Guadalupe Bawinu Mary ih Thuanthu tawi

Guadalupe Bawinu Maria (1531) December-12

            Bawinu cu kum 1531 ah Mexico, Guadalupe ah Juan Diego hnenah langnak a rak nei.A mawizet mi December ni kua ni zinglam ah Diego Biakinn ih a feh lai ah duhnungzet thawn nunau pakhatin “Juan Deigo” ti-ih a kawh aw a rak thei. Curuangah lamzin khat lamih um tlang par ah theih duh nak thinlung thawn a zoh tikah Nii vekin a tleuih lung man khung par ah a ding mi Bawinu a rak hmu.

            Bawinu in “Ka minung pawl par ah sair cawk lo duhdawtnak, bawmnak le humhimnak pawl tuah theinak ding Biakinn pakhat hi tlang fate parih sak ding ka duh” tiah Juan Diego hnenah a rak sim. Juan Diego khal in zamrangten ArchBishop hnenah a fehih cui thil cang mi cu a va sim nan Bishop in a rak zum lo. Cutin harsatnak a ton tikah Juan Deigo cu cui langnak a hmuhnak tlangpar ah a feh salih Bawinu hnenah “upattlakzet mi Bawinu….hi vekih harsa zetih tuah ding mi tuanvo cu mi thupi pakhatkhat hnenih langnak nahmuh le an nih khalih an zum ding ih a tuah ding. Kei cu mifarah zonzai mi kasi” tin a raksim nan Bawinu in “Kafapa…. Thaizing zinglam ah Bishop hnenah feh aw la keimah ih ka lo thlah thu vasim aw” tiah a simsal.

            Juan Diego khal in Bawinuih thu a ngaiih Bishop hnenah a fehsal. Bishop in cui langnak tetti I hmuh aw tiah a rak dil. Curuangah Bawinu khal in Juan Diego hnenah langnak a hmuhih cui langnak a hmuhnak tlang par ih hninsi par hmuahhmuah in a lakih a angki in azawiih Bishop hnenah vapek dingin zin a rak hmuh. Bawinuih lam hruai vekin Juan Diego khal in tlang fate par ih a hmuh mi hninsi par pawl a laakih Bishop hmai ah a va keng. Cu ti a hmu hlaifang ah danglamzet in cui hninsi par pawl par ah fala thianghlim, Nu Maria in langnak a rak hmuh. Cui langnak a hmuhhnu ah Bishop khal in Bawinuih thu a rak ngaiih langnak a hmuhnak hmunah Biakinn a rak sak. Cui Biak inn khal ah langnak a rak hmuh mal angki upatnak anpekih an rak ap.

            Guadalupe Bawinu in hminthang mi American pawl rakbawmtu Guadalupe Bawinu tiah an run nem hnget. Curuangah kan Bawinu in a tik cu le a can hril loin hmun tin ah langnak a neitheu a si. Cui a langnak cu kanmah a fate pawl hrangah a siih Pathian hnen in naihtertu khal a si. Curuangah tuini Bawinu langnak nisunglawini ah thlawsuah lo tu sihramseh tin thlaza kan cam a si. A ngaitu zate parah Pathian thlasuahnak um hramseh.