Dungthluntu Mithianghlim Andrew (November-30)

Dungthluntu Mithianghlim Andrew (November-30)

      Bawi Jesuh ih a hmaisabik Dungthluntu a si mi Mithianghlim Andrew cu Galilee ram, Bethsaida ah a rak suak. A mah cu Jonah ih fapa a si ih Simon Peter thawn unau an si. Bawi Jesuh Baptism a lak hnu ah Bawi Jesuh hnenah “Bawipa khui ah so na um?” tiah a rak sut. A thaizing ah Andrew cu a u pa Simon Peter hnenah a feh ih “Kan nih cu Messiah kan hmu zo,” tiah sim in Bawi Jesuh a rak hruai. Cui thu cu Jn 1:35-41 sungah kan hmu thei a si.

         Thiang Thlarau Pathian a rung tum ni Penticost Puai hnu lamah Andrew cu hmun tinkim ah feh in Pathian thuthangtha a rak phuang. Pawlpi in kum reipi a rak zirh mi hlanlai teeti vek a si le Andrew cu Greece ram, Patras ah X pungsan Thinglamtah ah thah a rak tuar a si.

         A mah cu cui Thinglamtah par in a thih hlan nihnih sung mipi pawl hnenah thuthangtha a rak phuang. Mithianghlim Andrew cu Russia ram, Greece ram le Scotland ram pawl kilkhawitu ti-ih upat sunloih mi a si. Thirhthalh Mithianghlim Andrew vekin harsarnak, buainak lak in Pathian thuthangtha phuang thei tu kan si thei nak dingah zuam cio uh si.