Mithianghlim Benedict ih thuanthu tawi (480 - 547) July 11

Mithianghlim Benedict (480 - 547) July 11

          Nitlak nak lam Puithiam Yatih pawl ih hotu upa a si mi Mithianghlim Benedict cu kum 480 ah Italy ram Norcia khuapi ah a rak suak. Nuncan ziaza tha lo mi a rualpi pawl ih nunnak zoh in a thinphang ruangah a kum 20 ah Subiaco tlang ah a feh ih cu tawk ah cun a um.

          Nikhat ah Satan in a hlan ih a theih dah mi nunau pakhat vek in a ruah nak ah a lang ter ih a thinlung cu a hliau zet mi thinlung duh nak meisa thawn a rak kaang ter. Cu ve ten Benedict in a hruk mi a kawrfual cu hlit tahrat in a taksa pem kuai theh tiang in hling burpi par ah a rak it.

          Hi tiin thlarau lam ih nat nak pawl cu taksa ih hliamhma put nak thawng in a rak dam ter. A sia lam zawng ih hminthang zet mi Vicovaro Puithiam Yatih tlawng ih upa tuanvo la dingih an sawm mi khal cu a rak cohlang.

          Cui hmun ih um Puithiam Yatih pawl cun a fek zetmi daan a tuah sak mi pawl an duh lo ruangah tur thawn that dingah an rak zuam. Asinan, mitha cu Pathian ih bawm nak an co ringring an ti vek in Thinglamtah hminsinnak a tuah lai ah tur an ret nak Sabbit khuat hai cu a kuai theh ih an tawl rel mi pawl a rak lang.

          A innkiang ih um tu Florentius ti mi Puithiam pakhat khal in a hnahsik ruangah siat suah a rak tum. Tur ret mi paung hmuk thawn thah a tum mi khal a hlawhtling lo ruangah neta lam cu mitha lo nunau pawl thawn a mai Puithiam pawl hnaihnok ding a rak zuam. Curuangah a ra lai ding mi sual sawm nak pawl hrial thei dingah kum 530 ah Subiaco taan in Cassino ah Puithiam tlawng thar a rak din. Sui thawn tuah mi daan tiih hmin an pek mi, “thlacam nak le hnatuan” ti mi cozah daan vek in Puithiam pawl in nitin nazi pariat sung thlacam, nazi pariat sung it, nazi pariat sung hnatuan har tuan nak, zum nak lam ca pawl siar nak, zaangfah nak hnatuan tuan nak a phunphun an rak tuah.

          Goth miphun pawl Italy ram an do can ah Siangpahrang Totila in a ralkap Bawi cu Siangpahrang thilri pawl a hruk ter ih Mithianghlim Benedict in a si nak hman a theih le theih lo a rak hniksak.

          Asinan, Benedict in Siangpahrang vek in thuam aw tu a ralkap Bawi a si thu a sim thei ruangah Siangpahrang Totila hman in upat nak a rak pek. Benedict cu kum 547 ah Puithiam dinhmun in a nun a rak cem ih Pope Francis in Mithianghlim Benedict cu Europe ram bawm ih humhim tu tin a rak than. Benedict Yatih kaing sungin Pope 50, Bishop 7000 le Mithianghlim 40,000 luan an rak suak.