Kumzabi 21 ih kum nauhak bik Mithianghlim Carlo Acutis a thih caan ah kum 15 lawng a si lai. October 10, 2020

Kumzabi 21 ih kum nauhak bik Mithianghlim Carlo Acutis a thih caan ah kum 15 lawng a si lai. Oct 10, 2020

         A thih nak hmun cu Italy ram, Milan khayaing, Monza khuapi ah 2006 ah a si. A kum nauhak te ko nain Diocese le Pope pawl duhdawt zet tu a si. A thih tiang a nasa zet mi a natnak zaten Nu Pawlpi le Pope hrangah a ap tu a si.

         October nihra ni, a ruak an phum nak Assisi khuapi ah Mithianghlim ah mipi an tam zet nain a ropi zet mi raithawinak thawn nemhnget nak an rak tuah. Leilung pumpuluk khal in sunlawih mi Mithianghlim ah a rak cang.

Hnih suah sai tu

         Tu ni Mithianghlim a si mi cu mi mak sak a si lo. Mi men men pakhat a si.  A hmel mawi ih duh a nung zet ih mi ih ngaih ven zet mi khal a si. Hnih suah sai in nuam aw zet tu a si. Hnih suah sai ti a si lo nain, thinnom lo mi tongkam pawl, thuhla pawl sim nak cu a si lo. A ca zir pi mi pawlih a um pi mi a rualpi pawl, saya/ma pawl lungawi dingih tuah tu a si. San thar mino a si vekin bawling sit paih zet tu a si. Cu vekin video game khal a lek. A ha a nget. Ice-cream le Nutella (ei in phun pakhat) pawl a hmuh cun ei ding hreh lo tluk ih duh zet tu a si. Rawl a ei theh hnuih a taksa a rit deuhdeuh ti a theih cun mal deuh ih ei a tul. Rawl ka ul ding. Ei in duh nak thinlung mal ter dingah a thei aw. Ei in duh zetnak cu a rak pah suak mi sambaunak tampi lak ihsin pakhat a si.

         Mai duh nak hrial in a tlaitluang zet mi nuntuzia pawl thawn a rak thok sal theu. Na taksa duh nak hrial thei nak cu raldonak thawngkhat neh hnak in a tha sawn,” tiah a ruat tu le rak thei thiam tu a si.

“Mai si nak vekin um uh. A lem le ti awk ter nakah cang ter hlah uh,” ti mi nun pi tu a si. Hi motto ruat phah in Mithianghlim cu mino menmen pakhat a si ko nain a nunram thawn man nei zetih nung dingah tha suah duh tu mino pakhat a si cu fiang zetin theih a theih. A nunram cu maksak zet a si lo; danglam zet in a rak nung.

Inn nei lo pawl bawmtu

         A mah cu a ngah mi pocket money a khawl mi paisa pawl thawn leiram a lei ih nitin Missa raithawinak a feh ih tu le tu a ton theu mi inn nei lo pakhat a rak bawm. Cui a khawl mi sumpai thawn a paih zet mi video game a lei thei ko nain cu vek tuah lo in zaangfah lainat nak hnatuan cu siang zetin a rak tuah. Hi bawmnak vek cu hi mi pakhat lawng a si lo. A bawm thei caan le bawm nak a tul mi mifarah hrekkhat pawl a rak bawm mi tahthimnak cu ruakvui nak Missa raithawinak an tuahah khuapi ih um mifarah tampi tel nak hi a si.   A tirhsiannak zaangfah lainatnak hnatuan cu a ngai ngai ih a tul mi pawl a bawmtu ti cu a lang.

         A diary ca uk laksawng a ngan tikah a mai zaangfah lainatnak hnatuan le thlarau lam thleng aw ih thanso nak lang ter tu ca uk ah a rak hmang. Ti duh san cu nikhat sungah ziang vekin a um ih thinlung a nei. A rak ruah mi dinhmun pawl cu ruat in khum dingah a si. Hi vek in a sambau nak pawl rem in that nak tamdeuh tuah dingah a rak zuam. Cui thlarau lam diary ah “riahsiatnak cu mah le mah a laifang ih ret nak a si ih lungawi nak cu Pathian a laifang ih ret nak a si. Nuntu khuasak daan thlengnak cu ziang hman a si lo. Ruah nak thawn nak lawng a si.

         Mai thil ti thei nak vekih nuam teih um tu a si. A nu khal a mah vek in nuam zet ih um tu a si. A nu vek a si tiah Antonia Salzano in suhawk nak pakhat ah a rak sim. Khaan sungah Carlo ih tong mi in a rualpi pawl siseh, saya pawl siseh hnihsuah nak ah a can ter. Asinain, neta lam ah cun a hnihsuahsai nak in midang pawl a hnaihnok ti a thei ih hnihsuah sai lo dingah a ralring vivo. A thin khal a nuam lo. A kiangkap um pawl ziang hman lo ih hni dingih tuah awk nak cu a nunram ih pakhat a si. Thlahlawh an pe ko nain inn thianhlim nakih hnatuan tu pawl khal an hnatuan a si mi a hnawm an sar le a duh lo.

         Curuangah zingtin ten tho dingah alarm a tuah ih thianfai tu pawl an thlen hlan ah a khaan cu thiangfai zetin a tuah theu. Raejsh tiih kawh mi Hindu hnatuantu pakhat cu Carlo ih khaan thianfai tu a si. A mah in Carlo cu a mawizet mi mino a si ih a famkim zet ko nain, tlaitluang zetih a nun thu, Carlo ih a fel zet mi a zumnak, zaangfah lainatnak a tuan nak, thianghlim ten a um nakin thianhlim nak tuah tu pawl khal an mang a bang ter theh thu, Carlo ih zohthim tlak, Christian nunram ruangah an nun thlengin baptism a lak tiah a rak sim.

