Midang a bomnak ihsin amaih nunnak a rak hum ngah tu Brian Clark

Midang a bomnak ihsin amaih nunnak a rak hum ngah tu Brian Clark

Brian Clark cu 1947, July 4 ah Canada ah a rak suak. Businessman (sumdawng) pakhat a rak si ih, 2001, September 11 ah USA ih World Trade Center innpi vanzam thawn an rak do tum ih luat tu lakah a tel ve mi pakhat a si.

A rak luatdaan cu hiti’n a si:

A hnatuannak cu World Trade Center inn sangpi pahnih lakih thlangta tu ih dot 84nak ah a si. Flight 175 timi vanzam in a hnatuannak innpi a pah tikah Brian Clark le vanzam ih pahnak zawn ihsin a luatmi a hnatuanpi minung 8 pawl cu hmunkhat ah an finkhawm aw ih Stairwell A timi kailawn ihsin thuailam ih tum khawm dingin thubotcatnak an nei. A dot 81nak an thlen zawngah tlunlam kaiso tu mipa pakhat le nunau pakhat an tongih nunau nu cun an lamzin kham in, thuailam hlapi ah meikhu le mei-alh a tam tuk ruangah luatnak lamzin um sun cu, luanglu lam kaiso ih runtu helicopter hngah ding lawng a um thlang ti’n ralrinnak a pek hai.

Brian Clark le a hnatuanpi pawl cu cutawk ah an cawl ta ih, nunau nu ih thu ngai in tlunlam kaisal ding maw, lole, a simmi ziangah rel lo’n thuailam ih tum sawn ding timi thu an ruatkhawm rero. Culai tak fangah a dot 81nak innkhaan sung ihsin bomnak dilmi aunak aw a thangmi cun Brian Clark ih hna a khoih tuk. Tlunlam kai ding maw thuailam tum sawn ding timi an buai rero lai ah, a hnatuanpi pakhat Ron DiFrancesco timi pa hruai in, Brian Clark cu bomnak dil ih autu hawl dingah innkhaan sung cu a vung lut. Innkhaan sung an luh zawngah an hnatuanpi pawl cu luanglu lam pan ih an kaiso kha Brian Clark cun an hei hmu ta. Luanglu fehnak sangka khar a si ruangah le runtu ding helicopter an tum ngam lo ruangah cu pawl hmuahhmuah cu khai ni ah pialral lam an pan thluh tinak a si.

Bomnak dil ih aunak aw an theihnak lam an pan rero laiah Ron DiFrancesco cu meikhu tuar thei loin, kailawn umnak lam ah a kirsal. An rualpi dang vekin tlunlam a kai ding zum a um zet ko nain, anih cu thuailam tum ding sawn a rak hril ngah ih thihnak ihsin a rak luat ngah ta. Brian Clark cu bomnak dil ih au rero tu a hmuh hlan lo a vung hawl ih phar sahpi ih khatlam ah thil kuai tek-nawi ih nen mi Stanley Praimnath cu a va hmu.

Stanley Praimnath cu Fuji Bank ih hnatuantu pakhat a si ih sakta tu World Trade Center innpi vanzam ih a pah ruangah a hnatuannak thlang tatu innpi a suahsan zo lawk nan, humhualtu pawl in luhsal a theih an ti ruangah a rak lutsal mi a si. Amaih hnatuannak a dot 81nak a thlen hnu, phone a biak rero lai ah a dang vanzam pakhat in a umnak zawn a run pah kha a hmu. Cutikah au phah in a khir ih cabuai tangah a relh cih. Vanzam ih innpi a pahsiat hnu ah hriamhma malte lawng ngah in a nunnak cu a rak him. Brian Clark ih a vung hmuh ah hin an karlak ah phar sangpi in a dang. Cuih phar cu minung thazang lawngih siatbal theih le a si fawn lo. Curuangah Stanley Praimnath hrangih luatnak lamzin um sun cu phar par kai ih lan ding lawng a si.

A kai thei ngai pei maw tiah awloksong in a um nan, Brian Clark ih forhnak in a zuam tento. Vei tampi a rak tla sal ih a kut hman malte a rak siatsuah. Neta bikah Brian Clark cun a kut in a rak dirh ngah ih cuti’n phar sangpi cu a rak lan ngah thei.

Cuih hnu ah Brian Clark le Stanley Praimnath te pahnih cu meikhu pit le thil kuai tek-nawi tampi lakah an fehnak ding lamzin sial phah in thuailam ah an rak tum vivo. Cuti’n a dot 31nak an thlen zawngah a siat lomi phone pawl an hmu ih, 911 le midang an biak duhmi pawl minute mal lai sung phone an biak ta. Anmaih an biak hnu lawngah miruntu pawl in vanzam ih pahnak zawn le a tlunlam ih kharhkhum ngah mi pawl hmuahhmuah hrangah luatnak lamzin kailawn him pakhat a rak um nan si maw timi an vun theifiang lai.

Zinglam nazi 9:55 cekci ah miruntu pawl umnak innpi dot tangtabik cu an vung thleng. Mi pakhat cun nisuahnak thlanglam ih ummi Liberty Street timi lamzin an thlen vete’n tlan vurvo dingin ruahnak a rak pek. 9:56 AM cekci ah Brian Clark le Stanley Praimnath cu World Trade Center innpi umnak hmuankulh sung ihsin an tlansuak ngah.

Brian Clark ih sim vek a sile, cuih hmun ihsin blok pahnih hrawng an thlen zawngah Stanley Praimnath in innpi a cim ding a zum thu a rel ih, anih cun fek zet ih sak mi a si ruangah a cim lem lo ding ti’n a ti nan, a tong mi hman a theh hlan ah innpi cu a rung cim ngaingai ti a si. Innpi a cim hlan minute 3 ah Brian Clark le Stanley Praimnath cu innpi umnak an rak suahsan ngah ih netabik innpi suahsan tu minung 25 lak ah an rak tel ve. An dungah mi 2 lawng an um. Meikhu tuar lo ruangih a kirsal tu Ron DiFrancesco hi netabik ih luattu a si.

World Trade Center innpi 2 vanzam thawn an rak do ruangih nunnak liamtu minung 3000 zikte lak ihsin Brian Clark ih hnatuanpi 61 an tel ve.

Innpi thlangta (Tower 2) vanzam ih a pahnak zawn le a tlun lam ih um mi lak ihsin minung 4 lawng an luat. Innpi sakta (Tower 1) vanzam ih a pahnak zawn le a tlun lam ih um pawl cu pakhat hman an luat lo.

Neh hnu ah, Stanley Praimnath in a nunnak rak humtu Brian Clark hnenah lungawithu a rak sim. Brian Clark khal in, Stanley Praimnath ih au-aw a theih ruangah luanglu lam pan loin amah a rak bom ruangih thihnak ihsin  rak luat mi a si ruangah a hnenah lungawithu a rak sim ve.

Hi thil cangmi ih in zirh mi cu, ziang tlukin vansiat malmaknak kan ton hman ah, kan hnakih bomnak a tulmi mitlasam pawl kan va bomnak in kanmah hrang lala khal ah thatnak a rak suahpi theu timi hi a si.

Kan bomnak tulsam mi pawl bawm dingah khulfung lo te’n kan kut kan san tum ve cio pei!