Mithianghlim Albert the Great (1206-1280), November 15

Mithianghlim Albert the Great (1206-1280)

November 15

          Science mifim pawl kilkhawitu Mithianghlim Albert cu 1206 ah Germany ram, Lauingen ah si nak sang mi innsang ih suak mi a si. Dominican Yatih kaing ih a luh hnu ah Cologne le Paris khuapi pawl ah ca a rak zirh.

          A mah in Christian thuzirh mi pawl le Aristotle ih thuzirh mi pawl rem sal dingah a zuam ih a rak hlawhtling zet. A dungthluntu hmaisabik lam pawl ihsin St. Thomas Aquinas khal a rak tel vee.

          St. Thomas cu “milai ruahnak in Pathian ih thuphuan a dodal thei lo,” ti mi a Sayapa Albert hnenih a rak ngah mi a um. Albert cu thlarau lam thawn pehpar mi sience le leitlun thilri thawn pehpar mi sience lam fimthiamnak ah theih nak kaupi a rak neih ruangah leitlunhuap sibawi “Univesal Doctor” tiin mi theih tam zet mi a si.

          A mah cu a tinkaing ih hotu u pa le Rotisbon khuapi ih Bishop ah tuanvo a lak ih cangan le ca zirh nak thawngin netabik kum pawl a rak hmang. Albert cu 1280 ah Cologne khuapi ah a rak thi.

          Mithianghlim Albert hi Sience mifim pawl kilkhawitu Mithianghlim a si vek in tu lai ih sience mifim pawl khal Pathian duh zawng in leilungpi an kilhim thei nak dingah Mithianghlim Albert kan mai hrangah thla in cam sak aw tiin thlaza cam tlang uh si.