La Salette Bawinu ih thuanthu tawi

La Salette Bawinu ih thuanthu tawi

          France ram tlang pawl um nak hmun La Salette ah 1846, September 19 ni ah Bawinu in tuukhaal tu nauhak pahnih hnenah langnak a rak hmuh.

          Kum hleinga a si mi Melanie cu cui hmun ah kum reipi rak um tu a si nain kum hleikhat a si mi Maximin cu cui khua ah mithar in rei lo te sung a ra thlen nak a si.

          Hi mi nauhak te pahnih in 19,9,1846 ah tuu an rak khaal tiang ih suncaw ei dingah a kang mi tikua ih an cawlh lai ah an vung it that. Cui rei lo te ah pakhat a hung thang ih an tuu pawl hlapi an thlen kha an hmu.

          Mangbang zet ih an zoh lai ah cui a hlum pi cu pahnih ah a then aw ih cui tlawng kiang ih um lungto pakhat par ah nunau pakhat a to ih a hmai hup in a tah rero kha an hmu.

          Rei lo te sung to in a tah nak in a hung din tikah a mah a zoh tu nauhak pahnih in a kiang ih ra ding le tih lo dingah aw nem zet in a rak ko.

          Bawinu in an mah pawl hnenih a sim mi cu hi tin a si. Ka minung pawl in tangdor nak le thungai nak an neih lo le Ka Fapa ih a hnget zet  mi a kut cu reipi tiang ka kil thei nawn lo ding.

          Nan mai hrangah harsatnak tampi reipi ka tuar. Ka Fapa ih a lo hnon lo nak dingah catbanglo in thla ka rak cam. Asinain, nan nih cun ziangah nan rel lo. Ziangtluk ih thla nan cam khal le ka tuar mi harsatnak pawl cu thleng a theih nawn lo ding.

          Hnatuan dingah niruk a rak lo pek. Nisarih nak cu ka hrangah I rak ret. Cui ni cu ka hnenah in pe lo. Curuangah ka Fapa ih kut cu a rit tuk thlang.

          Hnatuantu pawl kawk tikah ka Fapa ih hmin cu an duhduh in an hmang. Hi thu pawl ruangah ka Fapa ih kut cu a rit tuk.

          Hi tiih a tong rero cu nauhak te pahnih cun thaten an rak ngai. Bawinu in France tong ih a sim ruangah Maximin in tha zet in a rak thei thiam lo. Curuangah aluu ti mi hi ziang mi a si thu cu Melanie hnenah a rak sut sal.

          Curuangah Bawinu in Maximin ih a theih mi tong thawn a sim sal mi cu, “Vainim nan nei ih nan ciin lo khal le ramsa pawl in an ei ding. A tanglai mi pawl khal a dip te ah an cang thluh ding.

          Rilrawn caan a ra thleng leh ding. Cui caan a thlen hlan ah kum sarih thuai nauhak pawl cu thiat nat nak thawn an nu leh ih tangsungah an thi ding. Midang pawl cu rilrawnnak in cawhkuah an tuar ding.

          Tacia rah pawl cu pangaang in an ei ding. Sabit rah pawl cu an siat ding,” tiih a sim hnu ah nauhak pahnih cu a dang ten a biak hai. A rak sim mi tih a nung zet mi thilcang pawl cu milai pawl in sual nak an tuah bet le a cang ding.

          Sual nei tu pawl an sual an sir le lungto tlang pawl cu sangvut, buh, a luu a phunphun ah an cang ding tiah a rak sim.

          Hi mi zat a sim mi cu nauhak pawl thawn nel aw zet in an rak rel tlang. “Tha ten thla nan cam maw?” tiih a suh tikah nauhak pawl cun tha ten thla an cam lo thu an rak phuang aw.

          Zinglam le Zaanlam thlacamnak pawl tha ten cam ding caan nan neih lo le Vancung ih um mi kan Pa le Ave Maria thlacamnak veikhat ciar cam in caan nan neih lai le cam bet uh tiah a rak zirh.

          Missa a ngai tu pawl an mal ruangah a riahsia. An mah pawl a feh san zik zawng te ah France tong ih a rak sim bet mi cu “Ka nauhak pawl hi thuthang cu mi hmuahhmuah hnenah sim uh,” tiah sim phah in tiva ral lan in a her kir sal ih ‘Ka nauhak pawl hi thuthang cu mi hmuahhmuah hnenah sim uh,” tiah a sim sal. Cui hnu ah pee nga luan ah a kai ih nuam te ten a rak hlo vivo ta.

          Bawinu ih a rak sim mi paam tlun nak, hang hnah hang rah siat nak pawl cu Ireland ram ih a can hnu ah a luu a mal vivo. Curuangah Siangpahrang Bawinu Victoria cu Parliment ah sumpai a rak dil. Sangvut har nak khal Europe ah minung taankhat cu 1846 ah rilrawng ter in a rak thi ter.

          Hanghnah hangrah siat nak, nauhak pawl an nu pawl tang sungih thih nak pawl a rak cang ngaingai. A hrekkhat kawhhranpi pawl in Bawinui ralrin pek nak tongkam an thei ih an sualsir in thla an rak cam ruangah sual cawh kuan nak tumpi an rak tuar lo.

          A kang mi tiva in ti a luang sal ih khawm zawhtu mitampi lak in a luang ih, khawmzawhtu mitampi sungih minaa pawl in cui tidai thawngin dam nak an rak ngah.

          Nat nak hloh nak pawl le langnak pawl cu Bishop pawl in a pehpar mi thuhla pawl zingzoi in a hman ngaingai thu an rak nemhnget. Curuangah La Salette Bawinu hmin in an rak din ih Puithiam pawl, Brother pawl le Sister pawl tampi an rak cang.

          Pope Pius pakua nak le Pope Leo 13 nak pawl in hi hmun ah Bawinu upat dingah siseh, Biakinn pakhat sak dingah siseh an rak on. Kumnga a rei hnu ah Pope Pius pakua nak in nauhak pahnih hnenah Bawinu in a dang ten thuthup a rak sim mi pawl a thei duh ruangah a rak sut.

          Nauhak pahnih in an mai thuthup pawl cu cahnah par ah ngan in Pope hnenah an rak pek. Melanie ih ca cu Pope in a siar ih France ram ih a cang lai ding mi thinphan thu pawl cu Pope in a rak hmuh.

          Kum 1946 ah La Salette Bawinu ih kum zakhat kim Puai an rak tuah. Bawinu in aluu, vainiim, Sabit rah pawl a hmuh ih tlaitluang zet ih ralrin pek nak cu nauhak pawl ih theihthiam dingah a si ko nain sual nak hrial in Pathian thawn nei aw dingah ralrin pek nak, Zarhpini pawl ih Biakinn feh dingih ralrin pek nak, sual nei tu pawl hrangah sualsir ih thlacamnak thawngin sualcawhkuannak ihsin luat thei dingah a tul.

          La Salette pawlkom pawl cu France ram, Madagascar, Canada, Brazil, Poland le America, England pawl ah pawlkom an din vivo ih a dang ram pawl khal ah an tuah rero lai a si.

          La Salette Bawinu ih thu kan zoh a si le sualsir dingah in sawm a si. Curuangah sualsirnak thawn Pathian hnen pan tum cio uh si.