Lothlo pawl kilkhawitu mithianghlim Isidore (May-15)

Lothlo pawl kilkhawitu mithianghlim Isidore (May-15)

              Lo thlo tu pawl kilkhawitu mithianghlim Isidore cu Spain ram ih Madrid khuapi ah kumzabi 12 a cem zik te hrawngah mifarah sungkua in a rak suak.

            A nauhak lai te in lo thlo tu pakhat in khuapi leng lam ah hna a rak tuan. A mah cu a mawi zet mi nunau pakhat thawn kut an rak sih. Asinan, an fapa te cu tuan ten a rak thi. Cui hnu ah an mah ih thinlung duh nak pawl sup ih nung dingin lungkim nak an rak nei. Mithianghlim Isidore cu zing tin ten Biak inn ah a feh ring ring. Hna a tuan phah khal in thla a rak cam theu. A man caan pawl khal ah madarid ti mi Biakinn ah Pathian biak nak thawn a caan a rak hmang a si. Voikhat ah a hna tuan pi pawl in, “Isidore ih Pathian lam ih a zuam nak in a hnatuan a nuam deuh deuh ter a si,” tiah sual an puh.

           Cui mawh puh nak thu ngai le ngai lo thei dingah lo nei tu in a thup ten a rak zing zoi. Isidore cu a hnatuan nak ah tlai tuk ih a va thlen kha lo nei tu pa a hmu. Asinan, Vancungmi tamzet in an bawm kha lo nei tu pa in a rak hmu.

            Mithianghlim Isidore cu mifarah pawl par ih a tirh sian nak a tum tuk ruangah cui mifarah pawl a pek ih a taang lai mi thawn hnangam ten a rak um . Fur caan nikhat ni ah sangvut dip khat rial ding a phur ih lam zin ih thingkung pakhat par ah va te tampi a rak hmu.

            A dip sungta sangvut cu la tahrat in cui vate pawl hrangah a rak vorh. Sangvut rial nak ding hmun a thlen tik ah cun a dip cu a hlan vek in a khat ih a rial hnu khal ah a phurh zat ih a let hnih a rak suak. Isidore cu kum 1130 ah a nun nak a rak cem a si. Cui caan ih sin thok in thil ti thei nak huham tampi pawl cu a thla cam sak nak ih ngah mi a si. A thih hnu kum reipi a rak  nung tu a nupi khal cu Spain ram ah Santa Maria Dilaebiza  si nak in upat mi a si. Ziangah tile van ruah ti a har caan ah a lu an vel pi ruangah a si.

             Mithianghlim Isidore ih nun kan zoh tikah a mai hrang ruat lo in midang pawl, mi harsa pawl ruat in tirhsiang zet ih um tu mithianglim a si ruangah, Pathian in thuasuah tampi a rak pek vek in kan nih khal mi hrang tirh siang tu le kan neih kan siah mi siang zet in midang hrangah a pe thei tu kan si thei nak dingah le lo thlo pawl bawm tu mithianghlim hnen ah thlai rah tampi a suah thei nak ding khal ah zaangfah bawm nak dil tlang uh si.

#falamrva 

#RVAFalam Service

#Falamfamilyrc