miphun pawl an sung ih Europe ram pumpuluk cu tihnungza ral lak ihsin an rak luat.

          Kum 1602 ih an tuah mi an pawlkom ih thurelkhawmnak ah a mah cu Capuchin kaing ih ho tu ah an rak hril. A tuanvo pawl cu tha pek nak lam ih thlacam sak nak le zawnruahnak thinlung thawn a rak tuan.

          A mai Dungthluntu hnatuan pawl cu zuam zet nak thinlung thawn a rak tuan hlei ah thlacam nak lam khal ih a rak zuam zet tu a si. A mah cu kum 1619 ah Caseda khuapi ah a nunnak a rak cem a si.