Lourdes khua ih Bawinu Maria (Febuary 11)

Lourdes khuaih Bawinu Maria (Febuary,11)

        Mithianghlim Bernadette Soubirous cu France ram Lourdes khua ah kum 1844 ah farah nauta sungkua in a rak suak. 1858 kum Feb ni 11 niah a rual pi nunau pahnih thawn Gave tiva tluanah thingro hawl dingin an rak feh. Massabielle lung kua an thlen tikah a rual pi pawl  in Bernadette cu an tan ta ih rin lo piah thlipi hrang vekin a um ih cui lungkua cu a tleu theh. Bernadette ih a hei zoh tikah puanrang a sinih a parah a pawl mi puan in a tai a tem ih a kutah Rosary a keng mi nunau mawi zet pakhat cu a ke hramah pangpar (hninsi)par a um mi nunau pakhat a hmu. Benadette cu thinglamtah a hman a tuah tum nan a thin phan tuk nakah a tuah thei lo. Puan rang a hru tu nuau in Benadette cu a hnihsan ih a mah thawn rosary cam dingah a rak sawm.

        Cuihnu ni thum a rei hnuah Benadette cu lungkua ah a feh sal ih nunau nu cu a hmu sal. Nunau nu in niruk sung hi hmunah ra awla mitha lo sual nei mi pawl an lung an  thlengthei nak dingah thlacam sak ding le Siangbawi pawl hnenah hi hmun ih biak inn sak dingah va simaw tiah a cah ta. Cuihnuah a kiangih tiva te ih hmuar a nei zet mi tidai in dingah a fial bet a si. Benadette cu ni 15 sung cui hmun ah a feh ih minung tam pi in an thlun nan ziang mangbangza khal an tong thei lo. Benadette in cui nunau nui hmin a suh tikah "Kei mah cu sual hram nei lo ih a sem mi Bawinu ka si" tiah a rak ti. Benadette cu a ti can khal a rak thei lo nan Siangbawipa a suh tikah a sim fiang sal.  Kum 1866 ah Benadette cu Sister Convent pakhat ah a rak lut. Amah thawn a um tu a rual pi pawl in tangdor nak le teimak nak thawn a um tu Benadette cu an upat zet. Nikhat cu a rual pi pawl in Bawinu Maria a hmuh daan thu an suh tikah Bawinu in kei cu hmunphiah pakhat vekin i hman mi men vek ka si. Hmunphiah cu hmun an phiah theh ve le sangka dunglam ah an ret mi vek ka si tiah a rak sawn. Benadette cu 1879 kum 35 a kimah Rosary  thla a cam laiah a nun nak a rak cem a si. 1980ah a thlan an zoh ih a ruangpi tla siat lo in a hmur khal a mah kel ten an hmu lai a si. 1933 Pope Pius XI nakin mithianghlim si nak a ngamhnget a si.

        Tui ni tiangin Loudes khua piah cun nitin minung a thawngthawngin thlacam dingah an feh a si. Cuihmunih a feh tu minaa tam tak tla cu taksa dam nak an ngah. Bawinu Mariaih a cah ta mi tiva teih a suak mi tidai an in nak khal cun dam nak tam pi an hmu a si. Minaa dam lo leng thawn a feh mi pawl hrekkhat tla cu an lengtan ta in a tlung sal tu minung tam pi an um a si. Mithianghlim Benadette vekin nitin ten Rosary thlacam nak nei tlang uh si. Hi thla kan cam nakin thlasuah tampi in ngah sak ding a si. Cuihmunah thleng in thlacam thei lo hman sehla Rosary thlacam dingah a cah ta bangin kan cam ve a siah cun thlasuah tampi kan ngah ding a si.

 

Add new comment

18 + 0 =