Thianghlim ten um nak

         Thianhlimnak cu Carlo hrangah a nun ih thupi zet mi a si. Mi tinkim cu Pathian ih tleunakin a tleu ter” ti mi cu a duh zet mi a si. A khaan pi a rualpi pawl Christian nun thawn kaih in an um lo le a ning a hang theu. Christian nunram thawn kaih in nung dingah a rak forhfial. Milai taksa cu Pathian ih laksawng a si thu thei fiang dingah a rak bawm theu. Cu vek in nulepa sual nak thu cu Pathian ih lungkim mi vek lawngin tuah a theih. Mi tinkim ih upat tlak si nak cu a thupi tul.Carlo hrangah nlepa sual nak cu a danglam tuk. Nulepa sual nak cu Pathian ih sersiam nak thawn tuah tlang nak a si tiah a nu in a fapa ih thu a rak sim. Mithianghlim thar in Tipithuanthuam sungih a tla mi hnawm pawl cu ti sung luh in mitkharh hmang ih sar nak khall a rak paih zet. Inn ih a zuat mi uico pawl a kawh caan khal ah a hmuh mi hnawm pawl pakhat hman hrelh lo in a rak sar. Hi vek in a mah cu leilungpi thleng dingah a rak thok.

Bawipai Thi le Sa duhdawttu

         A mah in Bawipai Thi le Sa cu a taktak ih duhdawttu a si. Bawipai Thi le Sa cu Vancungramih in hruai tu a rang zet mi lamzin pi a si tiah a rak cohlang. Hi mi in a nu ih nunram a rak thleng ter. A nu in a nunram sungah voithum lawng Missa raithawinak ah a rak tel ko nain Bawipai Thi le Sa sungih a um mi Bawi Jesuh a duhdawt zet tu a Fapa ruangah a rak thleng aw. A nu in Theology zirh dingah a hmin a rak pek. Cu lawng ah a Fapa ih a suh mi pawl a let thei ding a si. Carlo kum 11 a kim tikah Bawipai Thi le Sa thawn pehpar mi huham pawl, thuanthu pawl a rak zingzoi thok. Computer a thiam nak zaten hmangin Bawipai Thi le Sa ih huham le thuanthu pawl cu Facebook ah a rak tarlang. A ca ngan mi cu then160 tiang a um ih a cawng bet paih tu pawl in Facebook in an cawng thei. (Theih tul mi ah- dinhmun ih pek si le hawl in tarlang bet ding). Cui video pawl leitlun ih um Parish Puithiam ih Pathian thuruahnak Diocese zaten 10000 tiang a rak hmuh theih zo. Cui video pawl hmuh phah in an zoh. Cu lawng ah an theithiam ding,” tiah a rak sim.

Kum note ih a thi mi Mithianghlim

         Kum 2006, thal tlawngpit ih nikhat ni ah Carlo in a nui hnenah, “Ka nu, Puithiam pakhat ka can le a tha tiah na ruat maw?” tiah a sut. A nu in, “Nangmah na thei sawn ding si. Pathian in lam a lo hruai ko ding,” tiah a rak let. Cui fimthiamnak zir kum thok ah Carlo ih harhdamnak cu a tlasam. A si nain, tlangrai a si men ding tiah an rak ruat. Asinain, cui dinhmun cu a dam thei nawn lo. Curaungah sizung ah an feh ih tuamhlawmnak a rak lak. “Hi hmun in ka suak nawn lo ding,” tiih a hlan ih a rak sim mi vek in sizung a luh veten a rak sim. Rei lo te ih an cek tikah a besia zet mi Lukeminia  (AML a si lo le M3) nat a neih thu an hmu. A mah cu mithmai a rak sia lo. A nat nak a theih veten a rak sim mi cu mangbangza a si. Ziangah tile, “Ka tuar mi nat nak cu Pope hrangah le Nu Pawlpi hrangah ap in ka tuar ding. Cu lawng ah hell ram te sungah sual cawh kuan nak tuar tul lo in Vancungram ah ka thleng cih ding,” tiah a rak sim.

         Cui rei lo te ah a rak thi. A mah cu leitlun ih Puithiam pakhat a rak cang lo nain Vancungram ah Puithiam a si,” tiah a nu in a rak sim. Hi thuthang cu 10 October 2020 ah Vatican thuthang ih kan ngah mi a si. Mithianghlim Carlo Acutis cu kum zabi 21sungah a nauhak bikmi Mithianghlim, a thih hnu kum 15 a rei ah Mithianghlim sinak a ngah tu, game leh nak a piah zet tu asinan nehhnu ahcun game leh nak a hrial thiam tu, computer fim thiam nak ah hminthang tu, Missa kai nak, Bawipa thilesa le rosary a rinsan zet tu, a mah ruangah a nu kha kohhran sungah a lut tu, amah ruangah a nu kha Pawlpi lam hnatuan a tuan ter tu, amah zoh lo in zangfah lainat nak anei tu a tuah tu, kum 11 ihsin Bawi Jesuh thilesa ih mangbangza thuanthupawl kha ca sungah a khum tu, a tuar mi a nat nak kha Pope le Pawlpi hrangah a tuar tu, Mithianghlim pek nak canserh ah a nu le pa an pahnih in a um tu, amah thawn faphir a simi a naupa le a nau nu khal a um tu, mino pawl ih zohthim tlak dingin a nauhak zek konan zum nak ah puitling zet tu pakhat a si.

https://www.youtube.com/watch?v=3cDetkYWIvA