Guadalupe Bawinu ih Puai ni sunglawi (December 12)

Guadalupe Bawinu ih Puai ni sunglawi (December 12)

December-12

Guadalupe Bawinu Maria (1531)

           Bawinu cu kum 1531 ah Mexico ram, Guadalupe ah Juan Diego hnenah langnak a rak nei.

          A mawizet mi December ni kua ni zinglam ah Diego Biakinnih a feh lai ah aw nem zet in nunau pakhat in “Juan Deigo” tiih a kawh aw a rak thei.

          Curuangah lamzin khatlam ih um tlang par ah theih duh nak thinlungthawn a zoh tikah Ni vek in a tleu ih lungmankhung par ah a ding mi Bawinu a rak hmu.

          Bawinu in “Ka minung pawl par ah siarcawk lo duhdawtnak, bawmnak le humhimnak pawl tuah thei nak ding Biakinn pakhat hi tlang fate parih sak ka duh” tiah Juan Diego hnenah a raksim.

          Juan Diego khal in zamrangten Archbishop hnenah a feh ih cui thilcangmi cu a va sim nan Bishop in a rak zum lo. Cu tin harsatnak a ton tikah Juan Deigo cun cui langnak a hmuhnak tlangpar ah a feh sal ih Bawinu hnenah “upattlakzet mi Bawinu hi vek ih harsa zetih tuah ding mi tuanvo cu mi thupi pakhatkhat hnenih langnak na hmuh le an nih khalin an zum dingih an tuah ding.

          “Kei cu mifarah zonzai mi ka si” tin a raksim nan Bawinu in “Ka fapa, thaizing zinglam ah Bishop hnenah feh sal aw la kei mah ih ka lo thlah thu va sim aw” tiah a sim sal.

          Juan Diego khal in Bawinuih thu a ngai ih Bishop hnenah a feh sal. Bishop in cui langnak tettee I hmuh aw tiah a rak dil.

Curuangah Bawinu khal in Juan Diego hnenah langnak a hmuhih cui langnak a hmuhnak tlangpar ih hninsi par hmuahhmuah in a lakih a angki in a zawi ih Bishop hnenih va pek dingah lam a rak hmuh.

           Bawinui lamhruainak vek in Juan Diego khal in tlang fate par ih a hmuh mi hninsi par pawl a lakih Bishop hnenah cun a hei keng.

           Cu ti a hmuhlaifang ah danglamzet in cui hninsi par pawl par ah Fala Thianghlim, Nu Maria in langnak a rak hmuh. Cui langnak a hmuhhnu cun Bishop khal in Bawinui thu a rak ngai ih langnak a hmuhnak hmun ah Biakinn a rak sak.

           Cui Biakinn khal ah langnak a rak hmuh nak angki cu upatnak an pek ih an rak ap. Guadalupe Bawinu in hminthang mi American miphun pawl rakbawmtu Guadalupe Bawinu tiah an run nemhnget.

           Curuangah kan Bawinu in a tikcu caan hril lo in hmun tin ah langnak a nei theu a si.

          Cui a langnak cu kan mah a fate pawl hrangah a si ih Pathian hnen in naih ter tu khal a si.

          Curuangah tui ni Bawinu langnak ni sunglawi ni ah hin thlawsuah lo tu si hram seh uh si.