Dungthluntu Mithianghlim Thomas (June-3)

Dungthluntu Mithianghlim Thomas (June-3)

            Innsak daan ding pungsan zuksuai tu pawl kilkhawitu dungthluntu mithianghlim Thomas cu Galilee khuapi ih mifarah sungkua ih suak mi a si. Bawi- Jesuh par ah duhdawt nak hngetkhoh zet a nei ih a mai hrang ih teette khan dingah a thinlung a rak bot cat. Asinan, Bawi Jesuh a thih hnu cun dungthluntu pawl hnen in a dang ten a um ih “Bawi Jesuh a thosal zo,” ti mi thuthang a rak zum lo. Curuangah “rin hlel tu Thomas” ti mi hmin a rak ngah. Bawi Jesuih lang nak a hmuh hnu zarhkhat a rei ah a voihnih nak lang nak a hmuh sal ih Thomas hnenah, “hi nah na kut zung rak ret hnik aw la ka kut hi zohhnik aw, zum lo in um nawn hlah,” tiah a rak sim. Thomas khal in, “Ka Bawipa le ka Pathian” tiah a rak ti. Cu le Bawi Jesuh in, “Nang cu i hmuh ruangah i zum. Kei mah i hmu lo nan i zum tu cu mithluasuah a si,” tiah a ti. Cui catlang cu John 20:24-29 sungah in sim fiang a si.

          Thiang Thlarau a rung tum hnu ah Thomas cu an kai ih India Siangpahrang Gundafor hnenah sal dinhmun in a rak thleng tiah hlan thuanthu ah kan hmu thei. Innruang zinglam ih a thiam zet thu a theih ruangah Siangpahrang in Thomas cu a ropi zet mi Siangpahrang hauhruang a rak sak ter. Siangpahrang um lo sungah Thomas in a ngah mi peisa hmuahhmuah cu mifarah pawl a rak pek theh.

          Siangpahrang a thleng sal ih a sak ter mi Siangpahrang hauhruang thu hla a suh tikah Thomas in, “Siangpahrang Bawipa, cui Siangpahrang hauhruang cu a tu ah na hmu ngah lo ding. Hi leitlun na suahsan hnu lawngah na hmu ding,” tiah a rak ti. Cu tik ah Siangpahrang ih hnatuan a sawng tu in “Thomas in Vancungram ah Siangpahrang in Thomas a thlah ih mi tampi in Siangpahrang hauhruang an tim tuah mi lang nak ka hmu” a ti ruangah a nun a zuah sal. Siangpahrang in Thomas a thlah ih mi tampi thawn Baptism an rak lak. Neta lam ah Thomas cu India lam ah a feh sal ih Pathian thuthangtha a rak phuang. Cui hnu ah Mazday ih Siangpahrang Bawinu cu a nun a thleng ter ih Christian zum nak ih a luh ter ruangah Siangpahrang Bawipa thawn an rak rem aw lo. Netabik ah tlang zim hmunkhat ah an hruai ih cui hmun ah thah a rak tuar.

          Mithianghlim Thomas cu India ram ah Pathian thu a phuan phah in a nunnak a rak liam nakin mipi tampi zum nak ah a rak hruai suak thei tu mithianghlim a si vekin kan nih khal kan mai dinhmun cio ah thuthangtha phuangtu si ve tum uh si. A mah bangin hmun dang, ram dang ah feh in Pathian thuthangtha in sim thei lo hman seh la kan mai innsang le kan kiangkap ah Jesuh Khrih kan nun in phuang tlang tum uh si. St. Thomas cu Jesuh Khrih ih thosal nak zum lo in a rak um nan neh hnu ahcun a mai hrangah a nunnak liam tiang a rak thlun bangin kan mah khal zum nak der lo in hnget khoh zet ih kan um thei nak dingah thla in cam sak aw tin zaangfah bom nak dil tlang uh si.