Carmel Bawinu (July 16)

Carmel Bawinu (July 16)

          Carmel Bawinu cu Israel ram sungih um tipithuanthum a hoih mi tipikap dang ih a um mi Carmelite Yatih tlawng le Yatih pawl kilkhawitu a si. Prophet Elijah in BC 850 ihsin thok in Carmel tlang cu a thianghlim zet mi hmun thiang le minung pawl in Pathian hnenih an rinsannak ih nemhnget dah mi a si. Cui hmun cu Prophet Elijah in Baal khawzing parah a kumkhua cungnungbik Pathian ih thuneihnak a um thu cu Israel miphun pawl hmuh dingah a rak kom ter.

         Kum 1150 ah Mithianghlim Berthold cu Pathian Bawinu ih kilkhawinak hnuaiah a ret ih Carmelite kaing a rak din. Farah harsatnak cu sa ulhnak, thawmvang um lo nak ti vek ah a fek zet mi upadi pawl a rak hmuh. Crusade raldonak a reh hnu ah Mithianghlim Simon Stock in Pathian riantuannak a awl deuhnak ih a mawi deuh nak dingah Carmelite kaing cu mi hnen dil ih ei dingih din mi a tin kaing si dingah a rem sal.

         Kumzabi 16 sungah Calced Carmelite tiih kawh mi Mithianghlim Simon Stock ih a din mi daan pawl a thlun tu pawl le Discaled Carmelites tiih kawh mi Mithianghlim John (Thinglamtah ih John) ih thlengawknak dung a thlun tu pawl tiin an rak then aw.

         Carmelite Sr. kaing pawl sungin kumzabi 16 ah Avila khuapi ih Mithianghlim Teresa ih a rak din mi Discaled Carmelites kaing cu a tha bik mi a si. Carmel tlang Scapular upatnak cu Bawinu ih pek mi thuphuan parah a bun aw. Kum 1251, July 16 ni ah a sunglawi zet mi Bawinu in England ram, Cambridge ih um Carmelite kaing hotu, Mithianghlim Simon Stock hnenah langnak a rak hmuh. Bawinu in a hnenah coffee rong Scapular a rak ap.

         “Hi Scapular a orh tu pawl cu a hleice in kilkhawinak an nga lawng si loin Vancungram thawn pehpar mi thluasuah khal an ngah ding” tiah a rak sim. Carmel Bawinu tiih hmin thang zet mi Bawinu hnenah upatnak pe tlang uhsi. Carmel tlang ih Bawinu Maria ih sim vekin Scapular orhnak in lei thluasuah, Van thluasuah kan ngah thei nak dingah zaangfah bomnak dil tlang uhsi.

 

Add new comment

5 + 1 =