Christmas Puaini sunglawi (December 25)

Christmas Puaini sunglawi 

December-25

          Christmas puaipi cu Bawi Jesuh suah ni sunglawi a si ih Christian tampi in Gregorian Calendar vek in December 25 ah Siangpahrang Constantine in Rome khuapi a rak uk lai, kum 336 hrawngah an rak hmang thok.

          Asinain, hlanlai Christian pawl cun Bawi Jesuih suah ni an rak tuah dah lo. Ziangahtile Bawi Jesuih suah ni  hi cekci in zo hman in an rak hminsin lo.

          Christmas ti mi cafang hi (Middle English) tiih kawh mi mirang san a lai lak hrawngah Christ’s Mass ti duh san a nei mi hlan lai mirang tong in Cristes-messe ti mi in a rung suak mi a si.

          Christ ti mi canfang hi “Hriak culh nak” tiih a san nei mi Greek tong in Chritos tiin siseh, Hebrew tong in Masiah tiin a si ih mirang tong in Messiah tiin leh mi a si. Curuangah “Christ” le “Messiah” hi a sun lam a bang aw.

          Cule Christmas ti mi hi Xmas tin  kan kawh tho tho mi thawn a sun lam a bang aw. Christ le Mass a kom awk lawng ah Christmas a famkim. Christ ti mi cu Khrih ti nak a si ih Mass ti mi cu Missa sumnak a si ih cu mi a um lawng ah Christmas ngaingai tiah kan ti thei.

Kan dung kum 2000 luan hrawngah Keta Siangpahrang Caesar Augutuh in ram pumpuluk ih cazin la dingah David ih sungkhat hmuahhmuah in an suah nak ih cazin pek dingah thupek a suah.

          Joseph khal David ih sungkhat a  siih thi aw dingih an ti mi Maria thawn cazin pe dingah Galilee ram ih Nazareth ih Judrea ram ih Bethlehem khuapi ih an um lai ah Maria ih a hrin nak ding ni le thla a kim ih fa  a nei.

          An mah cu khualthlennak inn an co nawn lo ruangah Naute cu puante thawn an tuam ih caw rawl khuang sungah an ih ter.

          Cui khuapi ih tuukhaal pawl in zaan ah an tuu pawl an khaal. Pathian ih Vancungmi cu cui tuukhaal pawl ih kiang ah a rak lang ih “Tu ni ah David khuapi ah Jesuh Khrih ti mi rundamtu cu nan hrangah a suak. Puante thawn tuam mi caw rawl kuang sungih a it tu naute cu nan hrangah hmuhsaknak a si” tiah a rak than.

          Cui Vancungmi thawn Vancungmi a dang pawl hmakhat te ah an rung lang ih “Vancung Siangpahrang, kumkhua ih Pathian ih hmin cu kumkhua in hmun ringring seh.

          Leilung par ih thinlung tha nei tu pawl hnen khal ah daih nak um hram seh” tiin Pathian thangthat nak hla an sak.

          Tuukhaal pawl khal Bethlehem khuapi ah zamrang ten an feh ih cawrawlkuang sungih a it mi naute Jesuh cu an va biak.

          An biak theh hnu ah an hmuh mi le an theih mi Naute ih thu cu hmun tinkim ah an va phuang. Tuukhaal tu pawl ih sim mi a thei tu hmuahhmuah in an mang a bang thluh.

          Maria khal le cui thuhla pawl a ciing ringring ih ralring ten a um. Cui hnu tuukhaal pawl cun an sim cia vek in an hmuh mi pawl cu ruat phah in Pathian an thangthat ih an tlung.

          Tui ni Christmas ni sunglawi ah hin Naute Jesuh ih thluasuah tlamtling zet ih a co tu kan si thei  nak dingah zuam cio uh si.