July-26 Mithianghlim Joachim le Mithianghlim Anna

July-26

Mithianghlim Joachim le Mithianghlim Anna

          Mithianghlim Anna le Joachim cu Bawinu Maria ih nu le pa tiih upat sunlawih mi an si. Pathian thangthatnak le thil tha tuah nak thawn an nun an rak hmang.

An mah cu riah siat nak tumpi pakhat an rak nei. Cu mi cu kum reipi sung fa te an rak nei thei lo. Asinan, Anna cu beidong men lo in kum tin ten Pathian hnenah fa te nei thei dingin a rak dil theu. Cu le cui a fa cu Pathian hnenih ap dingah thu a rak kam.

          A tar hnu ah Pathian in a thlacam nak cu Anna ih a saduhthah hnak ih tha sawn a rak pek. St. Joachim le Anna sungin (the Immaculate Virgin Mary) sual hram nei lo ih a seem mi nau te a rak suak.

Hi a thianghlim zet mi nunau cu Pathian ih Nu cang tu ding a si. Anna in kum reilo te sung Mary cu a rak kilkhawi. Cui hnu ah a thukam cia vek in Mary cu Pathian hnenah a rak ap.

          Mary cu Jerusalem Biakinn thianghlim ih a nun hmang dingah a rak feh. St. Joachim le Anna cu Pathian in a Vancung ram ih a hruai hlan sung hmuahhmuah thlacam nak thawn an nun an rak hmang.

          Christian pawl in Mithianghlim Anna hnenah catbaanglo in upat sunlawih nak an rak pek. An rak sak mi Biakinn mawi zet zet pawl khal cu St. Anna ih hmin in an rak ap.

 Cu mi Biakinn pawl sung ihsin a mawi bik le hminthang bik mi cu Canada ih um mi the Shrine of St. Anne de Beaupre ti mi a si ko ding. Mi tampi cu kum tin ten an tuar mi nat nak a phunphun dam nak an ngah nak ding hrangah bawm nak dil dingah an feh theu.

          Mithianghlim Anna le Joachim pawl cu Bawinu Maria ih nu le pa le Bawi Jesuh ih a pi le pu pawl an si. Curuangah Bawi Jesuh le Bawinu Maria thawn nitin ten kan naih awk thei nak dingah Mithianghlim Anna le Mithianghlim Joachim hnenah zaangfah bawm nak kan dil thei a si.

          Kan nih khal Mithianghlim Joachim le Anna vek in kan nun ram ah Pathian duhzawng in a nung thei tu kan si thei nak dingah siseh, cun kan thlacam mi tutiang kan ngah hrih lo mi tla a um men thei.

Cu mi pawl hrang khal ah beidong men lo in Pathian hnenah thlacam nak thawn tangtlang uh si. Kan thlacam nak hi Pathian in ziang siar lo in a um men lo ding. Ni khat khat ah Mithianghlim Anna vek in kan ruah baan lo mi thluasuah in pe leh ding a si.

Fale pawl in Nu Le Pa pawl par ih tuah tul mi tuanvo

Ka fa le pawl nan pa asimi keimah ih nunsim nak cu ngai uh. Ka ruah nak nan thlun asile run nak nan ngah ding. Ziangruangahtile fale pawl cu pa upat dingah Pathian ih remruat cia mi a si. Pa in a fa le pawl par ih uk thei nak thuneih nak cu Bawipa ih remruat cia mi a si.

Pa a upat tu cu a mai sual nak hrangih pek awk nak vek a si. Mai nu khal upat nak a pe tu cu hlawmthil tampi khawl thawn a bang. Pa a upat tu fapa cu a fa le pawl ruangah thinnuam nak a ngah ding. Thla a cam tik khalah a thla cam nak aw Pathian in a theih sak ding.

Nu a upat tu cu Pathian thu ngai tu asi. Cumi pawl cun Mai nu lepa pawl Pathian ih pek mi ah ruah in an rian. Na pa khal na tong kam le na tuah nak in upat aw. Cuticun Amai thluasuah cu na hnen ah a thleng ding.

Ziangahtile pa pakhat ih thluasuah cu fale pawl ih hmailam nunnak kha a humhim ter. Asinan nu pakhat ih camsiat nak in a fa le pawl dinhmun a siat ter. Na pa ningzak nak a ton caan ah na lungawi hlah.

Ziangahtile a ningzah nak cu na hrang ah uan awk nak a si lo. Minung pakhat hrangah a pa ih sinak cu uan awk nak a si. Upat nak a ngah lo mi nu pakhat in a fa le pawl kha ning zah nak a thlen ter.

Ka fapa na pa a tar tik ah zoh tha aw. A nundam sung hmuahhmuah a thin har ter hlah. Ziangthei lo ih a um hman ah thin sau ten tuamhlawm aw. Na dam lai ah na pa kha hmuhsuam hlah.

Ziangahtile amai pa duhdawt nak thawn a tuamhlawm tu cu Pathian in ziangtik hman ah a hngilh dah lo. Himi cu na sual nak pawl thianfai nak khal a si ding. Harsat zonzaih nak a ton khal ah Pathian in na nu le pa na tuamhlawm nak a zoh dingih a lo run ding a si.

Tikhal cu thil sa ruangih a zup vekin na sual nak pawl khal a dem deuh ding. Mai pa a tuamhlawm lo tu cu Pathian ziangsiar lo tu thawn a bang aw. Mai nu a thin a heng ter tu cu Pathian ih cam siat nak an tong ding. (Wisdom 3:1-16)