Mithianghlim Anthony

Mithianghlim Anthony

(251-356) (January-17)

            Nelrawn ramcar ih Puithiam tlawng rak din tu Mithianghlim Anthony cu kum 251 ah Egypt ram ah a rak suak. A nu le pa an thih tikah Mithianghlim Anthony in a nu le pai rothil pawl le a nau nu kilkhawi dingah tuanvo a rak lak. A kum 20 ih Missa a ngai lai ih a rak siar mi Bible cu Mt 19:21 sungta “Mi famkim si na duh ah cun va feh aw la na neih mi hmuahhmuah zuar ta hrat in na ngah mi tangka cu mifarah pawl va then aw; cu ti cun Vancung ah hlawnthil na nei ding. Cui hnu ah I thlun aw,” ti mi Bible catlang cu a thinlung ah a caam.

          Curuangah a hrangih a tul lo mi thlawnthil pawl cu zuar in mi a zem. Cui ni rei lo te ah Mt 6:31 ih “Ei in ding le sinfen ding tla khui in so ka ngah ding,” tiin donhar in um hlah uh” ti mi catlang a thei sal ih a taang lai mi a hlawn thil pawl mi a pek theh sal ih a nau cu Sr. tlawng ah a ap ih nelrawn ah Yatih tuan dingah a feh.

          Mithianghlim Anthony hnenah khuavang pawl cu ramsa vek in siseh, nunau sia vek in siseh, a neih mi thawn a tuah mi thil tha pawl thawn siseh, a rak hmuh ih hnaihnok nak a rak pek. Asinain, Mithianghlim Anthony cu thlacamnak le rawl ulh nak pawl thawn khuavang ih hnaihnok nak pawl a rak neh. Mi tampi in Mithianghlim Anthony hnenah thlarau lam thawn pehpar mi ruah nak thar pawl an dil ih hlei ah mi tampi in a dung an thlun.

          Curuangah Mithianghlim Anthony cu a dungthlun tu pawl thawn a hmaisabik nak Christian pawlkom an rak din. A dungthluntu pawl in zingpit te ah tu ni ih a thi ding mi vek in siseh, zaan caan ah a thaizing khuavang hmu nawn lo ding mi vek in siseh, an mah le mah ruat aw in an nuncan tinkim ah netabik caan tha pakhat a si tiah ruat ih tha zet ih tuan dingin le nung dingah a rak zirh.

          Kum 337 ah Rome Siangpahrang Constantine in Mithianghlim Anthony hnenah a mah le a mah thlacam nakih a ap awk thu a rak sim. A dungthluntu pawl an mangbang ding ti a hmuh tikah Mithianghlim Anthony in “Milai pakhat a si mi Siangpahrang hnenin ca kuat ngah lo ruangah mangbang aw hlah; Pathian in a fapa hnenih in sim mi thu kha mangbang sawn uh” tiah a rak sim.

          Kum 335 ah a rualpi Mithianghlim Athanasius ih zaangfah dil nakin Mithianghlim Anthony cu Alexendria khuapi ah a feh ih “Jesuh cu Pathian a si lo, minung pakhat men a si” ti mi ruah nak tha lo thu zirhnak le mangbangza thil pawl a tuah nak ruangah mi tampi ih zumnak cu a hnget khoh ter. Siangpahrang ai-awh tu in cui khuapi in reipi Pathian thu ruat dingih a dil nak cu Mithianghlim Anthony in “Nga cu tidai in lak suah le a thih vek in Yatih khal mah le Pathian thu lawng ruat lo in a um a si ah cun a hlo ral ve ding” tiah a rak sim.

          Kum 356 ah Mithianghlim Anthony in a thih hlan ni rei lo te ah  a dungthluntu pahnih a ko ih tlangpar ih thawm vaang um lo nak ah in phum uh tiah a rak cah. Netabik ah “Ka duhdawt zet mi ka fa le pawl ka lo thlah, Anthony cu nan mah thawn a um nawn lo ding” tiah a rak ti. Khuavang ih hnaihnok nak hriamhrei ih a rak hman mi ramsa pawl cu fim zet in a rak finkhawi  thei  nak ih a fimthiamnak ruangah Mithianghlim Anthony cu lothlo pawl le inn zuat ramsa pawl kilkhawi tu Mithianghlim pakhat ah an rak nemhnget.