Mithianghlim Alphonsus Liguori (August-1, 2024)

Mithianghlim Alphonsus Liguori (August-1, 2024)

Mithianghlim Alphonsus cu Ridamtorist tlawng rak din tu a si. Kum 1696 ah Italy khuapi ih um Naples khua kiangah a rak suak. Cui khua ih a tha bik tlawng ah a rak kai ih kum (16) ah buaih a rak lak. Kum (1722) ah harsat nak, sunnak pawl a rak tong asi. Cu lawng si lo in “Leitlun suah san in ka dung i thlun aw” tiih kawh nak a ngah tu khal a si. Kum (1726) ah siangbawi a rak cang. Alphonsus cu a dik mi a thu sim mi ruangah mihmin thang pakhat a rak si. A mah in “A thusim sung ihsin a dam lo bik mi nunau pakhat ih a theih thiam lo ding mi thu ka sim dah lo,” tiah a rak ti. Jansenism tla a mah rori in ral tha zet in a rak do. “Sual tuah mi pawl thawng an tlak vek si lo in, thlarau pawl rundam nak ngah vek in sualsir tu pawl tin ruat ding” tin a rak ti.

Amah cu sualsir nak a nei tu pakhat cu ziang tik hman ah ngaithiam ding ah veikhat te hman a el dah lo. Alphonsus cu kum (1732) ah rundam tu ti mi cu khuasung le ram lak pawl ah Pathian thu sim nak thawn in Ridamtorist ti mi a rak ding a si. Mithianghlim Alphonsus cu Pathian thu lam, nuncan lam ih mifim pakhat tiih mi hmin thang a si ih a tha bik mi a cauk a si mi “The moral Theology” timi cu kum (1748) ah Pope a mah rori ih cohlang nak a co a si. Kum (1756) ah mithianghlim Agatha ti mi khuapi ih Bishop ah a cang. Missa sum nak ah minute hleinga hman a rei lo mi siangbawi pawl cu an cawl ter lawk ih a mai rangleng le Bishop zung hruk cu a zuar ih a ngah mi paisa cu mifarah pawl a pek theh. A nun ih netabik kum ah nasa tak in a naa ih a rualpi siangbawi rori ih hrem nak tla a rak tuar a si. Cu mi pawl cun a mai din mi pawlkom in an dawi. A thianghlim nak ruangah Bawipa ih pek mi sual nak phunkip pawl a tuar theh hnu ah kum (1787) ah a nun nak a cem a si.