Leitlun ralpi aveihnih nak ah sualpi ih tuahmawh nak a tuar tu Pathian hnatuan tu pawl a bawm tu miraltha siibawi nu August 27, 2021

Leitlun ralpi aveihnih nak ah sualpi ih tuahmawh nak a tuar tu Pathian hnatuan tu pawl a bawm tu miraltha siibawi nu

August 27, 2021

            Leitlun ralpi aveihnih nak ah Sister tlawng pakhat cu rapthlak zet in tuahmawh nak an tuar. Cui thil tha lo a tuar tu Sister pawl cu siibawi pakhat in bom in a hnem nak thil cang mi a rak si. Ralkap pawl ih thinnat nak pek nak a si. Ralkap cu minung sinak ih ti lo dingmi nun can sia an rak cang ter theu. Cutivekin ral ruang khalah ral a tha mi thinlung nei tu an suak. A tu thinnat thlak za thilcang ka run tarlang ding. Thinnat za asi nan khat lam ih zoh ahcun minung pawl ih thinlung tha le nunau khat le khat zangfah nak khal hmuh a theih. Taksa le thlarau a pahnih a dam ter tu thuhla khal a si.

            Nunau a tamsawn cu a tlang pi thu in ramsung ralbuai nakih mi ral tha pawl an si theu. Ralbuai caan ah mi sualpi nak tuahmawh nak cu thil rapthlak za pakhat asiih, nat nak a cang ter. Himi thil sual a tuah tu ralkap pawl cu an sualpi mi nunau pawl cu innsang nei maw, tlawngta a si maw, kum kim lo asi maw, biak nak lam hnatuan a si maw ziang hman an zoh lo. Ziangah an ruat lo.

            Ralkap pawl cu Berliln ihsin dung an sip ih, an khua le ram ah an tlung thlang ding. An ram an tlung nak ih khuapi pawl cu remdiah nak thu sim ding hnakin siatsuah nak a phunphun, nat nak pawl lawng mipi pawl an tan. Cuvek tuah nak cu mipi menmen a si lo. Pathian hrang hna tuan tu Sister pawl parah an tuah.

Sualpi nak le thah nak

            1945 leitlun ralpi aveihnih nak a buai rero lai thal caan ih ni ni khat a si. Polan miphun Sister tlawng pakhat ih Sister pawl cu Soviet Russia ralkap pawl ih sualpiih tuahmawh nak an tuar. An tuahamwh daan cu tumtah nak nei in tuah an si. Sister thenkhat pawl cu hnihsuah sai nak ih an hman hnu ah thah an tuar. A luat tu thenkhat pawl lak ah nauvon tu khal an um. An zate ih nunram ah nat nak hminsin nak an ret. Nat an tuar.Thin nau nak thinlung, minung thinlung nei lo pawl ih hmuhsuam an tuar.

            Cui nat nak an tuar caan ah France mino siibawi pakhat Polan ah a thleng. A hmin cu Madeleine Pauliac a si. Amah cu 1912, September 16 Villeneuve-Sur-Lot ah a suak. Cutawk ih a thlen nak cu amai aveikhat thlen nak a si lo. Polan ih a thlen ah Pawlpi ih phuan mi siizung ah amah cu cawl loin mi naa a kilkhawi. Amah cu pumkhawm ih lungrual in ral a do tu ralkap pawl khal a bawm. Jew pawl khal a mai inn ah a relh ter. 1945 kum a thok lam ah amah cu France ralkap lamah mi theih tam mi siibawi pakhat a si. Amah cu a sinak khaisan a si hnu ah siibawi cu France ih kaih a tuar hnu ralkap pawl tuamhlawm dingah Moscow ah  thlah a si. Cui kum May thla ah Wasaw ah thlah sal a siih, France pawlih phuan mi siizung ah siibai tuamhlawm nak a pek. An ram France ih a tlun thei lo sung ralbuai nak ih hriamhma a ngah tu pawl thawn a thleng tu ralkap pawl nasa zet in a rak tuamhlawm. Cumi sung Polan ramih khuapi asimi Wasaw cu Russia pawl in an long theh ih thil sual tuah nak tampi tuahnak dinhmun cu a mit rori in a hmu.

Tih a nung zet mi a thil hmuh mi

            Siibawi pakhat sinak in Russia ralkap pawl ih thil tha lo tuah nak pawl cu ziangvek thinlung thawn tuah asi timi cu ziangtivek khal in ruah a ngah lo. Ahleice in Benedictine Sister pawl par ih an tuah mi thil sual cu a rapthlak tuk. Amah cu ralbuai caan ah amal zet mi nunau siibawi lak ah pakhat asi ve. Curuangah hivek thinnat za thil a thei thiam. Amah cu hitivek a cang mi Yatih Sister tlawngah amah rori feh in thuhla famkim a theih hnu ah nitin a hmuh ton mi a ngan nak ah a nasa zet mi tongkam thawn a tuar mi pawl a ngan.

            Convent sungah Yatih Sister 25 an um ih, 15 cu Russia ralkap pawl ih sualpi an tuar ih, thah an tuar. A dam lai tu 10 cu thenkhat vei 41, 35, 50 tiang tuahmawh an tuar ih anma lakah 5 cu nau an pai. Anmah pawl cu minung ti hman tlak loin sinak siatsuah an tuar ih, an taksa lawng nat tuar loin an thlarau khal ah nat nak a tang. Thenkhat cu an thin a nau tukih thu hman sim thei lo khop in an um.

            Nau a von tu pawl cu a ritzet ih hleiah a tul lo zet mi thinglamta cu bangzet in nitin an phur. Anmai hril mi nunram khal a silo. An tong dah lo mi thil a si ruangah an thin a phang tuk. Netabik ah a cang thei ding lam thawn thlak ding tiang a ruat tu khal an um. Cutiin leilungpi siat vek tluk in an tuar caan ah Dr. Pauliac cu a dam lai tu cui Sister pawl hrangah siibawi pakhat lawng vek hman a silo. Yatih Sister pawl ih a na zet mi an tuar nak cu thinsau zetin a ngai sak. Anmah pawl a hnem. An nunram a duh lo tu Yatih Sister pawl hrang Dr. in zangfahnak thawn man nei zet in a upat nak a lang ter. Dinhmun pawl thei thiam in pom thei dingah a bawm. Anmah pawl cu ziang hman silo vekin a pehtlaih lo. Anmah a dinpi. Bom an tul caan tinkim ah a man cia ringring. An duh lo mi nau pawl khal an neih tiang tha pe in a nei ter.

A hrek cu Thla kim loin a thi cia in an nei

            Dr. Pauliac cu Yatih Sister pawl lawng bawm a ngah lo. Amah ih a hleice tuanvo cu ralkap pawl tuamhlawm ding ah a siih tuanvo a ciah tikah Polan ram pawl ah feh in hriamhma a ngah tu ralkap pawl a zoh. Amah ih zohthim tlak hnatuan pawl cu (1946. February 13) ah a cem. Ziangruangahtile a thih can ah amah cu kum 34 lawng a si lai. Amah cu accident thawn rinlopi in a thi. A ruang cu France ram, a suah nak ram ah an kuat. Amah cu France ram ih laksawng asimi (legian of Homor and the French Croix fe Guerre) pawl khal sunloih a si. 2016 ah flim director Anne Fontaine in Dr. le Sr. pawl ih thilcang pawl parah bun aw in "The Innocent" timi hmin pek mi flim a rak suah. Himi thuthang cu Aleteia thuthang ihsin kan don mi a si.

https://bit.ly/3jv9bbS

Ref:Aleteia.org