Roy Schoeman ih tonmi Mangbangza thil pakhat

Shalom World timi hminnei media pakhat in Harvard Business School timi tlawngah Professor (zirhtu saya) rak tuan dahtu Roy Schoeman cu Catholic zumnak ziangtin a rak cohlang timi thusuhnak (interview) a rak tuah. Cumi interview ah Roy Schoeman khal cun mangbangza a hmuhton mi thil tampi ruangih Catholic zumnak a pom thu a rak sim.  Cuih mangbangza a hmuhton mi lakah Nu Mary thawn an tonawknak khal a tel.

Professor Schoeman hi Jewish zumtu a rak  si dah nan College tlawng a rak kai thok in atheist (Pathian zumlotu) pakhat dinhmun ih a rak thlengtu a si. Asinain, Pathian a umlo tiih ruahnak “atheism” in zianghman pek theih mi a neih lo zia a hmuhnak in a thinlung sungah thildang hawl bet duhnak lam ah a thlenpi ti’n amah rori in a rak sim. Cun, interview an tuahnak video sungah Nu Mary thawn mangbangza ih an tonawknak in Catholic biaknak/zumnak thlun duhnak thinlung a neih ter thu khal a sim fiang.

Nu Mary ih langnak thawn pehpar in Professor Schoeman cun a tanglam vek in a sim:

“Cuih zan ah ihkhun ahcun ka vung ihthat. Cun, daidim ten ka liang pawk tahrat in mi pakhatkhat ih thang mi vek in ka um. Cuihsin milengkhaan lamah i hruaiih keimah lawng nunau pakhat thawn kan tang. Cuih nunau ih mawi zia cu ka thinlung hmanih ka ruah banlo kop a si. Zohman ih sim tul loin cuih nunau cu Nu Mary a sit i ka thei cih. A kiangih ka um laiah, ziangtin amah hi sungloihnak felte le tlakte in kan pek thei ding ti lawng hi ka ruah mi a si. A ngaingai te vun sim dingah cun, ka thinlung sungih a ra pok suak hmaisabik mi cu ‘Aw, a va poi ve! Ave Maria thlacamnak tal rak thiam ta sehla maw. Ka rak thiam lo cu a poi tuk rori’ ti hi a si.

 A hnen ihsin Ave Maria thlacamnak i zirh aw ti hi hmasabik dil ka duh mi a si nan, thlacam ka thiam lo tiih sim le ka ngam lo (ka hngalnak ruangah). Curuangah a danglam zawngin, thlacam I zirh seh ti duh ah, na duh bik mi thlacamnak cu ziang so a si ti’n ka rak sut. Anih in, ningzak nawn pian in, ziang vek thlacamnak khal ka duh theh ko. Cule kei khal cun hnek deuh nawn in, ‘thlacam lak ah na duh zawng te cu an um ko ding ee’ ka ti. Thlacamnak lak ih a duh bik mi cu, “Maw sualhram neilo ih a semmi Nu Mary, bomnak dil in na hnen a rami kanmah hrangah thla in cam sak aw’ ti a si. (Himi thlacamnak cu St. Catherine Laboure hnen ih hmaisabik a rak zirhmi a si).

Cuih zan ih ihkhun ka pan tiangah, Nu Mary thuhla zianghman ka rak thei dah lo; a simmi pawl khal ziang an si ti ka thei lo lawlaw. A hmel mawi zia cu sim theih lo khop a si. A sinain, a aw thlum te hi a hmel hnak in duh a nung sawn. Duhdawtnak thawn a khatmi a awthlum te ka vun theih cun, ruah ban lo nak hmun pakhat thleng vek ka si. Ka hung thangfim le ve ten, ka thinlung sungah Nu Mary duhdawtnak thawn ka khat ih, a taktak ih Christian si thei ding in ka rak zuam. Cuticun, netabik ah Catholic zumnak cu ka run pomsuak ngah a si.

Culawng si loin, Professor Schoeman in Nu Mary ih langnak a hmuhmi ah Nu Mary thawngin Pathian thluasuah phunkim milai hnenih burh a si zia khal a rak hmu.

NB: Roy Schoeman hi Jewish biaknak fek zet ih a pomtu nu le pa ih rak hrinmi a si ih hlei ah, Jewish biaknak ih zirhtu thatha Rabbi Arthur Hertzberg le Rabbi Arthur Green te pawl hnen in zirnak sangsang a rak nei mi a si. A nu le pa hi Nazi tih ruangih America rak thleng mi an si. Havard Business School ah Professor a rak tuan dah ih a tu ahcun Catholic zumnak tarlang rero tu pakhat ah a rung cang. Cauk khal tampi a ngan zo ih a cauk lakih laar bik cu “Salvation is from the Jews” ‘Rundamnak cu Judah pawl hnen in a ra’ timi thulu thawn nganmi a si.

by: Fr David Mangte